الموضوع: واخيرا استلمت اللوجان اتوماتيك

الحمد لله الذي بنعمته تتم الصالحات ...من ساعة استلمت سيارتي الجديدة رينو لوجان اتوماتيك من معرض القصراوي بالهرم لونها فضي وتمنها 80 الف تسليم بعد حجز كام يوم ( طبعا الحاج والدي ساعد بتلت الثمن لحين ميسرة)...ادعولي بالبركة والحفظ من الحوادث والقدرة على سداد الدين ....والأهم ان استطيع شكر النعمة

اخذت بيها كام لفة في شارع الهرم وأجمل حاجة ان حسيت وكأني عارف العربية من زمان وده غالباً علشان انا كان عندي رينبو ...استغربت فقط الشنطة وانا بركن بس مسيري اتعود

ليا كام سؤال في السريع بحكم انها اول زيرو اركبه
1- امتى اول تعامل مع التوكيل ولو لاقيت حاجة مش طبيعية في العربية اعمل ايه
2- كتاب المانيوال بتاعها اجيبه منين
3- التعامل مع العربية وهي زيرو يكون ازاي
4- التأمين رأيكم فيه ايه ومين احسن مكان تكافلي اسلامي

التقرير بإذن الله يوم الجمعة لأني استلمت العربية بالليل وبكره عندي شغل من الصبح لبليل
امكانيت العربية التي اعرفها كالتالي
بور - تكييف - 4 زجاج كهربا - اتوماتيك تبترونيك - كاسيت mp3 - موتور 110 حصان- كمبيوتر معلومات

مبـــــــــــــــــــــــ ــــــــــــــــروك

الف مبروك

ربنا يديك خيرها ويكفيك شرها

الف مبروك ياباشا وربنا يحفظهالك ان شاء الله , وياريت التقرير يبقى مدعم بالصور . بخصوص موضوع التليين متقرصش عليها ولا كيك داون جامد دلوقتى حاول ماتفتحش التكييف كتير على السلانسيه , لما تقف فى اشاره يا تجيب p يا تمور ب n وترفع فرامل اليد علشان ماتتقلش على الفرامل

المشاركة الأصلية كتبت بواسطة korkor

الف مبروك ياباشا وربنا يحفظهالك ان شاء الله , وياريت التقرير يبقى مدعم بالصور . بخصوص موضوع التليين متقرصش عليها ولا كيك داون جامد دلوقتى حاول ماتفتحش التكييف كتير على السلانسيه , لما تقف فى اشاره يا تجيب p يا تمور ب n وترفع فرامل اليد علشان ماتتقلش على الفرامل

لما تقف فى أشارة يا تجيب n اللى هى المور أو تفضل على ال d اللى هيا تعشيق التروس والى أنت أصلا سايق عليها وينصح أنة عند التوقف فى الآشارات تجيب ال n .....

ال P لا نستخدمها نهائى الا عندما تركن سيارتك عند المنزل أو الجراج وتتبع الخطوات الآتية للحفاظ على الفتيس :

أولا : تمور العربية على n

ثانيا : ترفع فرامل اليد

ثالثا : تجيب العربية على p ثم تنزع المفتاح .... وممكن تسيب العربية على كدة لغاية ما تيجى تتحرك بيها تانى .... وتعمل عكس الخطوات دية علشان تدور الموتور وتطلع بالعربية
يعنى تضع المفتاح فى الكونتكت وتدور العربية ثم تنقل من على p الى n ثم تنزل فرامل اليد ثم تنقل الى ال d وتطلع فى أمان الله وقبل ما تطلع ما تنساش تقول دعاء ركوب الدابة أو السيارة

ملحوظة : فى نقطة تعليق على ثالثا . وهى لو أنت فى أى مكان وخايف تركن على n وممكن أى حد يزق العربية ويبوظ الفتيس ممكن بعد ما تركن على p وتخرج المفتاح . تضغط بأيدك على الزرار اللى فى أرضية الفتيس اللى بيفك التعشيقة وأنت أثناء ما بتضغط علية أنقل الفتيس من ال p الى n
اللى هو المور وطبعا كل دة وفرامل اليد طبعا مرفوعة وهى كفاية تمسك وتوقف العربية بعيدا عن الفتيس للفاظ علية .....

والله الموفق والمستعان