الموضوع: عربينك بتعمل كام كيلو فى الصفيحه

هو لو حد قال ان استهلاك عربيته جوة البلد 60 كيلو بس في الصفيحة
وعلى الطريق سرعة 90 بتعمل 120 ببنزين 80 او 150 بالكتير ببنزين 92 هتصدقوه ؟


العربية 504 2000 سي سي

عملت قرد للعربية دى عشان تتعدل ومفيش فايدة
جميع انماط السواقة جربتها ، جميع انواع البوجيهات ، تغيير طقم الكهربا كله ، ابلاتين الكترونى وموبينة الكترونى ، تغيير البيكات ، تغيير الكربراتير كله مرتين ، ظبط تاكيهات اكتر من مرة ، تغيير نوع الزيت اكتر من مرة ، تغيير البنزينة نفسها ، تغيير دسك واسطوانة ،مراجعة ضبط التقسيمة والكاتينة ، ظبط الفرامل .. ظبط الهوا والزوايا ....


وصلت في مرة ان مفيش اي بنزين ني او اي دخنة سوداء والبوجيه تفكه يطلع ابيض

وبرضه الاستهلاك هو هو !!



مش فاضل الا حل وش السلندر وبصراحة انا فاقد الامل انها تتعدل بعد المصاريف دى كلها

بالمناسبة الزيت بينقص جامد بعد سفر ساعتين ، وفي مرة عملت اختبار كبس موتور الراجل قاللى موتورك 87% !!

مفيش زيت بيتحرق في العادم او دخنة زرقاء سواء في العادم او الفايظ
بس احيانا البوجيه بيقطع وبيعرق زيت

المشاركة الأصلية كتبت بواسطة ahmod

بيعها

ده انت ممكن مصاريف شهرين تلاتة بنزين يجبولك عربية غيرها :s_thum1[1]:

انت بتقول فيها ، والله لو بتاعتى لوحدى مش بتاعت والدى كنت بعتها من زمان
ووالدى مسافر وبييجى شهر في السنة ولما جه في سنة وفكر يبيع ، احوال البلد مش مستقرة ومفيش حاجة تشجع على ان الواحد يشترى جديد في الظروف المنيلة دى ..

اكتر حاجة تحرق دمى بقى لو رحت لبعض الميكانيكية ويقولولى ده العادى بتاعها !


و برضه قبل ما حد يقوللى شوف التسريب والتنك والقصة الفكسانة دى :d
عملت فيها كل حاجة فعلا :(

انا خايف بس افتح وش السلندر اخش في حوارات جديدة

لسة من اسبوع عربية واحد قريبى سكودا فليشيا جابت منه جوان وش سلندر
والميكانيكى غير الجوان والعربية ما ظبطتش من بعدها ، مفيش سحب خالص ، روحها البيت بالعافية ، وكنت انا سافرت و كلمته بعدها قلتله سيبها زي ما هى لحد ما ارجع اشوفلك الميكانيكى هبب فيها ايه
اللى يغيظك فعلا ان الصنايعي عنده استعداد يبعتك في اي حوار تانى ولا على باله وهو عارف ان السبب حاجة تانية او هو بوظ حاجة تانية ولا ذمة ولا ضمير خالص ..

يعنى مثلا قعد يقول له ده البنزين وسخ ، ده الكهربا مش مظبوطة ، ده الفلتر مش عارف ماله ، اصل الكربراتير بايظ ...
يابن التيت العربية كانت زي الفل ، نصيبها سخنت وجابت جوان ، والموتور اتفتح ما اتظبطش من بعدها يبقى ايه علاقة اللى انت بتقوله ده كله باللى حصل

ربنا يرحمنا بقى من الكفتجية

المشاركة الأصلية كتبت بواسطة ahmed_oth

انت قصدك زيت ايه اللى بينقص ؟؟
وانت عملت اختبار كبس لللموتور فين وبكام وايه فايدته؟
معلش خبرتى فى العربيات زى كفائتى فى لغه اليبانى !!!

زيت الموتور

وبينقص بسبب تفويت في الشنابر او مشكلة في اويل سيلات الصبابات

اختبار كبس الموتور بيحط جهاز قياس ضغط مكان البوجيه ويفصل الموبينة ويفصل طرمبة البنزين ويفضى الكربراتير ويدوس بنزين للاخر ( يفتح البوابة على الاخر ) ويدى مارش ويقيس الضغط على الجهاز اللى راكب مكان البوجيه ، ويكرر الموضوع مع كل سلندر ،( يفك البوجيه بتاعه ويركب الجهاز مكانه ويركب ال3 بوجيهات الباقيين زي ماهم ..)

لو الموتور جديد بيبقى ضغطه لخليط الهوا والبنزين عالى ومفيش تفويت ( البستم على قد السلندر بالظبط ) وده اللى بيخلى الخليط ينضغط وينفجر بقوة تولد عزم الموتور
كل ما الموتور يقدم كفاءته في الكبس بتقل ويبتدى عزم العربية يقل والمكنة تاكل زيت نتيجة تسرب الزيت من تحت البستم لفوق البستم

ويتقال عليها مكنة خفيفة او مفوتة وبيبقى كبسها طبعا اقل وقدرتها اقل وتكون محتاجة عمرة او نص عمرة

الجهاز موجود في اغلب البنزينات والسعر في حدود 50 جنيه للاختبار

بس انا تقريبا اللى عمللى الاختبار ده مكنش فاهم حاجة وحاسس انه ادالى قرايات غلط لأنه قاللى السلندر 2 و 3 عندك 100% وطبعا مفيش حاجة اسمها 100% . .

طبعا فايدة الاختبار لو بتشترى عربية جديدة وعايز تعرف حالة المكنة بتاعتها