الموضوع: رجعت من رحلة العمرة (بل رحلة العمر)

الله يسلمكم جميعا يا جماعة
الحقيقة الشركة عاملة فارايتى مستويات وأسعار (حصلت عليه امبارح منهم لأن فيه جيرانى كمان عاوزين يطلعوا معاهم)
لذلك لا أستطيع إنى أشرح المسألة كلها من فنادق لمستويات لمدة إقامة لأنها متنوعة جدا وأعتقد إنها تناسب فئات كتير
ممكن أحط لكم عنوان وأرقام الشركة وإسم الشخص المسئول (مش عارف رأى الإدارة فى الموضوع ده إيه) وحضراتكم تستفسروا منهم وكل واحد على حسب رغبته فى الرحلة من وقت وتاريخ وفنادق ... إلى آخره

لكن أنا ممكن أديكم ملخص سريع عن رحلتى معاهم :

رحلتى كانت فى الفترة من 8/2 إلى 20/2 عبارة عن 5 ايام بالمدينة المنورة و7 أيام بمكة المكرمة - طيران مصر للطيران - فنادق لا بأس بها (فندق المدينة إسمه قصر الأنصار الجديد فخم جدا ومريح وقريب جدا من الحرم النبوى ، وفندق مكة إسمه جوهرة الفردوس وهو فندق زيه زى كتير من فنادق مكة ميزاته متوسطة ومش بعيد قوى عن الحرم بس مش وحش ومقضى الغرض) وطبعا عندهم عروض لفنادق أعلى وأشهر وحسب السعر والمدة .
سعر الرحلة كان 4500 جنيه
ودلوقتى عرفت انهم عاملين رحلات بطيران شركات خاصة القاهرة - ينبع وده أرخص طبعا من مصر للطيران .
الرحلة كان عددها قليل جدا وده فى حد ذاته ميزة لأن الإنتقال وحمل الشنط بيكون أسهل ده فضلا عن وجود خدمة حمل الحقائب فى الفندقين وكمان الإلتزام فى مواعيد الإنتقال والتجمع من المدينة للمزارات لمكة لجدة (تضبطها بالثانية)
صاحب الشركة كان مستنينا فى مطار القاهرة لتوديع المسافرين وتوزيع الهدايا عليهم قبل السفر
بصراحة المسألة كانت ماشية آخر حلاوة ومافيش مشاكل بتاتا والله كما لو كانت الرحلة معمولة مخصوص علشانى أنا بس .

ربنا يكتبها لكل مشتاق

أنا على أتم أستعداد لمن يريد أن أرسل البيانات له على الخاص وتحت أمركم واللى يكلمهم يطلب منهم العروض بتاعتهم على الميل لأنها كتير ومتنوعة بس ابقوا ادعولى ربنا يشفينى ويرزقنى رزقا حلالا طيبا .