الموضوع: انا لبست عربية سوزوكي

السلام عليكم

مبدأيا انا ليا الشرف اني انضم لاسرة السوزوكي اللي فيها اعضاء ممتازين زي حضراتكوا بس كان نفسي انضم ليكوا بعربية احسن من كده.
يوم الاربع اللي فات واحد صاحبي وراني عربية سويفت هاتش باك اتوماتيك 1300 سي سي موديل 1992 العربية صراحة شكلها حلو قوي و الدوكو بتاعها معمول صح و مش راشة حاجه من جوه.
صاحبي ده خبير عربيات و انا بثق في كلامه. المشكلة انه خبير في الصاج و ملوش قوي في الميكانيكا و ملوش خالص في الكهرباء.
بصينا عليها و جربناها الماتور حلو و الفتيس كويس و العفشة مش وحشة بس مفككة شوية و جربنا التكييف حلو.

المهم الراجل كان طالب فيها 30 الف من هنا لهنا وصلنا 29 بالعافية. صاحبي قالي ناخد عربية نضيفة غالية شوية احسن ما ناخد عربية مبهدله و نصرف عليها قد كده.
انا اقتنعت بكلامه و قولت على بركة الله و يوم الخميس روحت دفعت الفلوس و و سجلنا في الشهر العقاري - انا مش بحب التوكيلات و كل الضريبة 120ج - و احسن اننا سجلنا لان كان في مشكلة في التوكيل بتاعه صلحناها - رقم الشاسية متبدل مع رقم الماتور.

خدتها و روحت اولها بدوس فرامل راحت مطلعة صوت حديد بياكل في حديدز طبعا ده كده تيل.
روحت اشتريت تيل, و بعدين ببص على الطنابير لقيتها عمله ريجة قولت مبدهاش اشتريت طنبورتين بالمرة. و رجعت على الميكانيكي ركبهم و كده الفرامل بقت تمام.

لما جربتها و شوفتها كنا الصبح فمشوفتش ان لمضة الدينامو منورة. رحت للكهربائي عملي فيلم هندي و خلاني غيرت الدينامو مع ان بتاعي سليم. و بعد كل ده برضه اللمضة لسه منورة و كان الوقت اتاخر فعملي لمضة تانيه اشوف منها الشحن لغاية لما نشوف منوره ليه.

ركنت و جيت الصبح بدور بتعمل تكة و مش بتدور - رحت كلمت الكهربائي جالي دورها و خدناها على الورشة قالي ده اتوماتيك المارش. نزلنا ندور عليه ملقناهوش فرجعنا نضفناه و ظبطنا اللحمات و دورنا دارت بس انا لسه قلقان.

بجرب اجري بيها جريها حلو بس اول ما اشيل رجلي من على البنزين تترج جامد مش عارف ليه.
و بعدين الاسلاك في العربية مبهدله و ملعوب فيها كتير.

فاللي عاوز اقوله نصيحة لليشتري اي عربية يكشف عليها كويس لان اه الصاج و الماتور مهمين بس كمان باقي الحاجات مهمة و بتصرف كتير.

معلش هتتعب شوية و بعدين العريبة هتبقى زى اللوز و هتحبها كمان
ربنا معاك