الموضوع: تقرير بعمل الصيانة باتو ايجيبت وعمل الفحص المجاني

يا مساء الفل على احلى صقور مش هطول عليكم انا روحت انهاردة اتوايجيبت لعمل الفحص المجاني لنيسان صني 2007 عاملة 107 الف كم وكانت النتيجة كالآتي:
1- السيارة تحتاج طقم إطارات كامل حيث انها انتاج 2009
2- علبة شكمان وسط سعرها 1100 جنيه + الضريبة
3-قاعدة موتور علوية سعرها 280 +الضريبة
4- قاعدة موتور سفلية 243 + الضريبة
5- قاعدة فتيس سفلية 280 + الضريبة
6- اثنين مقص امامي سعر الواحد 578 + الضريبة
7- مقص خلفي واحد سعره لم يذكر سعره
8- بلية شداد سير محرك 330 + الضريبة
9- كاوتش تراب مساعدين امامي سعرهم الاثنين 136 +الضريبة
10-كاوتش تراب مساعدين خلفي سعر الواحد 196 + الضريبة
11- تيل امامي 300
12- تيل خلفي 350
13- طنابير امامي سعر الواحدة 473
14- ماستر فرامل خلفي سعره 350

تمام كده انا بقى اتخضيت وبلمت شوية كده وبعدين قولت لمهندس الاستقبال وهو انسان مهذب وخلوق جدا نعمل الحاجة الضرورية دلوقتي فغيرت تيل فرامل امامي وخلفي وطنابير امامية لانه مرضيش يخرطها وقاللي مش هينفع تتخرط عشان سمكها صغير وغيرت كاوتش تراب امامي لان المساعدين اللي قدام كنت جايبهم من سنة وقولت احافظ عليهم وغيرت ماستر خلفي وغيرت سيور وفلتر هواء وبوجيهات وزيت باور وموتور وفرامل يعني صيانة شاملة وكعيت شوية حلوين كده بعد الخصم عملوا 3360 جنيه.
ملاحظاتي بقى عن الصيانة:
1-الكشف المجاني على العربية عبارة عن تهريج ليه بقى ؟ لان الاطارات الامامية انتاج الاسبوع العاشر من سنة 2011 مش سنة 2009 زي ما اتكتب في التقرير وقولت الكلام ده للمهندس قاللي يمكن الفني مخدش باله.
2- المساعدين الخلفية بايظة خالص وبالرغم من كده اكدلي انها سليمة وقولتله العربية بترزع مني في المطبات من وراء قاللي عادي مش عارف ليه عشان كده مرضيتشي اغير كاوتش التراب الخلفي غير لما اغير المساعدين بالمرة.
3-اتعمل شوية حاجات من غير اخذ موافقتي عليها عبارة عن تدبيسة كده زي تغيير كاوتش المساحات ولمبة الفتيس اللي في الكونسول ولمبة الاستوب وترصيص العجل اللي ب 75 جنيه لوحده معلش هي حاجة هايفة بس اتغاظت منهم لاني فوجئت بيهم في الفاتورة.
4- الغسيل النهائي للعربية ولا ليه لازمة غير اني اتعطلت ساعة الا ربع زيادة وبرده خرجت مش نظيفة خصوصا يد فرامل اليد كانت مش نظيفة ومزيتة مكان الشغل والكرسي الامامي برده اتوسخ من الشغل لان الكيس اللي حطوه كان مقطع مكان الشغل.
5- المعاملة هناك كانت جيدة جدا من حيث الاستقبال او الاستفسارات عن اي حاجة بس الحائط الزجاجي اللي بنشوف منه الشغل في العربية غير مريح لا يمكن النظر منه وانا قاعد لازم افضل واقف عنده عشان اقدر اشوف العربية كويس مع اني مش قصير على فكرة بس هما عاملين الجزء السفلي منه مصنفر.
أخيرا اسف لو كنت طولت عليكم بس حبيت احكيلكم على اللي حصل بالظبط مع ذكر الاسعار عشان اي حد عاوز ياخد فكرة عنها وشكرا جزيلا.