الموضوع: مخنووووق

المشاركة الأصلية كتبت بواسطة midoabdeen

انا من الاخر كدة مخنوق جداا

انا لسة شاب 21 سنة وطلعان عينى
شغل شغل شغل
واتخنقت من كتر ما الواحد خايف على مستقبلة
ومستنى الجيش ومش عارف هادخل ولا اية
وحاسس انى هافضل طول حياتى على كدة مش
انا من الاخر كدة خريج تجارة عين شمس
بس من سفرى وانا شغال فى النقاشة لغاية ما اتعلمتها كويس وبقي اشتغل فيها والحمد لله ربنا كرمنى واشغلت كويس لغاية ما خلصت السنة دى
بس خايف لافضل طول عمرى متمرمط كدة وطلعان عينى
انا بشتغل مش علشان اهلى مش قادرين يصرفوا لا انا بشتغل لانى مابعرفش اخد فلوس من والدى
انا كل اللى خايف منة انى افضل طول عمرى كدة

الكلية اسمها كلية التجارة ... مش كلية المحاسبة ولا كلية المديرين الماليين والباشوات
يعني اييييه ؟
يعني المفروض لو انت حاليا نقاش ومعاك واحد زميلك نقاش برضه
لكن انت اتعلمت واخذت بكالريوس تجارة
يبقى المفروض لو توقعنا المستقبل كمان 5 سنوات
ح نلاقي زميلك لسة نقاش زي ماهو
وتكون انت بقيت مقاول نقاشة صغير
وبعد 10 سنوات لما يكون عمرك 31 سنة ( يعني في سن الزواج ) تكون صاحب شركة مقاولات ناجحة ... بينما زميلك لسة نقاش زي ماهو
ده اللي المفروض تكون اتعلمته في الكلية
انك تحول اي عمل متاح ليك الي عمل مؤسسي مع الوقت
لكن كلامك مش عاجبني
انت بتشتكي من كتر الشغل وعمرك 21 سنة ؟؟؟؟؟
المفروض تحمد ربنا انك بتشتغل كتير
لو ماكنتش تشتغل وتتعب وانت عمرك 21 سنة امال عاوز تتعب امتى ياراجل ....
على قد تعبك في شبابك على قد راحتك في كهولتك
احمد ربنا واخلص في عملك وطوره وكبره ..... وياريت اشوفك بعد 15 سنة من اليوم .... وافكرك بالمشاركة دي
ربنا يوفقك

المشاركة الأصلية كتبت بواسطة HAGAN

ياااااااااااااااااااااااا ااااااااااااااااااه
كل دي خنقة يا راجل يا طيب
الاول وحد الله كده
و احمد ربنا تاني زي ما انت حمدته في مشاركتك و في ردودك علي الاعضاء الكرام و احمده تالت و رابع و آناء الليل و اطراف النهار
اخي الكريم ميدو الاصغر سنا و الكبير بعملك و كفاحك مقاما

الموضوع بسيط جدا جدا جدا

انت خايف من ايه و علي ايه و ليه
خايف علي مستقبلك ؟
طبعا لا لانك تعرف ان مستقبلك و حاضرك بيد الله

طيب خايف انك لا تستطيع الاستمرار في الشغل و المجهود طول عمرك ؟
اسأل الشباب اللي في سنك اللي متلطعين علي القهاوي او مقضينها شات طوال الليل و نوم طول النهار هتلاقيهم بيحسدوك انك معاك مهنة تستطيع ان تصرف بيها علي نفسك دون الحاجة لان تمد يدك لوالدك كل يوم سواء كان قادرا او غير قادر

و هم يا حرام اهلهم ظلو يصرفو عليهم لحد ما شاخو و عدو ال 25 و كانو موفرين لهم كل شئ مش عاوزين يبهدلوهم في الشغل و دلوقتي هم اللي اغلبهم بيغبطوك و لن اقول بيحسدوك علي ما اكرمك به الله من انك تجد مهنة تستطيع من خلالها ان توفر بعض متطلباتك بدل الحوجة

طيب خايف من زوال الصحة بدري بسبب الشقي ايضا بدري؟
صدقني و انا اكبر منك ب 17 او 18 سنة من شقي و هو صغير شد عوده و هو كبير و من رحرح في الصغر انحني في الكبر الا من رحم ربي

طيب ايه الحكاية؟
الحكاية بأختصار في الشهادة ( و هذا حقك طبعا ) و الا كنت جبتها من قصيرها و وفرت الدراسة و خضت تجربة العمل الفني من الاول
يبقي اجتهد بقي في شوية كورسات علي حبة تضحيات و حاول تنزل في اي مكان لاخذ الخبرة في مجالك و تحافظ علي مهنتك الجميلة لتساعدك علي ان تستطيع الاستمرار بتوفير التزاماتك الضرورية في الملبس و اي كورس او دورة تثقل بها نفسك في مجال المحاسبة
و اوعي تقول مفيش شغل بشهادتك صدقني تبقي غلطان و اتحداك
روح كده لاي مكتب محاسب قانوني اليومين دول بالذات و قول له يا فندم انا عاوز اجي لحضرتك كل يوم 4 او 5 ساعات و اعمل فيا اللي انت عاوزه ان شالله تبعتني للعملاء او اكتب في دفاتر اليومية اي حاجة لحد موقفي من الجيش ما يتحدد و مش عاوز فلوس خالص دلوقتي و لو رفض 10 واحد هيوافق صدقني بأذن الله

سنتين تلاتة هيكون لسه عندك 23 او 24 سنة و هيكون عندك خبرة في مجالين
و امامك فرص السفر للخارج و امامك ان تصبر في البلد 5 او 6 سنين

اوعي حد يقول لك اللي جاي وحش
لان اللي جاي ملك لله تعالي ما عليك الا ان تجتهد فقط و لا تحزن فأنت افضل من مئات الالاف غيرك اقسم لك بالله علي ذلك

هل تتخيل ان لي زملاء مهندسين خبرة 15 سنة كانو امس في مكتب سفريات بيبحثو عن فرصة سفر للخارج بعد ان كانو مدراء مشاريع في مصر
سوف يذهبون للعمل مهندس عادي او اول في الخارج لكي يحاول ان يحافظ لابنائه علي جزء من الحياة الكريمة التي عاشو عليها

و في نفس اليوم يرجع اخر من الخارج كان قد تركنا من 10 سنين فاتو يبحث الان عن عمل هنا ايضا اي كادر اقل مما وصل له بالخارج كي يوفر لنفسه و لاسرته الحياة الكريمة و لا يجلس في البيت و هو مازال لم يتخطي ال 40

اخي الكريم هذه هي الحياة فلا تقلق و لا تحزن و احمد الله علي الصحة هي الشئ الوحيد الذي يحق لك الحزن عليه
و اوصيك و اوصي نفسي بتقوي الله فهي خير زاد تتزود به في حياتك كلها
تحياتي لك و لكل شباب المنتدي الكرام

م.حاتم السباعي

+111111
جزاك الله كل خير ياباشمهندس حاتم ,, كلامك اثر فيااااا ..

وبالنسبة لصاحب موضوع قول حمدلله على كل شئ وحااااول تسعى فى كذا حاجة ومتنميش فى خط أنا لعلمك فى سنك وفى تجارة واخر سنة وبشتغل فى مجاااااااااال مش مجاااااااااالى خلاص وحمدلله بااااخد كورسات cma ولو وقت كان يسمح كنت زودت كماااااااان وربنا يوفقك فى حيااااااتك .. ان شاء الله .