الموضوع: الياريس - طاسة إتكسرت .. جنط إتعوج ... إكصدام متخربش ... الحمد لله!

لا حول ولا قوه الا بالله

قدر الله وما شاء فعل ربنا يعوضك خير يارب معلش ان شاء الله بسيطه ومتزعلش نفسك

كده حتت حفره تعمل فيك المقلب ده انت اتحسدت اقترح عليك بدل ما تروح تصطاد سمك اصطاد حفر ونقر ومطبات وسلم لى على ميزانيه رصف الطرق

يا باشا فداك الحمد لله على كل شىء
الجنط يتعدل وحيبقى 100 100 مفيش مشكله أعرف واحد كويس حياخد فى حدود 40 جنيه
الكاوتش أعتقد إنه يتحط له كمر ويبقى إستبن حيتكلف فى حدود 50 شامل سعر الكمر
الطاسه إستعمال ( غالبا مسروقه ) ب 60 جنيه
والحمد لله إنها جات لحد كده كلمنى

الجنط حديد يا بسيونى باشا وأنا أعرف واحد فى صلاح الدين كويس
كلمنى وأنا أروح معاك إن شاء الله

السلام عليكم
شكرا لكا من شارك بالنصيحة او المواساة .... جزاكم الله خير ولا أراكم الله مكروها في سيارة لديكم :)

الحمد لله الذي بنعمته تتم الصالحات.

شكر خاص لمحمد إبراهيم باشا إللي دايما يظهر بعد الهنا بسنه ويقوللي إعمل كذا وكذا .... بهزر معاك يا حبي وعاوز أشوفك إن شاء الله قريب جدا.

1- إتصلت ببريدجستون في لوران وقالوللي مش بنصلح جنوط ومكنه الترصيص بايظة حاليا ... تصلح الجنط وبعدين تيجي نبصلك على العجلة.... تنصحوني بإية قالوللي فيه واحد إسمة شعراوي في العطارين وده كويس .... المهم سألت تاني وفعلا الإسم إتأكد "مسعد شعراوي" وأعتقد يا محمد باشا هو ده إللي إنت تقصدة... صح؟؟؟ روحت عندة وحكيت الحكاية وقالي حتتكلف 40 جنية وإن شاء الله يرجع زي الأول ... قلتله إشتغل.

إشتغل على الجنط على البارد وطخ طيخ طاخ وكل شوية يركبة على مكنة ويعدل ويظبط وياخد مقاسات وينزلة تاني وطاخ طيخ طوخ ويركب على المكنة ويقيس ويعدل..... خلص وركب الكاوتشة إللي ما كانش فيها اي قطع ظاهر ونفخ وكب مية وجرب والحمد لله سليمة! بس أنا لسة مش مطمن.

2- روحت شاؤع صلا الدين عند واحد إسمة وليد وعنده طاسات بس ... قالي سيبها وتعالى كمان نص ساعة ... ظبط الطاسة ولحمها وشكلها بقى معقول يعني 70% .... وعنده طاسات مسروقة طبعا بيتراوح سعرها حسب الحالة والمفاجأة الطقم كلة جديد ب 400 جنية مش 1000 زي ما الواحد كان فاكر.... ربنا يكفينا شرها .... وأخد 10 جنية على التصليح بتاع الطاسة ... كل ده وأنا ماشي على الإستبن.

3- قولت لنفسي حروح اشيك عند بريدجستون ومعندهمش مكنة ترصيص شغالة ومشوار من شرق البلد لغربها ... سألت وعرفت في واحد مشهور وبقاله سنين شغال إسمة عصفور وده بعد كوبري القباري أمام بنزينة الطراهوني .... محلين وبيبيع كاوتش ومتخصص ومعرفة بعض الأصدقاء ... روحتلة ووريته العجلة كشف عليها في البانيو وعلى الكاوتش وقاللي تمام والحمد لله وقالي الشعراوي محترم في شغله.... خش على الترصيص وإرفع العربية ورجع العجلة مكانها والإستبن في الشنطة ... كام 7 جنية ايوة والله 7 جنية.

العجلة (إلي الأن) سليمة بفضل وحمد الله وربنا يكفينا شرها.

العفشة والحمد لله سليمة ومش سامع أي أصوات أو حاجات غريبة بس صيانة ال 5000 قربت وإن شاء الله أخليهم يبصوا على العفشة والمساعدين وكل حاجة.

في ناس قالتلي الجنط ب 1000 جنية وكدة ولما روحت للشعراوي ولقاني قلقان قالي يا عم عادي وعندي جنط الياريس الأصلي جديد ب 250 جنية لو عاوز!؟ (جنط عادي مش سبور طبعا).

الحمد لله .... الحمد لله ... الحمد لله .... قدر ولطف
انا خرجت من شغلي ورايح عامل حسابي على تكلفة مش أقل من 1000 جنية .... بس ربنا كرمني أخر كرم والحمد لله ولا تأمين ولا يحزنون ... كفاني الله وإياكم شر ومخاطر الطريق.