"بوابة الأهرام" تنشر أسعار وكيفية توزيع السولار والبوتاجاز والبنزين بـ"الكارت الذكى"

**amoor89** · 05-03-2012 10:11 PM

بصراحة فكرة غبية جدا جدا وهتظلم ناس كتييييييييييييييييييييييي يييييييير وممكن توصل لخراب بيوت
يعنى انا واحد من الناس شغلى بيعتمد اعتماد كلى على العربية واستحالة 1000 لتر يكفو طيب اعمل ايه واخلص شغلى ازاى ولا اللى اشتغل بيه احط بيه بنزين عشان الكارت خلص حرااااااااااااااااام والله انا زهقت من البلد دى

**me_medoo** · 05-03-2012 11:58 PM

المشاركة الأصلية كتبت بواسطة elawany13

ياباشا الكلام على بنزين 80 بتاع الغلابة
مش معقولة الحكومة هتنزل سعر بنزين 92 الى 1 جنيه
ومش معقولة بنزين 80 يتباع بدون دعم بـ 3 جنيه
ويسيبوا بنزين 90 و 92 بنفس السعر
اكيد هيزيدوا كمان

يالهوووووووي يا ألواني ... لا تاني تاني وضح النقطة دي الله يخليك ... يعني بنزين 92 ممكن يبقى اغلى من كده ويوصل ل 4 جينة ...

وبعدين دحناااااا غلابة واللهي وبنحط 92 ... ولو عرفت أحطلها شووية مية هحطلها ... الا سئال ... هما لو غلو البانزين وانتا دخلت البانزينة ومعلق استيكر نايل موتورز مبيدوش خصم 10% بتاعت المنتدى ههههههههههههه

**MASERATI** · 06-03-2012 01:42 AM

السلام عليكم و رحمة الله و بركاته

طبعا القانون ده هيضايق ناس كتير, اللى شغلهم بيضطرهم أنهم يتحركوا كتير بالعربية و ربنا يكون فى عونهم.

طبعا, متوقع أن أسعار السلع تولع أكتر ماهى مولعة , لأن الوقود غلى.

أنا من الناس اللى لما كنت فى مصر, عمرى ما كنت بعمل 10000 كم فى السنة و أنا أصلا بتفادى ركوب العربية بقدر الامكان لأن السواقة فى مصر شئ متعب جدا و لأن أنا حاليا أنا بره مصر, فالكارت بتاعى هيفضل فيه ال1000 لتر لحد السنة ماتخلص.

ممكن أبقى أفكر أبيعه فى السوق السودا ب2.50 جنيه, للى خلص الكارت بتاعه و لسه عاوز بنزين, ههههههههههههههه.

أنا عن نفسى, القانون ده, أنا مبسوط منه جدا و بدعى ربنا أنه يتنفذ, لأنه هيخلى أى حد من الشباب الصيع اللى بيجروا فى الشوارع بدون لازمة و لا داعى, يتلموا و لا يشتروا اللتر ب3 جنيه.

الحلو بأه, أنهم ينزلوا الجمارك على العربيات الكبيرة, الأكتر من 2000 cc مثلا و اتفرج بأه.

**حماده المصري** · 06-03-2012 02:46 AM

وكسه بل نكسه

بدل ما تقول يزدوا الانتاج يعملوا حاجه مفيده اي حاجه يقولك لا نزود الاسعار هو ده المشروع الهلامي الي الاستاذ ولا الدكتور ولا البشمهندس فرحان بيه وعايز يعرضوا على مجلس الوزراء المبجل المكرم

الدول العربيه البنزين فيها ببلاش كلها ارخص من مصر ووقود جوده اعلى

امريكا والدول الاوروبيه ممكن البترول غالي جدا عندهم بس عندهم السولار وكل العربيات ماشيه بيه بمعنى كلها كلها

هنا الفرق هما اتزنقوا فيه بنزين غلوا اسعاره لانهم بيستوردوه عالجه المشكله بتوفير السولار باسعار رخيصه هي دي معالجه المشكله الصح

انما انا عندي مشكله في البنزين اقوم مغليه ومغبي كمان السولار ابقى انا في الكفته والشهاده الي اخدتها دي المفروض اروح الفها واحط فيها بطاطا

**mahmoudysf** · 06-03-2012 03:40 AM

والله المبدا والفكرة ممتازة
وانا كنت اقترحت حاجة زي كدة هنا من فترة
وللاسف فيه ناس كتير اعترضت
مش مهم انو يتبطق بنفس الطريقة اللي االي مذكورة
لاكن يبقى فيه مناقشة عن معدل الاستخدام الطبيعي في السنة مثلا
وليكن مثلا 2000 لتر سنويا بسعر جنية لبنزين 90 او 92 ومايزيد عن ذلك الالف لتر الثالثة بسعر 3 جنية والربعة بسعر 4 جنية وهكذا
لان مش معقول واحد جايب عرية 4000 cc باكتر من مليون جنية وربنا يدي الناس جميعا
وبيتمتع بدعم يومي ما يقلش عن 200 جنية وفيه ناس مش لاقي تاكل

**ahmedhawas** · 06-03-2012 04:18 AM

1- الموضوع ده مُتوقعينه ومن فترة كبيرة كمان.
بالتالي ناس كتير متفاجئتش بالحوار ده .. لكن اللي كنت بفكر فيه هو إلغاء دعم ال 80 فقط
(لإن ده اللي هينهي حالة الغش الرهيبة الموجودة في أغلب محطات البنزين في مصر)

2- كم الموتوسيكلات الصيني اللي بقت زي الرُز ، وكذلك التكاتك اللي غرقت البلد
(والاتنين شغالين ليل نهار .. عمال على بطال) بيستهلكوا يوميا بنزين لا حصر له.

3- الحكومة عاوزة فلوس .. طيب متفرض رسوم ترخيص للتكاتك والموتوسيكلات.
(مش هما برضو بيستهلكو بنزين مدعم ، وبيمشوا عالطرق زيهم زي باقي العربيات)
أنا فاكر من فترة حكومة عصام شرف كانت إدت مهلة شهر لترخيص التكاتك .. ياترى الشهر خلص ولا !!!

4- هل يضمنوا عدم تأثر أسعار المواد الغذائية وأجرة الميكروباصات مع توفير شبكة مواصلات حقيقية .. طبعا مستحيل.
وبالتالي التوقيت مش مناسب أبدا (لان الناس مستنية الحالة تتحسن شوية من بعد الثورة .. ونفسنا الأسعار تتحسن مش تغلى).

5- سؤال كان محيرني .. هل أزمات البنزين اللي فاتت كانت مقصودة ؟؟
ويا ترى أزمة البنزين الجاية هتبدأ إمتى؟

ولا already بدأت؟؟

**Habd** · 06-03-2012 08:16 AM

فكرة حلوة بس فيها مشكلة طريقة التنفيذ ازاى لان الكارت مادام قالك ذكى يبقى اتاكد انه لا ذكى و لا حاجة :) و صباح المشاكل بقى برضه الكمية المستخدمة قليلة يعنى واحد زى حالاتى بمشى بتاع 5 ك ف اليوم و بسافر مرة واحدة ف الاسبوع يعنى عايز بتاع 80 لتر فالاسبوع يبقى حوالر 4000 لتر فالسنة غير الطوارئ لو الكمية اللى بيقولوا عليها تكفى نص استهلاكى و النص تانى عليا ممكن انما يدينا 1000 لتر بس يبقى خرااااااب مستعجل و مش عارف موصلات ايه اللى تتركب دى هو لو فيه مواصلات عدلة كنت جبت عربية اصلا