الموضوع: وأسفاه سيارة رائعة لوكيل غائب عن توكيله

الحلقة الثانية
الوكيل لموظف الأمن ممكن تقولي سيادتك الإستراحة فين يشير الموظف إلي حجرة و اجتها من الزجاج الفيميه الفاخر الحجرة من الداخل بها حوالي 15 كرسي الوكيل يجلس منجعصا ينقلب به الكرسي
العملاء يا استاذ بالراحة هوه انت فاكر نفسك بتجلس علي انتريه بيتكم الكراسي دي تقعد عليها في اول عشرة سنت و لا تكون محضنه علي الحيطه علشان متتقلبش بيك هوه انت عمرك ما جلست علي كراسي صيني و لا ايه
المكان حجرة ارضيتها من ال hdf و قد تفكك من بعضه بفعل هبوط مستوي الأرضيه و خمسة عشر كرسي لابد و ان تزن نفسك في الجلسه و الا انقلب الكرسي و عدد اثنان مروحة سقف من شارع عبد العزيز و عدد اثنان طربيزه من خشب الكزنتر مجمعة بمعرفة الأسطي خلص اوام من التي توضع علي القهاوي النص كم و درجة الحرارة بالداخل لا تقل عن 30 درجة مئويه حيث يمكن ملاحظتها علي وجوه الجالسين و قد تصببوا عرقا و يوجد لوحة مسجل عليها موعد الصيانات و اسعار قطع الغيار و موعد تغييرها
عميل شوفتم يا جماعة ولاد الإيه بيسرقوا ايه اليومين دول زجاجة مرايات الأوكتافيا و التوكيل بيبيع الزجاجه فقط ب 300 جنيه ده حرام والله

الأخ نادر
مرحبا بك و انا معجب بأرائك في هذا المنتدي
استميحك غذرا ان تستكمل قرائة الموضوع و الموضوع حقيقي و حدث معي فاصبر ثم نتحاور حيث اني حالا سأستكمل بقية القصة

الحلقة الثالثة
الوكيل يكلم نفسه انا زهقت من القعدة طب اتمشي اتفرج علي التوكيل يذهب لقسم الإستفبال و يقول له ممكن حضرتك برتشور لمواعيد الصيانة و اسعار قطع الغيار
الموظف اسف اصل السستم واقع و قريبا هنطبع شوية
الوكيل طب هوه حضرتك ممكن اتكلم مع مين يفدني في موضوع كيفية الإعتناء بتابلوه السيارة و الكراسي الجلد
الموظف إسأل مهندس الصيانة
مهندس الصيانة و الله معرفش بس ممكن تسأل في مخزن بيع قطع الغيار اللي ورا الشركة
مسؤل بيع قطع الغيار هو الشخص الوحيد الذي لم يألوا جهدا في مساعدتي و اعترف بدبلوماسيته الشديدة و أدبه و لكنه للأسف لا يملك اي سلطات
الوكيل ممكن حضرت تدلني علي منتجات اسكودا للعناية بالسسيارة و كماليات السيارة
مسئول البيع بص حضرتك انا معرفش اسماء المنتجات بس ده كتالوج الشركة الأم اختار سعادتك اللي عوازه و احنا نبعت نشتريه لك من الخارج بس هنحمل عليك رسوم الشحن و الجمرك ان لها جمارك
الوكيل طب ممكن فرش أرضيه الأصلي
مسئول البيع ايوه موجود بس لون اسود فقط و السعر شامل ضريبة المبيعات 390 جنيه و لو انا مكانك مشترهوش اصله غالي
الوكيل يكلم نفسه والله الراجل ده طيب

الحلقة الرابعة
الوكيل يعود مرة أخري للمركز و يسأل موظف الأمن هوه ده المكان الوحيد للإستراحة يعني مفيش جهاز تكييف و لا اي وسيله تسليه كما يوجد في المراكز المحترمة
مسئول الأمن و الله يا باشا الإستراحة الرئيسية في التجديدات فوق و ربنا يسهل و يخلصوها اصلهم طولوا
الوكيل طب ممكن حضرتك تقولي الحمام فين
مسئول الأمن والله مغلقة يا باشا في التجديدات بس ممكن حضرتك تخش حمام الأمن علي بوابة الخروج
الوكيل طب ممكن شوية ميه اشرب
مسئول الأمن والله يا باشا ممكن تشرب من الكولدير الموجود بورشة الأصلاحات السريعة هتلاقي كوز فوق الكولدير ممكن تشرب منه
الوكيل يبدأ في الشعور بالقرف من هذا المركز و اليوم اللي اتي فيه و خصوصا و قد مر أكثر من ساعتين و السيارة علي بوابة الورشه و لم تتحرك من مكانها منذ دخلت
مهندس صيانة الأستاذ علي محمود أفندم و الله سعادتك احنا معندناش تيل فرامل خلص رأيك ايه
الأستاذ علي محمود مش فاهم يعني اعمل ايه
مهندس الصيانه ممكن حضرتك تشتري تيل فرامل من المحل اللي قدام التوكيل و احنا نركبه لسيادتك

الأخ المحترم الأستاذ كريزي لامبادا
انا بقص اللي حصل معايا امس و ليس من ثمانية أشهر و الإستراحة الأن اعتقد إن القهوة البلدي ممكن تكون ارحم منها و سبق ان قلت أنني امتلك اقوي و احسن سيارة من وجهة نظري و ليس لي مصلحة في تشويه صورة المركز و لكني أأمل من صاحب المركز أن يذهب متخفيا ليري ما وصل اليه الحال كما احب و اتمني أن يكون توكيل سكودا احسن توكيل في الدنيا لراحتك و راحتي و راحة جميع العملاء لأن السيارة معمرة وسوف تستمر معك فترة طويلة بإذن الله
علي فكرة انا عمري 48 سنه و اعرف ما اقول و متي و كيف للعلم
مع تمنياتي لك بالصحة

الحلقة الخامسة
الوكيل و قد مل من القعدة يذهب لمركز البيع مرة أخري و يسأل مسئول البيع انا شايف انه فيه قطع غيار كثيرة ناقصة عندكم هو الموضوع ايه
مسئول البيع و الله حضرتك احنا عندنا نقص شوية في قطع الغيار اصل اخر شحنه وصلت من اربع اشهر و فيه عندنا نواقص كثيرة و بعدين صاحب التوكيل مكنش متوقع يبيع كل العربيات دي خلال العام و النصف اللي فات
الوكيل يعود للمركز و قد فاض به الكيل و يذهب لمهندس الصيانه و يقول له هوه فيه مشكلة السيارة بقالها 3 ساعات و نصف لم تتحرك من مكانها داخل الورشه
مهندس الصيانة هوه حضرتك لسه موجود انت كنت فاكر انك خلصت و يدخل ليتحدث مع احد الميكانيكية و الذي يبدأ في فحص السيارة ثم يختفي
زبون يستعد لإستلام سيارته بعد الصيانه ايه ده العربية مخبوطة جوه الورشه فين المسئول
مهندس الصيانة ايوه يا استاذ خير فيه ايه
زبون سيارتي اتخبطت عندكم انا مكنتش جاي بيها مخبوطة و اثر الخبطه لسه جديد بدليل نظافته
و بعدين انتم مش بتسجلوا حالة السيارة وقت دخولها هات لي التقرير اللي بيقول انها مخبوطة
المهندس ايوه انا افتكرت انا شفت الخبطه لما كنت انت داخل بيها و بصوت عالي احنا ما بنخبطش عربيات و لو كانت اتخبطت عندنا كانت تتخبط في احد الرفارف مش الباب ( كلام ساذج )!!!!!!!!

الحلقة السادسة
تكرار لنفس المشاهد من عدة مهندسين مفيش قطع غيار و مشهد للزبائن و قد اشتروا قطع الغيار من المحل امام التوكيل و يقومون بتسليمها للصنايعية امام باب مدخل الورشة لتركيبها اكثر من خمس حالات
الوكيل الرابعة مساءا بعد مضي خمس ساعات و نصف تخرج السيارة و من الكشف الظاهري السيارة عليها شحم من الخارج و الداخل و الأبواب و بالإستفسار من السيد المهندس ايه الشحم و البصمات دي انا شايف انكم بتكيسوا المقعد و الدركسيون اشمعني معملتوش ده في سيارتي و ايه الشحم ده
المهندس اسف هننظف لك السيارة و معلش اصل موضوعك كان بسيط مش محتاج تكييس و علي فكرة البكرة بتاعت الكرسي مش موجودة المرة القادمة بإذن الله و علي فكرة الماكينة بتاعت الشباك طلعت بايظه و احنا غيرناها لك و دي ثمنها 1500 جنيه بس احنا مش هناخد منك حاجه علشان انت في الضمان ( و الله يشكر الراجل كتر خيره )
الوكيل طب نجرب السيارة يا صباح الفل و الله انتظرت و نلت الماكينة الخلفية الثانيه كانت شغاله زي الفل بقدرت قادر باظت حظوظ
المهندس فعلا الماكينة مش شغالة و مداولات مع الكهربائي لا حضرت الماكينة الثانية بايضه مش حضرتك مكنتش و اخد بالك عموما احنا معندناش مكن تاني الصيانة الجاية ان شاء الله نغيرهالك

الأخ الكريم نادر
الأستراحة العلوية مغلقة من شهرين و العمل متوقف و ان شاء هتشوف استراحة اخر جمال الحالية
بالنسبة للدخول للمركز كانوا موقفين السيارات في المدخل لإمتلاء الورشه لدرجة انهم كانوا كل خمس دقايق بيتخنقوا مع بعض و ضع في اعتبارك كم السيارات الذي بيع هذا العام
كما هو موجود بالجدول الموضوع علي الحائط في الإستراحة او كما تسمي يتم فحص الزيت و الفلتر في الخمسة الأاف فقط و لو تكرمت و قرأت كتالوج الصيانة للسيارة يقول المصنع ان الزيت الموضوع من قبل المصنع يستمر ل 15000 الف كيلو و ليس 5000 راجع الكتالوج
مع كامل تقديري لرأيك بخصوص كماليات السيارة الشركة المنتجه و الوكيل مسئولين مسئولية تضامنيه عن كل كماليات السيارة و العناية بها خذ علي سبيل المثال لو حدث اي تغير في بوية السيارة الوكيل مسئول قانونا في حالة استخدام مواد العناية الخاصة به اما لو استخدمت اي مواد لم يشملها كتيب الصيانة فأنت المسئول و لبس لك الحق في الرجوع عليهم
انا لم اقل اني اريد تغيير التيل و لكن سيادتك التبس عليك الأمر زبائن كانوا منتظرين تغيير التيل و ليس انا و لكن مع قيادت الميكانيكية السيارات داخل الورشه بالطريقة الأمريكاني اعتقد ان المرة القادمة هغير تيل
الأمر الأهم هل سمعت صديقي بحق المستهلك و حماية المستهلك بغض النظر عن المعرفة