لأ ما حضرتك ما شفتش الموقف على طبيعته ولما يشد البطاقة من إيديك بصورة غير لائقة بتبقى مش كويسة فى حقك تانى حاجة لما تسأله تقوله هو قانونى إن حضرتك تفتشنى يقولك آه آه إزاى يا أفندم يقولى هو إنت عليك حصانة ولا على راسك ريشة ؟ دا أسلوب شرطى متعلم ولا أسلوب إيه بالظبط ؟ غير بقى الناس والتعليقات السخيفة اللى يقولك الشعب المصرى ما بيجيش غير بالكرباج واللى يقولك احنا ملناش فى الطيب وواحد قام متغاظ منى وقالى الناس بيعاملوك بالأدب والذوق إنت لو قبل الثورة مكنتش تقدر تعمل كدا وأنا الحمد لله فى أى ظروف أنا عند مبدئى مفيش مصلحة دخلت أخلص ورق برغم صغر سنى وقابلت مشكلة إلا وعملت محضر وطالبت بحقى وأخدته كامل بدون وساطة وكلام فارغ من اللى ناس كتير مسلمة عقولها ليه
تانى حاجة بقى حضرتك أخدت عنى فكرة غلط إنى ضد الشرطة لا انا ضد الجهل
أنا حاجة مدايقانى قوى إنى مش لاقى الشرطة قايمة بدورها لا قبل الثورة ولا بعد الثورة أنا كل يوم والتانى بشوف مواقف من ناس بجد تخليك من إنسان طيب لحاجة تانية خالص لأنى أنا مبحبش الظلم أنا اسمى محمد العادل ولازم أحترم الإسم دا وأحاول إنى أكون جدير بيه ومع ذلك شايف ظلام مش شايف حاجة عدلة فى البلد دى الناس عندها نقص فظيع قوى مش عارفين يكملوه وكل مادة يزيد زيادة
ٌيعنى تفتكر مثلا البنى آدم اللى فتشنى دا فتشنى عشان هو شاكك فيا ؟ والله إستحالة بيبان على شكل الإنسان حتى الناس السلبيين اللى كانوا بيعلقوا قالوا لو مكنتش لكيت معاه مكنش فتشك ؟ شوف يعنى الناس كمان عارفة الحقيقة يلا بقى يعنى جت على الموقف دا
انا مرة كنت راكب قبل كدا وحصل نفس الموقف مع واد صغير بياع جه يركب القطر ومعاه بيبس بيبيعه طفل كدا ميكملش 8 سنين المهم راح واحد من الجماعة إياهم عايز ياخد منه ببلاش ليه ولواحد حبيبه اتعرف عليه فى القطر الطفل البرئ المشرد قاله لا مش هديلك والقطر كان يادوبك هيطلع من المحطة راح مسك الواد كان عايز ينزله بالعافية والواد يصرخ وهو ولا فى دماغه ونزله بالعافية الواد وقع ع الرصيف وأنا بصراحة معرفش إزاى سكتت قام واخد قال مهو العيال بتوع القطر دول حرامية وكذا وكذا
طبعا البنى آدم الدنئ دا فضل يشتم فى الواد بشتايم قذرة وبعد الموقف دا ما حصل انا كنت قاعد ع كرسى وجمبى واحد شاب قاعد والكرسى اللى قدامه فاضى راح البيه المخبر قاله فيه حد هنا يلا قاله آه أخويا قاله فين أخوك قاله جاى طبعا مش من حق حد يحجز فى القطر دا لأنه مش مكيف ومش مرقم راح المخبر شد معاه وضربه وبهدله وكسر أنفه انا كل دا وساكت ومحروق منا لو اتكلمت معاه هيضربنى الكمثرى بقى اللى بيقطع التذاكر جه عشان يقطع من صاحبنا اللى هو صاحب صاحبه راح المخبر قاله دا تبعى راح الكمثرى قال للواد صاحب صاحبه مش مكسوف ما تدفع إنت معكش فلوس قاله بصوت واطى عشان البيه المخبر ما يسمعش مش بعيد كان رماه من القطر لو كان دفعه تمن التذكرة دا غير بقى طول السكة ينكش فى اللى رايح واللى جاى وقال جملة : يعنى لو واحد طلع مطواه دلوقتى كل العربية دى هتنام بالرغم من القطر فيه صراعات بالأسلحة البيضاء وقتها طبعا مبيبقاش فيه مخبرين المهم أنا بعد ما نزلت من القطر قطر الأدغال قلت والله ما انا سايب حق كل واحد اتهانت كرامته رحت مديرية الأمن وبلغت ورقم القطر وإلخ وإلخ وسين وجيم ومحدش عارف شغله ومعرفش بقى عملوا ايه بس حسيت أنى مستريح إلى حد ما
أنا بدافع عنك وعنى وعن كل واحد وواحدة والله لو عليا أنا أستحمل أى حاجة لكن مقبلش على غيرى أقل حاجة لأنى إنساااااااااااااااااااااا ااااااااااااااااااان
وبطلب من ربنا يثبتنى على مبادئى ويقوينى ليوم الدين ويهدى كل عاصى ويعلم كل جاهل
المفضلات