الموضوع: مقارنه بين فورد فوكاس وهيونداى النترا و رينو فلوانس

المشاركة الأصلية كتبت بواسطة sindibad

انا بقى لى فترة أقرأ التقييمات الخاصة بكل الأنواع اللى عندنا ولقيت ان لازم أشارك باللى قراته
اولا علشان نقيم تقييم مطلق يبقى بنضحك على نفسنا لأننا بنسوق السيارات دى فى شوارع مصر الحبيبه وعلشان كده فيه عناصر لازم تؤخذ فى الأعتبار مش موجودة فى التقييمات مثل خلوص السيارة على الأرض ونوع البنزين المستخدم وأيضا عملانية السيارة لأن فى اوروبا كل واحد معاه سيارته الخاصه لكن عندنا بتجيب سيارة عاوزها عائليه وشبابيه ونصف نقل كمان فى نفس الوقت كمان مهم قوى الوكيل عندنا غير عندهم بالطبع , وسعر اعادة البيع أيضا مهم وغير عندهم خالص وعلشان كده لازم نقييم السيارة بالنقاط المهمة عندنا احنا بالأضافة للنقاط اللى عندهم هما وبالتالى النتيجة كالأتى:

نقاط المقارنة
1- الأرتفاع عن الأرض الفلوينس تكسب ثم الفوكس وأخيرا الألنترا
2- البنزين ونوعه الألنترا الوكيل ثم الفلوينس وأخيرا الفوكس لأنها 95 بس
3- الوكيل الفلوينس ثم الفوكس وأخيرا الألنترا
4- أعادة البيع الأنترا ثم الفوكس والفلوينس واحد
5- العملانيه الفلوينس تكسب ثم الفوكس ثم الألنترا وده راجع لشكل الشنطه فتحتها ضيقه
6- الثبات الفوكس ثم الفلوينس ثم الألنترا وده بتجربة السنين اللى فاتت
7- الخامات الفوكس الألنترا ثم الفلوينس
8- الموتور كقوه الفوكس ثم الألنترا ثم الفلوينس
9- استهلاك البنزين الفوكس ثم الألنترا وبعدين الفلوينس قريبه جدا منها
10- الوسع الداخلى الفلوينس ثم الألنترا ثم الفوكس وبتكلم عن ورا وقدام
11 - التقفيل الثلاثه قريبين من بعض لكن تقفيل الفوكس اقل مما كنت اتوقع
12 - الأعتمادية الألنترا خدت نمره واحد فى امريكا ثم الفوكس ثم الفلوينس
13- النعومة فى القيادة والعزل الفوكس ثم الفلوينس ثم الألنترا وبفوارق بسيطه
14- الصاج الفوكس اقوى ثم الفلوينس ثم الالنترا


أرجو منكم الان التفاعل معى وأضافة نقاط أخرى تكون فاتتنى وانا ارد عليكم فيها ومصادرى فى كل اللى قلته مواقع مثل whatcar ,jdpower , topgear وغيرهم وانا شايف ان كل واحد ممكن يأخد عريبيه حسب دماغه يعنى لو بتفكر فى سعر البيع يبقى ألنترا ولو بتحب الشكل الداخلى الفخم يبقى الفوكس ولو عاوز اوبشنز بسعر معقول يبقى الفلوينس وكلهم عربيات حلوة و معمول فيها شغل جميل

مضطرر اتركم للصلاه

مقارنة ممتازة .. ماشاء الله عليك منصف جدا .. ربنا يبارك فيك

بسم الله الرحمن الرحيم

بالنسبة لل فورد فوكاس (وذلك عن تجربتى ) هى من افضل السيارات الموجودة فى السوق المصرى. وهى كانت معايا من ٢٠٠٩ الى ٢٠١٣ مشيت بيها ١٣٠ الف كم السيارة بسم الله ما شاء الله
بالنسبة للثبات رهيب من الممكن ان يكون مثل او افضل من الجيتا
بالنسبة لقطع الغيار. متوفرة داخل و خارج التوكيل و أسعارها مثل باقى السيارات الالماني
بالنسبة للتسارع انا كنت بجرى مع اوكتافيا مثبتين طول الطريق وبعدين الفوكاس طلعت بعد ال ١٨٠
بالنسبة للعفشة هى ناشفة شوية بس دا عادى لانها عفشة رياضية وكمان وانت سايقها هتحس انها بتمتص اي حفرة او نؤرة بشكل ممتاز لدرجت انك ما تحسش بيها
بالنسبة لعزل الصوت. جيد جداً
بالنسبة لارتفاعها عن الارض. مثل ال أوكتافيا
بالنسبة للوكيل محترم جداً و نظيف
بالنسبة لسعر اعادة البيع. انا بيعتها ب٩٠ الف و هى ماشية ١٣٠ الف كم. يعنى سعر اعادة البيع جيد جدا

العربية دى متتقارنش الا ب اوكتافيا و جيتا و تتفوق عليهم فى بعض الاشياء و ذلك عن تجربة

أسف على الإطالة