السلام عليكم ورحمة الله وبركاته

من فترة كنت في شارع المرغني مع واحد زميلي معاه بومة CVT وقالي تعالى نطلع على المحور نجرب العربيتين مع بعض

وانا طبعا لاني بحب دايما موضوع شد المكن فصعب اني اقول لحد لاء

قلتله ماشي وطلعنا المشكلة كان لازم عربية يكون راكب فيها 2 غير السواق وعربية راكب فيها واحد غير السواق !

في المرة اللى كان معايا واحد وهو راكب معاه 2 فضلت طالع منه لحد 165-170 تقريبا بعدها طلع بفرق بسيط حوالي عربية ونص - عربيتين وده لسبب ان العربية عندي فعلا بتموت جامد بعد ال 165-170 !

قالي نبدل الحمولة وانا الوزن اثر معايا !

لما عملنا العكس طلع مني على كافة السرعات وبفرق كبيييير !

قالي شفت انو الوزن كان ماثر معايا ! قلتله لاء انت الوزن ماثرش معاك بس لما جت حمولة عندي على ماتور 1300 اثرت جامد معايا !

فعربيتي انا اللى ادائها قل انما انت ادائك زي ماهو ! قالي لاء تاثير الوزن عندي زي عندك ! قلتله ازاي وانا 1300 وانت 1600 ؟ ؟ ومعروف ان الماتور ال 1300 سحبه بيضعف مع الوزن عن الماتور ال 1600 ! !

وهنا حصل لبس في الجزئية دي !

وانا بصراحة طول عمري بسمع ان العربيات اللى ماتورها 1300 بتبقى اكثر تاثرا بالوزن عن العربيات ال 1600 ! بس مش لاقيلها سبب او تفسير منطقي ! يعني مثلا عشان الماتور صغير او ضعيف ؟ ماهو مناسب مع وزن العربية !

من جانب اخر وزن العربية ككل اللى بيبقى نازل فيها ماتور 1300 بيبقى اخف من وزن العربية اللى فيها ماتور 1600 ! ؟ << طبعا مش شرط بس بتكلم غالبا !

فاللى عايز افهمه الحمولة او الوزن بيعتمد في تاثيره على التسارع على السعة اللترية للماتور ؟ ؟

بمعنى الماتور ال1000 يتاثر عن الماتور ال 1100 ! والماتور ا ل1300 يتاثر عن ال 1600 ؟ وكذلك كل مالسعة اللترية للماتور تبقى اعلى كل ماكان تاثره بالوزن اقل ؟ ؟ ؟

هل ده صحيح ؟ ولا الموضوع بيعتمد اكتر على ال Horse power والعزم اللى بيطلعها كل ماتور مقارنة بوزن العربية Net result ؟ ماهو ممكن ماتور 1300 بيطلع Horse power اعلى من ماتور 1600 !

ام بتعتمد على وزن العربية ككل ؟؟ ماهو العربية اللى نازلة بماتور 1300 على وزن وليكن طن ! لو هتقارنها بعربية نازلة بماتور 1600 على وزن طن و 200 كيلو ! ممكن تكون المحصلة في الاخير متساوية ؟

فلو زودت شخص "70 كيلو في المتوسط زيادة" هل التاثر هنا هيبقى زي هنا ؟

وايه اللى يخلي مثلا عربية 4*4 ماتورها كبير وليكن 3700 او 4200 ! التسارع بتاعها يفضل ثابت ومايقلش حتى ولو Full loaded ! ؟

مش المفروض الوزن ده حمل زيادة على الماتور حتى ولو الماتور قوي وبيقدر يطلع اقصى قوته مع الحمل المفروض مع عدم وجود حمل يطلع نتيجة احسن ؟ ؟

واخر حاجة : استفسار بسيط هل فيه حل للتغلب على موضوع ضعف التسارع مع وجود حمولة ؟ يعني مثلا عندي العربية بحسها بتتاثر بالوزن جامد فهل فيه حلول لتفادي الموضوع ده ؟