الموضوع: جين-2 ولا سانديرو استيب واي

المشاركة الأصلية كتبت بواسطة dawns_mist

قطع غيار الجين تو مش عملة نادرة ولا حاجة دلوقتي .. الحمد لله بقت متوفرة و العربية كمان نفسها انتشرت كتير عن زمان .. عندنا في طنطا فيه محلات فيها قطع الغيار الخارجية دي كتير و طبعا بأسعار أحسن من التوكيل كمان ، و اكتشفت إن قطع غيارها الميكانيكية تقريبا نسخة طبق الأصل من عربيتي البومة و دي حاجة مريحة جدا ... و بالنسبة لاستهلاك البنزين بتاعها مش عالي زي ماحضرتك متخيل الناس اللي معاها البروتون بيقولولي استهلاك عادي جدا زي أي عربية 1600 طول مانت مش بتحرق على العربية ..
السانديرو محترمة جدا و أنا أحترم حضرتك إنك جيبت مقارنة متزنه بين عربيتين محترمين .. السانديرو راحة داخلية أفضل نسبيا من ناحية إن العفشة أطرى شوية من الجين تو طبعا مش بفارق كبير ..
أعتقد أنا لو مكان حضرتك هختار الجين تو ..
بالتوفيق للجميع ..

اكون شاكر جدا لحضرتك لو تعمل قائمة بقطع الغيار المتطابقة مع لانسر بوما

( على حد علمى هما : الردياتير و فلتر الزيت ....بتوع البوما ....+ فلتر بنزين و طلمبة بنزين النوبيرا و تيل فرامل امامى بتاع فيات بترا )

لو فى قطع تانية متطابقة ياريت تقولنا عليها او تعمل لنا موضوع بيها فى قسم بروتون
شكراا مقدما على اهتمامك .

على فكره انا محتار زيك كده بالظبط و كمان بعد ما قريت موضوعك والcomments احترت اكتر....
مش عارف اختار وكيل ولا عربيه ؟؟؟؟؟؟؟

المشاركة الأصلية كتبت بواسطة mxz911

بصراحه فى حاجه حضرتك نسيتها مهمه جدا لصالح الرينو ( سواء لوجان . سانديرو . ستيب واى ) وهيه العلو جدا عن الارض لدرجه انك تنسى حاجه اسمها تحك ف مطب حتى لو محمل العربيه !


اداء الموتور معروف الجين 2 أعلى .. والثبات برضه بكتير .

لو ركبت دى ودى من جوه هتحس ان الرينو (لوجان . سانديرو . ستيب واى ) .. هتحس نوعا ما انها قديمه شويه

فرامل ال ( لوجان . سانديرو . ستيب واى ) جميله على فكره


الباور بتاع الرينو تقيل !! يعنى لو سقت لانوس او فيرنا هتحس بفرق شاسع مثلا !

القعده برضه بتاعت اللوجان غريبه شويه ودى حاجه تحكم عليها بنفسك لكن انا بكلمك من وجهه تجربتى للرينو اللوجان لمده سنتين .

الانتشار :( لوجان . سانديرو . ستيب واى ) انتشارها بيكتر بسرعه وده دليل على انها عربيه اعتماديه

من وجهه نظرى كتير من الناس نظرتهم للرينو ( لوجان . سانديرو . ستيب واى ) انها شاهين حديثه عشان انتشار . قطع غيار . اعتماديه
الاختيار : انا لو مكانك هبقى فى حيره فظيعه وعشان كده قلتلك رأى ومش هقدرلك اقولك انهى احسن من انهى

ملاحظه انا دايما اتكلم على الرينو بالاقواس دى ( لوجان . سانديرو . ستيب واى ) لانهم تقريبا نفس العربيه بالظبط مع اختلاف الشكل وطبعا بتكلم على المانيوال عشان محدش يجى يقولى لا عدد احصنه الاوتوماتيك 110 والمانيوال 90 !!!

السلام عليكم
ما المقصود بان القعدة غريبة؟؟؟هل قاعدتها مريحة؟؟؟
هل عفشة الرينو انعم ام الجين 2

انا كنت هشتري جين تو لمراتي وفعلا حجزتها ورحت عشان استلمها لقيت حتة من بوية الكبوت مقشرة،شفت واحدة تانية فضي في نفس المعرض لقيت حتة جنب الاسبويلر اللي ورا مقشرة
رحت شفت واحدة تانية عند عز العرب في اسكندرية لقيت حتة ورا مقشرة وقايم باب السواق عليه بلاستيك اسود مقشرة
رحت شوفت واحدة حمرا في المصرية لقيت الكبوت فيه نقط حمرا لونها مختلف عن لون العربية
يوم الجمعة اللي فاتت شوفت واحدة عند اباظة اللي في اسبورتنج لقيت فيها نفس المشكلة
وشالوا الكاسيت وبقا فيها كاسيت بلو بنكت و بقت ب 95000

موضوع السانديرو الاوتو في دماغي بس انا بحب المانيوال و كمان وسائل الامان
الجين2 جميلة بس قطع الغيار
السانديرو برده عربية جميلة و احسن في قطع الغيار بس اقل في الامان

استاذ bayantt
عادي ممكن عربيات معيوبة مش معنى كده ان كلها كده
انت بتشوفها و تشوف واحده مفهاش عيب
المهم قطع الغيار ده اللي قالقني بس و مش سعرها و لكن تواجدها
بلية شداد ولا مساعدين مش حستني اسبوعين تلاتة عشان يجوا !!!!!!
لكن لو غاليين شوية بس موجدين يبقى كلام تاني

شكرا لكل الناس اللي ردت

الموضوع محير فعلا يا استاذ ahmed6307
اصل الواحد مش حيشتري عربية كل يوم و انا عاوز حاجة تريحني
ربنا يسهل

المشاركة الأصلية كتبت بواسطة mody21990

موضوع السانديرو الاوتو في دماغي بس انا بحب المانيوال و كمان وسائل الامان
الجين2 جميلة بس قطع الغيار
السانديرو برده عربية جميلة و احسن في قطع الغيار بس اقل في الامان

استاذ bayantt
عادي ممكن عربيات معيوبة مش معنى كده ان كلها كده
انت بتشوفها و تشوف واحده مفهاش عيب
المهم قطع الغيار ده اللي قالقني بس و مش سعرها و لكن تواجدها
بلية شداد ولا مساعدين مش حستني اسبوعين تلاتة عشان يجوا !!!!!!
لكن لو غاليين شوية بس موجدين يبقى كلام تاني

شكرا لكل الناس اللي ردت

بعد اذن حضرتك أنا قارنت بين حاجات كتير جدا وكنت أكتر منك كدة..
علي الأقل انت استقريت علي عربيتين..
أنا كان مقارنة ولا بين 10 عربيات منها مانوال ومنها اوتو.. بالترتيب كدة (لوجان اوتو - سانديرو مانوال - سانديرو اوتو - أفيو مانيوال واوتو - ستيب واي - جين2 اوتو - بيرسونا مانوال - صني اوتو جميع كماليات (اللي فيها abs و ebd) - أكسنت 2012 مانوال - ريو 2012 مانوال - اوبترا مانوال)
طبعا كان فيه حاجات تانية بس كفاية كدة دي كانت أهم حاجة قارنتها.
أول حاجة شيلت الأكسنت والريو لأني حسيت امكانياتهم ضعيفة شوية علي سعرهم واني حاشتري شكل حلو ع الفاضي وحلي اني أجيب الفئة التنية الاوتو ع الأقل من الاتنين.
شيلت الأفيو لأنها مع أخويا والعفشة رخمة وبتزيق والتقفيل أجارك الله سواء برة أو جوة التابلوه نفسه.
الاوبترا لقدم الموديل وعتاقته ومش حاجيب حاجة ب 96 ألف امكانياتها قليلة كدة.
اللوجان استبعدتها طالما قدامي السانديرو وشكلها أحلي بالنسبة لي
شيلت السانديرو المانوال لأن الاوتو تكنولوجيا أعلي وصوت وطي بمراحل و سحب أعلي.
شيلت البيرسونا المانوال طالما عندي جين 2 اوتو

اتبقي 3
صني
جين 2
سانديرو
كله كاملة أوتو..
استبعدت الصني لأكتر من سبب.. الأسعار غالية جدا والعفشة مش عاجباني خالص والعدادات عتيقة ولأن الشكل الجديد حاينزل نص السنة دي.. يعني أجيب عربية ف شهر3 شهر 6 تبقي الشكل القديم!!!

الجين 2 والسانديرو..
مقارنة أكتر من صعبة.. خلي بالك السانديرو مش الستيب واي.. الستيب واي شكلها حلو وفيها abs.. غير كدة السانديرو تكسب من كل ناحية بلا استثناء.

الجين 2 عربية من الآخر.. فيها كل اللي انت عاوزه.. من الابرة للصاروخ وبمبلغ كويس.. بس هل دا فعلا اللي حادفعه فيها؟ فقط؟ أنا رحت وقفت قدامها ازبهليت أعمل ايه؟ وبعدين فكرت مع نفسي.. العربية توكيلها ماشفتش حد شكر فيه فعلا!! غير ان العربية واطية شوية ع الأرض.. يعني العربية دي عاوزة واحد بتاع فسح بعد الضهر.. ماتعوروش لو اتسابت اسبوعين تلاتة ف التوكيل تتصلح عشان مافيش قطع غيار.. ومش بتاعة طرق متنيلة بستين نيلة.. طب أنا واحد ف اسكندرية عندي مواقع ف العجمي والراس السودة والساحل.. هل دي لما أروح موقع وأرجع للعربية ألاقي عربية مريحة عليها ولا فانوس مكسور ولا أي حاجة.. حاعمل ايه؟ برضه أنا فيه أماكن عندي المطب فيها ارتفاعة أكبر من عرضه.. دي مش حاتحك دي حاتخيش ف الاسفلت.. أو ده اللي أنا اعتقدته. غير طبعا الاحساس ان مشاكلها كتير الخ الخ الخ.. وانا أساسا مشاويري ممكن تعدي ال 30 ألف ف السنة ماينفعش معايا حاجة تجيبلي مشاكل.. ولو فيه لازم تروح التوكيل تخلص ف يومها..

رحت بقي للاخت العزيزة السانديرو اللي لسة ماستقرتش عليها.
العربية حلوة جدا من برة ولو اني شايف انهم لو قللو ارتفاع السقف شوية كانت حاتبقي أحلي.. ارتفاعها تقريبا كدة حاجة زي الاوبترا.. ولا حاتأثر ع الثبات جامد ولا حاتحك ف الجبال اللي ف الشوارع. الشنطة ماتشيلش كدة جوة أكتر من 3 جثث مثلا بس مش حاقتل أكتر من 3 ف الطلعة مش مشكلة من جوة فيه حاجات عجبتني وفيه حاجات لأ.. يعني عجبني اني حاوفر 7 ولا 8 تلاف جنيه كانو ممكن يضيعو ف بهرجة التابلوه والأشكال الحلوة.. وضايقني ان الشكل كان ممكن يبقي أحلي من كدة. بس علي الأقل علي الأقل حتلاقي كل حاجة عاوزها.. كمبيوتر رحلات أيوة شكله مش زي مثلا الريو الجديدة بس بيديك كل حاجة انت عاوزها.. فوجات كبيرة و -ان شاء الله- حاركبلها زينون.. فوانيس تقدر تغير زاويتها ودي حاجة كويسة.. طبعا الكماليات العادية الباقية.. 4 سماعات أكتر من ممتازة.. باور مش تقيل بس هو تقيل مقارنة باللانوس القديمة.. أماكن للنضارة وحتي علبة المناديل.. الشنطة بدل ما تفتحها بواير من جوة بتفتح مع السنتر.. يعني من برة افتح السنتر بالريموت واضغط علي طبلة الشنطة تفتح معاك.. اللي ضايقني فقط بعض أماكن الزراير زي زجاج الكهربا والمرايات.. + ان فيه شكل جديد للتابلوه نازل مش عارف هل حاينزلوه ف مصر قبل ما استلم ولا لأ (ربنا يسهل).

يعني الموضوع وما فيه.. البروتون عربية ركيب بيركب لمجرد الاستمتاع بالركوب.. ومستعد يدفع عشانها أي مبلغ.
السانديرو يجيبها مهندس زي حالاتي ركيب بس عاوز عربية قابلة للشحططة والمرمطة ماتقولش لأ..

ولو ع المانيوال السانديرو ستيبترونيك.. تقلبها ستيبترونك وتبقي مانيوال من غير دبرياج كمان.. مافيش راحة أكتر من كدة.. وانا من محبي المانيوال برضه بس السواقة ف وقت الضهر خليتني أكره حاجة اسمها مانيوال..

وبرضه عشان أبقي صريح معاك أنا لسة مش مستقر ع العربية 100%.. يعني قدامي 4 شهور ع الاستلام ودماغي علي كف عفريت.. تظهر حاجة أحسن 5 دقايق أبقي قالب عليها (ستيب واي اوتو مثلا)

و الله كلامك منطقي جدا يا باشمهندس crayvor
مهندسيين بقي ههههههههههههههه بالمناسبة انا مهندس كهرباء
كده بقيت ميال تاني للسانديرو
تعرف لو فيه استب واي فول اوبشنز كنت اخترتها على طووول
انا مش فارقة موضوع المانيوال انا ساكن في برج العرب هههههههههه فاضيه يعني
لو فعلا ناويين على استب واي فول اوبشن و اوتو يبقي تمام جدا (شوفت حضرتك عامل موضوع عند اسود رينو)
بس فعلا الجين2 تشد الواحد عربية احلام فيها كل اللي الواحد عاوزه