الموضوع: لاتشتروا المقصات التركي. المقص فيه بوش قاتل!!!!

من حوالي 6 اسابيع كده يارجالة اشتريت طقم مقصات تركي للأسكورت من يافا وكان ثمنهم حوالي 380 جنيه وركبتهم عند ميكانيكي كنت بتعامل معاه زمان (مش متخصص فورد) وضبطت زوايا مرتين والعربية زي الزفت وفيها عومان ومش عجباني. يوم الجمعة اللي قبل اللي فاتت روحت عند حمدي فورد وعملت حشو علبة دركسيون علشان كان فيها طقة بتبان على الأرض المحببة وعيون القط وركبت صباعين استابليزر وحمدي وصف لي بتاع الزوايا اللي في بنزينة موبيل اللي جنب مدرسة المنهل. روحت ورفعوا العربية على الجهاز ونزل بتاع الزوايا تحتها وخلاني الف الركسيون يمين وشمال على الآخر وبعدين خرج وراح ندهلي واحد (غالباً هو هاني المهدي اللي طارق كاتب عنه في موضوعه) وقالي ان المقصات وحشة جدا والجلب بتاعتها مبوشة برغم انهم جداد ورفضوا رفضاً باتاً يظبطوا لي الزوايا على الوضع ده (احترمت امانتهم جداً) وفعلا مشيت.
تاني يوم روحت بنزينة مصر اللي في ميدان الأسماعيلية (مشهورين جدا بضبط الزوايا لكن بتوع اشتغالات ، يعني لازم يطلع لك شغل في العفشة ولازم تعمله عندهم) وبرضه اكد لي ان جلب المقصات وحشة ، روحت جبت طقم جلب من عند سامي فخري ورجعت تاني ورفعوا العربية علشان يفكوا المقصات لقوا ان الجلب متبرشمة باللحام في المقصات التركي وعلشان تتفور يبقى لازم عند الخراط فقولت لهم نزلوا العربية خلاص مش هعملها وروحت لسامي فخري تاني ارجع طقم الجلب والحمد لله ان الراجل طلع ذوق ومحترم وقبل يرجعهم من غير ولا كلمة.
روحت عند اللي ضبطت عنده الزوايا قبل كده وضبطهالي تاني والحقيقة بقت مش بطالة انما فيه عومان خفيف برضه وهو قال لي ان ده بسبب جلب المقصات برضه ومضطر امشي بيهم شوية واستحملهم لغاية لما ربنا يفرجها واغيرهم.
سبب اللي حصل ده كله هو اني استرخصت وجبت المقصات التركي برغم ان الفرق بينهم وبين الألماني كان 100 جنيه بس وبرضه كان المفروض اركبهم عند متخصص فورد على الأقل كان هيعرف انهم مش كويسين قبل مايركبهم.

المشاركة الأصلية كتبت بواسطة ahmed_ox2002

طب تمام بارك الله فيك انا كنت ناوي المره الجايه بدل ماغير جلب اغير المقصات كلها وكنت ناوي اجيبها تركي

بس كنت عاوز اسئل حضرتك علي حاجه : حشو علبة الدريكسيون او الاسكاتره اتكلف كام بالطلبات والمصنعية ؟

طقم حشو علبة الدركسيون الأيطالي جبته من عند الباسم اللي قدام سيتي ستارز في عمارات رامو بـ 40 جنيه وجبت صباعين استبليزر اسباني من عنده برضه بـ 220 جنيه تقريبا والميكانيكي (حمدي فورد) اخد مصنعية 130 جنيه وشايف انها معقولة لأن فك علبة الدركسيون اخد حوالي ساعتين علشان يخرجها من العربية وزيهم علشان يركبها تاني.