الموضوع: تقرير سمكرة فى مودرن + تركيب call car

صباح الخير ياصقوووووووووور

ازيكم عاملين اية؟؟ يارب تكونوا بخير

امبارح الوالد سافر الى القاهرة عشان يجيب العربية من مودرن ابو رواش قعدت شهر بالظبط .. المهم كلمهم فى الطريق عشان ينضفوها ويغسلوها ولما وصل قالوله تحب تشوفها الاول ولا تحاسب قالهم اشوفها الاول طبعا .. دخل شافها لقى الشنطة مش مظبوطة خالص جابوا الصنايعية وظبطوها وشاف الاسبويلر متخرشم !! اية ياجماعة ده !! فقالوله هنرشه ونظبطهولك تانى بس عايزين العربية يوم كمان ف اتفقوا على انه لما يعمل صيانة ال 15 الف يعملوا الاسبويلر معاه






بعدها قالوله انت ليك عندنا فرش للشنطة !! فرش اية ده .. طبعا هو الوالد مشفش اللى حصل في الشنطة .. فبص قالوله وهما بيفكوا فرش باب الشنطة بوظوه واتعمل مذكرة وهنجبلك غيرها بصراحة حركة حلوة منهم كان ممكن يكتموا عليها ويعملوا نفسهم مش عارفين حاجة .. والاحلى لو مكنوش بوظوا حاجة من الاساس وقالوله فى الصيانة هنعوضك ونغسلك الموتور ببلاش





.................................................. .............

اللى اتغير الاكصدام والفانوس الشمال الخلفي واكتشفت انه مصنوع فى المكسيك اللى كان راكب واللى ركبوه ورشوا الشنطة وسمكروها هى والاكصدام الامامى والرش جميل جداا والشنطة السمكرة فيها حلوة ومش تحس ان كان في حاجة خاااالص والعربية ماشاء الله بتلمع



......................................

نيجى بقى للأختراع call car

انا والوالد بقالنا فترة عايزين نركب انذار فى العربية بسبب السرقات الكتير والحاجات دى فسأل المهندس بتاع الاكسسوارات فقاله فى GPS وتتبع وحاجات كتير كده بكام؟؟ ب 5000 كتير طبعا طب شوف حاحة ارخص فقاله على الاختراع ده وركبه بالفعل ولما وصل التوكيل كان ركب خلاص

ده بيركب فين بالظبط مش عارف وفيه لمبة كده دى بتركب جوا جنب الباب دى بتفضل تنور وطبعا بيكون فى حساس موجود ومجرد فتح باب العربية انا لما بركب العربية وافتح الباب الجهاز يتصل بيك ولما تدور يتصل ولو خبط على العربية او هزتها يتصل على طول وفيه امكانية انك تفصل الكهربة عن الموتور ترن عليه 4 رنات يفصل الكهربة حتى والموتور شغال والعربية ماشية ومش بتدور تانى حتى بالمفتاح الاصلي بتاعها وترن رنه واحدة يشغل الكهربة تانى .. بصراحة جميل جداا

دى صورة اللمبة الى بتفضل تنور


وبيركبله وحدة سنترلوك ب 50 جنيه
وسعر الجهاز 1250 جنيه
وضريبة المبيعات 123.5 جنيه
وخصم خاص 65 جنيه
.........................................

اسعار السمكرة والاصلاح

فك وتركيب 150 جنيه
اعمال سمكرة 450 جنيه
اعمال دهان 1200 جنيه
اعمال سروجى 150 جنيه
اعمل كهرباء 100 جنيه
اعمال زجاج 150 جنيه

الاجمالى 2200 جنيه

..............................

اسعار قطع الغيار

اكصدام خلفى 1750 جنيه
فانوس شمال خلفى 1990 جنيه ( مضاف عليه 30% لأنه مكنش موجود عندهم ولا فى الشركة نفسها وهو سعره الاصلى 1400 جنيه تقريبا)
فى حاجة كده تبع الاكصدام ب 60 جنيه
علامة نيسان 150 جنيه
علامة TIDA 150 جنيه

الاجمالى 4100 جنيه

الاجمالى كله 6300 + 630 ضريبه مبيعات


.................................................. .................

انتهى التقرير واتمنى ان ينال اعجابكم
مع تحياتى