الموضوع: مطلوب تفسير

المشاركة الأصلية كتبت بواسطة mr_megahed

معلش بعد اذنك ممكن تبقي تشرحلى ازاى انظف الكربراتير ده سؤالى الاولانى

اما السؤال التانى هو الصبح لما بدور العربية بينزل من الشكمان نقط سودا لمسافة نص متر تقريبا وبلاقى زى مية او زيت على حرف ديل الشكمان وزى مايكون هباب اسود المهم قولت اشوف دى مية ولا زيت من الملمس لقيتها غالبا مية بس لونها مسود مش عارف ليه معلش هو لو زيت اعرف منين تقلت عليك انا عارف بس ربنا مايحرمنا منك ومن كل واحد مابيبخلش بمعلومة

طالما مية يبقي متقلقش انت تفرح كمان هههههه بالنسبة الهباب زي مقولت نوعية البنزين مش تمام

الزيت هتلاقي زيت لونه بني و العربية تطلع دخان اسود يعني الموتور تعبان
و لما تيجي تنزل السوق مثلا لما يجي التاجر يبص ع العربية غير انه يسمع صوت الموتور بيشوف اذا كان بيرشح زيت في مخرج الشكمان او مخرج المكنة ع الهيدر عشان يحدد حالة الموتور

بالنسبة تنضيف الكربراتير نوع العربية عندك ايه ماروتي ؟؟ و لا غيرها ؟؟
و عامة اللي هيحصل كالآتي و بالنسبة انها اول مرة هقولك الطريقة السهلة

الادوات اللي محتاجها :
فوط - مفتاح لفك المسامير - منظف كربراتير و ديه علبة و طالع منها شاليموه و سعرها من 10-20 جنيه ع حسب النوع - زيت wd-40 و لو مش عايز خلاص بس هيستخدم في تزييت الاجزاء المتحركة

و اللي هتعمله كالآتي :

تفك العمة و تشيلها كلها بالفلتر هتلاقي تحتها الكربراتير
تجيب الفوط و تحطها حوالين الكربراتير و اي حاجة قريبة منه عشان المنظف ده لو نزل ع الصاج او اي جزء ممكن يبهدله ممكن قبل رش المنظف تزيت الاجزاء المتحركة في الكربراتير الخارجيه و ممكن لأ لو مش عايز بس يفضل عشان كده مأكدتش ع الزيت
و بعدين رش المنظف في الكربراتير نفسه بس حاجة بسيطة
و بعدين دور العربية بس ممكن تتأخر في الدوارة شوية ده عادي و بعدها شد سلك او دراع البنزين كأنك بتدوس بنزين جوة العربية لكن من الحوض و رش و انت داس بنزين عشان التنضيف و بعدين سيب البنزين يعني العربية تبقي ع السلانسية و رش تاني و بعدين سيبها دايرة شوية و بعدين اطفي العربية و نضف فلتر الهوا و ركب العمة و ركب فلتر الهوا و اقفل العمة و بعدين دور العربية و افضل ماشي بيها شوية حوالي 10 دقايق كبيرك ربع ساعة عشان المنظف يمشي في الدورة
و بعدها هتشوف العربية عاملة ازاي في السحب و استهلاك البنزين


اما الطريقة الصعبة انك تفك الكربراتير من العربية و تنضفه بالمنظف و الفرشة و نقعة و بلوة سودا هههههه فملناش دعوة بيها دلوقتي

و اي استفسار اتفضل :)