الموضوع: فرش داخلى لأسرانزا 620

تحياتى للجميع
فعلا اللون الفاتح للفرش الأصلى لن يتحمل إستعمال الأولاد ودة فعلا حصل لى و لاحظت تغير اللون و البقع بعد يومين، و بالفعل ذهبت الى شارع دمشق لتركيب فرش مشابه و بالفعل وجدت أنواع كثيرة جلد و قطيفة و... و بعد البحث و التدقيق فى الأسعار قمت بإختيار فرش جلد مطعم بالقطيفة ولونه فاتح مشابه جدا للأصلى و كلفنى بالتركيب و البقشيش 250 جنيه، طبعا أصحاب المحلات الكبيرة قالولى 560 أصل دة جلد يابانى يا باشا ..... المهم الكسوة كانت رائعة وما تفرقهاش عن الأصلى لدرجة إن مهندس التوكيل سألنى إنت ليه غيرت كراسى العربية؟؟؟ دى من موبيكا!!!!..مش متخيل إنها كسوة.... المشكلة الوحيدة إنك تاخد بالك عند فك المساند التى بها الشاشات لأنها محتاجة واحد بيفهم. و ممكن تتغاضى عن تركيب الكسوة للمساند لأن شكلها بيكون مش مضبوط تماما.
المهم بقة إن الكل أشاد بالكسوة و أنه لا يمكن تفريقها عن الفرش الأصلى لكن المشكلة الفعلية أن الجلد بيشع حرارة فظيعة خاصة لما يكون معرض للشمس، ودة بيسبب مشكلة للأولاد بعكس الكسوة القماش التى لا تلسع مثل الجلد. لذلك الأولاد عندى بيتخانقوا مين اللى يقعد على الجزء القطيفة من الكنبة الخلفية لتفادى لسع حرارة الجزء الجلد.
نصيحتى لك إنك تختار كسوة جلد فاتح لأنها شيك جدا جداو هاتحافظ على الكراسى الأصلية التى لا تعوض خاصة للأطفال بس تراعى تكون مساحات القطيفة بها كبيرة للكنبة الخلفية ولو أمكن كلها قطيفة يكون أفضل عن تجربة خاصة وإن الكنبة الخلفية بعيدة جدا عن تأثير التكييف خصوصا بعد أن ألغوا فتحات التكييف الخلفية (غباء من التوكيل طبعا). طبعا السوق مليان أنواع و أشكال فالأفضل تتفرج و تسأل. بس نصيحتى لازم تركب الكسوة طالما فى أولاد. (مكان المحل فى شارع دمشق خلف محطة البنزين، أسطى إسمه علام - فنى ممتاز خاصة فك كابل الشاشة)
ووحشنا الكلام فى المفيد عن العربية ومشاركات الإخوة الأعزاء ونرجع تانى لموضوع مع 620 مش قاتقدر تغمض عنيك (موضوع أخونا العزيز أ/حسام) و ربنا يبارك للجميع
تحياتى
م/ طارق زياد

عندى كلام فى موضوع الجلد قالهولى السروجى ان الجلد الطبيعى لو اتغطى بفرش تانى هايبوز
م / على حسن
اسبيرانزاوى 19
الاسكندرية