تقرير الفحص المجاني

**highspeed** · 15-03-2012 10:49 PM

تحياتي للصقور
موضوع بايت بس معلش ظروف الشغل........
انا كنت كشفت على العربية في الحملة المجانية وكنت عرفت اسعار بعض الحاجات في التوكيل و قولت نكتبها يمكن نفيد الناس بيها:
-تيل امامي: 300 جنيه
-دسك عجل امامي (طنابير): 1000جنيه
- 2 مقص امامي: 1100جنيه
- 2 مساعد امامي: 1600جنيه
- 2 كاوتش مساعدين امامي: 140 جنيه
-طقم سيور: 263جنيه
-علبة دريكسيون: 4510جنيه
-قاعدة محرك امامية: 250جنيه
-مساعدين خلفية: 1050 جنيه
-كاوتش تراب: 400 جنيه
-تيل خلفي: 360 جنيه
-طنابير خلفية: 1000جنيه
-فلتر هواء 135 جنيه

ملحوظة: تقريبا كان في خصم 10% على قطع الغيار خلال فترة الفحص المجاني

**Dr'AhmZZong** · 15-03-2012 11:09 PM

ياااااااااااااه ربنا يكون في العون ..

كتيييييير شوية ..

**highspeed** · 16-03-2012 11:47 AM

المشاركة الأصلية كتبت بواسطة ahmazong

ياااااااااااااه ربنا يكون في العون ..

كتيييييير شوية ..

اه ياشباب الاسعاار فعلا كتيرة جدا بس الغريب ان هما قالولي ان العربية محتاجة الحاجات دي كلها وانا لسه مغير تيل امامي وخلفي فمتأكد انهم جداد وكمان العفشة عندي محتاجة جلب مقصات وطقم بارات والتوكيل مبيغيرش بارات \داخلية لذلك بيغير علبة الدركسيون كلهاااااااااااااااااااااا ..
المهم انا ولا اتهزيت المهندس كلمني قاللي ابتدي اغير الحاجات دي قولتلو لا ابتي قفل اللي انت فكيته...!!!

**mayky** · 16-03-2012 01:05 PM

سؤال بس معلش
هو ازاي حضرتك محتاج تغير الحاجات دي كلها؟
أنا شايف إن عربية حضرتك موديل ٢٠٠٧ يعني المفروض مش قديمة أوي
حضرتك عامل كم كيلومتر ؟

**highspeed** · 16-03-2012 10:27 PM

المشاركة الأصلية كتبت بواسطة mayky

سؤال بس معلش
هو ازاي حضرتك محتاج تغير الحاجات دي كلها؟
أنا شايف إن عربية حضرتك موديل ٢٠٠٧ يعني المفروض مش قديمة أوي
حضرتك عامل كم كيلومتر ؟

انا عربيتي ماشية 127000
بس انا مبشتكيش من حاجة في العربية غير بس تخبيط في العفشة الامامية

**Ahmed.TV** · 16-03-2012 02:48 PM

المشاركة الأصلية كتبت بواسطة highspeed

اه ياشباب الاسعاار فعلا كتيرة جدا بس الغريب ان هما قالولي ان العربية محتاجة الحاجات دي كلها وانا لسه مغير تيل امامي وخلفي فمتأكد انهم جداد وكمان العفشة عندي محتاجة جلب مقصات وطقم بارات والتوكيل مبيغيرش بارات \داخلية لذلك بيغير علبة الدركسيون كلهاااااااااااااااااااااا ..
المهم انا ولا اتهزيت المهندس كلمني قاللي ابتدي اغير الحاجات دي قولتلو لا ابتي قفل اللي انت فكيته...!!!

تسلم على اضافتك فى اسعار قطع الغيار .. وحيتم اضافتها فى موضوع قطع الغيار فى التوكيل اللى موجود فى الفهرس ..
بس الاسعار دى شاملة الضريبة ولالا
-------
تسحملى اقولك وجهة نظرى الشخصية .. موضوع انهم طلبوا انك حتغير تيل فرامل .. ده ممكن عشان الطنابير عاوزة تتغير .. ولو حضرتك لسه مغير تيل على طنابير مش سليمة اكيد التيل اتاثر .. فعشان كدا بيقولولك تغير تيل فرامل .. عشان تبقا ماشى فى الامان ..

وبخصوص المقصات .. التوكيل مش بيركب جلب مقصات .. واغلب المشاكل احنا عارفنها اللى بتيجى فى المقصات من الجلب .. والناس بتغيرها بره .. لكن التوكيل مش بيغيرها .. لانها لازم تتكبس ..
وانا كنت حموت واشترى جلب مقصات اصلية واركبها بره .. قالولى مفيش اصلا جلب مقصات بتنزل حتى لوحدها ونبيعها للعميل ..
ومسكوا المقص وفهمونى .. وشرحولى مكان الجلبة وشوفتها .. قالولى دى لو اتكبست ليمكن حتيجى مظبوطة زى اللى راكبة فى المقص الاصلى كدا قدامك .. لان ليها مقاسات معينة
فصعب تجيبها كدا

------
بخصوص الاعضاء اللى بتقول ان قطع الغيار غالية .. مقارنة بينها وبين الانوس
انا حتكلم الاول بينها وبين ماشى الانوس
الصنى ليها قطع غيار ارخص من كدا وقريبة اوى من الانوس .. وموجود موضوع عنها فى القسم فى الموضوعات المثبتة .. فالللى دخل الموضوع هنا ورمى كلمة .. ياريت يدور الاول .. ويقرا فى القسم عشان ميرميش كلام مرسل .. وحيلاقى قطع غيار خارج التوكيل تايوانى برخص التراب وموضوع مثبت

وحتكلم بقا على قطع غيار صنى فى التوكيل الاصلية منها ليه غالية مع ان العربية تجميع مصرى
العربية تجميع مصرى لكن قطع الغيار يابانى .. واى حاجة لو باظت بعد شرائك للعربية حتى لو مكتوب عليها مصرى .. بتتغير من اليابان بيابانى .. ما عدا الزجاج بس

وحتكلم بقا على العربيات اليابانى والكورى عموما فى نقطة قطع الغيار الاصلية من توكيلاتهم .. بتكون غالية .. اى قطعة غيار اصلية اصلية وبتجيبها من التوكيل لازم تكون غالية .. حتى لو كان لعربية كورى

اتمنى ان الانتقاد يكون بمنطقية شوية .. مش عشان رافعين لواء الدفاع عن عربية .. بندخل ونتكلم

وكمان فى عربية مختلفة عن عربية .. من الناحية السعرية ومن ناحية المنشا .. ومن ناحية حاجات كتير بردوا
فلازم نراعى كل ده

يعنى هو قطعة غيار التوك توك مش ارخص من الانوس والفيرنا واللوجان والادا مثلا .. فهل حجيب توك توك !!!!

تحياتى