الموضوع: شكر واجب لأخي وحبيبي المهندس ايهاب منصور

السلام عليكم ورحمة الله وبركاته

كلنا نعرف المهندس ايهاب منصور وعارفين قد ايه مدي خبرته وعلمه في العربية السيات سواء الأبيزا او الكوردوبا واعتقد في باقي الموديلات بتاعتها
وحبه لفعل الخير ووقوفه جمب الأعضاء هنا في القسم والي بيعتبرهم اخواته
ويمكن الي حضر المقابلة شاف قد ايه هو متعاون وخدوم لأقصي درجة ممكن تتخيلها

والي متابع معانا القسم اعتباراً من شهر 11 تقريبا هيعرف مشاكل عربيتي الي يمكن وصلت زروتها في الأيام الأخيرة لدرجة ان العربية وقفت خالص لمدة ثلاثة اسابيع
قاطعة طرمبة بنزين
البطارية نايمة
الكاوتش ريح وبقي في الأرض
كوم من التراب يتشال بالكوريك

ويمكن اكتر مشكلة خليتني بلف حوالين نفسي وشاركني فيها المهندس ايهاب هي ان العربية تبطل وانا ماشي بيها لوحدها

انا كنت مغير ساعتها ضفيرة الأنجيكشن (بيعتبروها نص ضفيرة الموتور) ومغير اسبراتير
وبالتالي
الشكوك كلها تتجه ناحية ايه ؟؟؟!!! أكيد الأتنين دوول

والميكانيكي بتاعي مصمم انها طرمبة بنزين

انا مش مقتنع

اتصلت بايهاب

بردو مش مقتنع

المهم الميكانيكي فضل يقر لحد لما فعلا الطرمبة قطعت وماتت وعملتلها حفل تأبين
ولكن بفضل الله ثم عزيمتي واصراري واقتناعي ان الطرمبة سليمة فضلت ابحث انا والمهندس ايهاب علي حل لأعادة احياء هذه الطرمبة
المهندس ايهاب جابلي الرسم التفصيلي لضفيرة الكهرباء عموما بتاعة العربية
وخصوصا الرسم التوضيحي التفصيلي لمجموعة التغذية بالبنزين
راجعت الرسومات ووصلت للفيوز والكتاوت بتاع الطرمبة وخلعتهم وكشفت عليهم ولقيتهم بحالة جيدة

ساعتها قررت اشتري طرمبة جديدة
بردو المهندس ايهاب اداني رقم الصفوة وقالي اسأل عندهم

واتصل بيا في نفس اليوم ايهاب اسماعيل windsofchange وقالي عندي طرمبة قديمة خليها معاك احتياطي لو احتاجت تركبها

بس انا بردو كان لسة عندي أمل وكان قالي علي فكرة الأستاذ فادي hellboy من قسم الأوبل ولما نفذتها لقيت فعلا الطرمبة بدأت تشتغل وكانت الفكرة بمثابة اعادة البعث للطرمبة من جديد والحمد لله

في نفس التوقيت دة كدة كنا خلاص قررنا وحددنا ميعاد المقابلة والمهندس ايهاب أصر اصرار شديد اني لازم اجيب عربيتي لدرجة قالي لو انت ماجيتش بيها انا هاجي اخدها من تحت البيت عندك
وكان معايا علي التليفون وكان علي استعداد ان لو العربية وقفت بيا في اي حتة وانا في طريقي للمقابلة انه يجي ويقطرني بعربيته

المهم

بمجرد طبعا ما وصلت مكان المقابلة لقيت حفاوة استقبال من المهندس ايهاب والأستاذ احمد مبارك وها بسم الله وراح المهندس ايهاب مشمر وقالي اكشف الكبوت نشوف في ايه

بمجرد طبعا مافتحت الكبوت وبص فيها بصة
قالي الأسبراتير مقلوب

انا طبعا كنت كل شوية افك واركب فيه وفي القديم الي كنت غيرته بناء علي تركيبة الميكانيكي بتاعي - بصراحة انا لما بفك حاجة مالهاش عدلة في تركيبها برجع اركبها زي مافكتها بالظبط لتلافي حدوث اخطاء
وبالتالي لو الي قبلي مركب غلط انا مع الأسف بمشي علي الخطأ لو مفيش دليل للتركيب زي مؤشر او سهم او مانيوال للتركيب

المهم

قالي فك دة وهاتلي الأسبراتير بتاعك القديم

بالفعل فكيته وجبتله الأسبراتير القديم

ركبت القديم بناء علي الوصفة بتاعة المهندس ايهاب وفكيت الشاكوش من الجديد وركبته في القديم

وسيبت الظبط والربط للمهندس ايهاب

طبعا بيبص في الكوباية بتاعة الأسبراتير لقاها كل الأقطاب بتاعة اسلاك البوجيهات مجنزرة ومحتاجة تنظيف
كحتها بالمفك وخلاها بتلمع زي الألماظ

بيبص في البوابة لقاها مطينة ومعبية بلاوي (الصراحة كنت فاكك العمة بقالي 3 اسابيع وكمان اخر مرة حطيت بنزين كنت فولتها بتاع 4 مرات 80 في عز أزمة البنزين)
طبعا لما نظفها نزلت كلاب ميتة وبلاوي سودا منها

وطلع جرب ورجع وقالي اركب بقي ياباشمهندس وجرب

انا طبعا لثقتي فيه قولتله مش هجرب
لو هي كدة عجباك يبقي هي كدة خلاص 100 100

في النهاية

احب اشكر المهندس ايهاب منصور علي وقفته معايا من يوم الحادث المشؤوم 4-8-2011 لحد يوم الجمعة الي فاتت 16-3-2012 والي طول الوقت دة وهو معايا قلبا وقالبا واتصالاته بيا الي ماتقطعتش والسؤال عن احوالي واحوال العربية والأمداد بالنصايح والمعلومات الفنية

شكرا ليك يا باشمهندس ايهاب منصور

والله المستعان
،
،