مشاركة لبعض اسعار قطع غيار لادا سمارة

**عمرو عقبه** · 01-03-2015 12:48 PM

لا الطبيعي ان الدركسيون سهل خالص .. بسوق بايد واحده وباخد الملفات كلها بايد واحده .. بايدي الشمال.. وبسيب الدركسيون ع السريع عادي خالص..
والفتيس برضه سهل بس الخامس غلس شويه تحس انه ف اخر الدنيا..
تعالي اركبك عربيتي الساعه بخمسه جنيه ههههه

**SHNORY** · 01-03-2015 04:59 PM

المشاركة الأصلية كتبت بواسطة عماد احمد

صباح الخيرات شباب اللادا السمارة
الحقيقة من كلامكم الجميل عن السيارة دة فكرت في انى اشتريها وعرفت ان حاجتها متوفرة فى السوق فى محلات اللادا وملاحظ ان سعر السيارة مناسب للدخول المحدودة وكمان مصاريف تشغيلها معقولة قوى,
قلت اتفرج على السيارة على الطبيعة واحاول اجربها وهنا الحاجة الغريبة فبرغم اني سقت قبل كدة فيات 124 وريتمو والفا روميو وأخيرا من عدة شهور كيا بيكانتو كانت مع ابنى لكن لقيت سواقة السمارة مش سهلة مافيش تحكم جيد فى الدركسيون والفتيس حاسس انه حاجة غريبة هل ده كان عيب فى السيارة اللى جربت فيها خاصة حالتها تعبانة , ولا اللادا السمارة كدة مختلفة شوية عن باقى السيارات.
ارجو التكرم التوضيح واكون شاكر جدا لكم

لو اللي ركبتها مركبلها طاره سبور فمش حتعرف تتحكم فيها
الفتيس نفس نظام الجولف القديم المارشدير بعد الاول مش ورا ولا سوسته لتحت

**عمرو عقبه** · 02-03-2015 11:32 PM

انت كمان سطرين علي الل فوق دوول ويبقا مقال ينزل في اهرام الجمعه يا استاذ.. ههههه
بص يا عمده ..
الاستهلاك دا بيختلف من عربيه للتانيه لانه بيتعلق بحاجات كتير منها زي ما انت عارف الكهربا والكربراتير والتاكيهات وطقم الشمبر وخلافه.. لكن في المتوسط لعربيتي مثلا ١٣٠٠سيسي بتستهلك لتر لكل سبعه كيلو ونص ف المشاوير الداخلي حيث المطبات والحفر وكل فين لما تاخد الغيار الرابع اما الخامس دا مبعرفوش غير ف المشاوير الطويله ع الزراعي وكده.. وفي المشاوير الطويله الاستهلاك بيوصل لتر لكل عشره كيلو .. ودا استهلاك محترم جدا.. هتلاقي الناس الل معاها مازدا ٣٢٣ والل معاها فيات ١٢٨ بيتكلموا برضه في المعدل ده .. وبالنالي ١٥٠٠ ممكن تفرق عن كده شويه وممكن تعوضها ف المشاوير الطويله لان سحب الموتور هيكون اعلي..
السمارا جيل قديم..
اه.. لكن مقارنه بغيرها .. تعتبر شيك جدا.. قارنها كده بالبولونيز وفيات ١٢٨ ولا ١٢٧ ولا ١٣٢ الناس بتفكرها سكودا.. تفتكر الل راكب ١٢٧ الناس بتفتكر انه راكب سكودا او هو يحس انه راكب سكودا.. ابسوليوتلي ع راي اللمبي
دا غير ان موديلات التسعينات حاجه جميله ..
بالنسبه لكون العربيه بتتلكك.. اول ما تشتري اكيد لو صاحبها مهملها هتصرف شويه .. بعد كده خلاص..
هقولك .. انا تقريبا صاحبت الصنايعيه .. لكن عرفت كل حاجه ف العربيه .. وبشتغل بايدي فيها دلوقتي.. من فتره الميكانيكي بيقولي ابقا اعمل لها طقم شمبر عندك ف البيت.. بيهزر لاني بعمل حاجات كتير بنفسي.. ولما العربيه اتظبطت ومابقتش اروح للميكانيكي.. عديت مره عليه .. نزل الواد الصبي يبوس فيه ويقولي انت ما بتقيش من زمان ليه يا شيخ!
لو قدامك عربيه كوبسه اتكل ع الله .. العربيه حلوه بالنسبه لسعرها..
طولت عليك صح.. انت الل بدات

تحت امرك يا كبير

**tat_ooo** · 03-03-2015 03:27 AM

تسلم يا استاذ عمر علي التوضيح الجميل ده
وربنا يباركلك في عربيتك

**عمرو عقبه** · 03-03-2015 11:37 AM

تسلم يا كبير.. وابقا قولي اسمك الاصلي tato

**SHNORY** · 03-03-2015 03:07 PM

المشاركة الأصلية كتبت بواسطة عمرو عقبه

ا لتر لكل سبعه كيلو ونص ف المشاوير الداخلي حيث المطبات والحفر وكل فين لما تاخد الغيار الرابع اما الخامس دا مبعرفوش غير ف المشاوير الطويله ع الزراعي وكده.. وفي المشاوير الطويله الاستهلاك بيوصل لتر لكل عشره كيلو ..

راجع استهلاك عربيتك يا باشا
كده عندك حاجه عاوزه تتظبط
انا العربيه معايا بتعمل في وسط البلد 200 كيلوا في الصفيحه (20لتر)
وفي السفر 260 كيلوا في الصفيحه
والارقام دي تقريبيه
طبعا بعيد عن الزحام الجامد بتكلم عن المشاوير العاديه في اوقات مش زحمه
في الزحمه ممكن تخلص 20 لتر بنزين في 50 كيلوا اصلا
وممكن تكون العربيه عندك مظبوطه بس انت رجلك تقيله

**عمرو عقبه** · 03-03-2015 07:07 PM

المشاركة الأصلية كتبت بواسطة shnory

راجع استهلاك عربيتك يا باشا
كده عندك حاجه عاوزه تتظبط
انا العربيه معايا بتعمل في وسط البلد 200 كيلوا في الصفيحه (20لتر)
وفي السفر 260 كيلوا في الصفيحه
والارقام دي تقريبيه
طبعا بعيد عن الزحام الجامد بتكلم عن المشاوير العاديه في اوقات مش زحمه
في الزحمه ممكن تخلص 20 لتر بنزين في 50 كيلوا اصلا
وممكن تكون العربيه عندك مظبوطه بس انت رجلك تقيله

حبيبي..
رجلي مش تقيله .. لكن عندي مشكله غالبا ف حرق البنزين لاني بشم ريحة دخنه داخله عليه الصالون.. ودا معناه ان البنزين مش بيتحرق حرق كامل.. عندك حد كويس بتاع كربراتير ف اسكندريه .. بس ما تقوليش ع المراكز النصابه الل بتاخد بال ٥٠٠ ج

**عماد احمد** · 03-03-2015 11:54 PM

مساء الخير على شباب السمارا الاعزاء

احب اشكر عمر باشا على تجاوبه فى الرد وتوضيحاته للسمارة
وطبعا اشكر كابتن الفريق ك/ شنورى على اضافته الجميلة بخصوص معدل الاستهلاك للبنزين وقبل كده رده عن
طبيعة السمارا فى اول سؤال عن الفتيس والدركسيون.
عايز اضيف حاجة امبارح لقيت فى النت موقع كان فيه زى مانوال عن السمارة وموديلاتها وكان مركز على المواتير ولقيت حاجة ملفته انه اتكلم على موديلين من 1500 سىسى واحد سنة 1992 وكان فيه شرح لكل مكونات الموتور بالارقام التارك والهورس بور وحاجات تانية الحقيقة متخصصة شوية المهم انه فى الموديل ده طلع استهلاك الموتور للبنزين حاجة مشجعة حدا يعنى قال :
عند سرعة 90 كم/ساعة يكون الاستهلاك 5.7 لتر/100 كم يعنى يبقى المعدل حوالى 350 كم/صفيحة
عند سرعة 120/ساعة يكون الاستهلاك 7.7 لتر/100كم يعنى يبقى المعدل حوالى 260كم/صفيحة
عند urban يعنى المشى وسط البلد زىما بنقول الاستهلاك 8.7 لتر/100 كم المعدل حوالى 230كم/صفيحة
وفى نفس القائمة فى موتور 1500 سىسى سنة 1987 وكانت مواصفاته قريبة للاول وجاء عند معدلات الاستهلاك لم يحدد وقال ما معناه ان المعدل متناسب مع مكونات وخصائص الموتور
وكانت الفروق الواضح بين الاثنين ان وزن العربية موديل1987 كان 945 كج ووزن العربية موديل 1992 كان925 كج.
تانى يوم فتحت نفس الموقع وفى نفس القائمة لقيت بقية مديلات السمارة مواتير 1100 و1300 و1600
لكن برضة بدون تحديد معدل الاستهلاك لكل دول زى 1500 سىسى موديل87 برضة,
وبعدين حبينا نشوف ماركات تانية كانت موجودة فى القائمة وجدنا اوبل الصغيرة مش فيكترا ومش استر (ناسى اسمها ) كان فى سرعة 90كم/ساعة عاملة 500 كيلو/صفيحة مش عارف هل دة مبالغة للالمانى ولا اية لانه لعربية تانى فيات بونتو مدى اقل من كدة بكتير.
ملاحظ ان استهلاك موتور 1500 سنة 92 فى سرعة 120كم/ساعة تقريبا نفس الكلام اللى قاله كابتن شنورى ان المعدل 260 كم/صفيحة ( مع مراعاة فارق الاستهلاك الخفيف بين 1500 و1300

النقطة الهامة اللى عايزين نطلع بيها من الكلام ده موتور السمارة واضح انه ابن حلال قوى لان انا افتكرت كان عندى من كام سنة الفاروميو 146 موتور 1600 انجكشن وكان فى الكتالوج المشى فى سرعة 90 كم/ساعة يستهلك 300كم/صفيحة وفى سرعة 120 كم/ساعة يستهلك 240 كم/صفحية و urban يعمل 200كم/صفيحة
ولما الحساسات حصل فيها مشكلة بعد تغيير الموتور كان خراب بيوت 120 كم/صفيحة ومع تغيير رشاشات الى لانوس يعنى كانت بتضبط عن كدة.
يعنى عايز اقول شهادة حق لنا ولكل الحبايب انه لما يكون الكاربرتير مضبوط والكهرباء مضبوطة ممكن العربية تعمل شغل حلو الحقيقة وتقريبا انا كدة ادعم كابتننا الكبير شنورى ونقول لعمور برضة ظبط ياباشا هاهاها
الحقيقة شىء يسعد اعتقد احنا اطمئنينا والحمد لله.
باقى حاجة ياشباب كلمونى عن كهرباء السمارة الاروبة ده وحكاية الاسبراتير الالكترونى والمشت وكلام يقلق الناس بتقوله واية ميزة الكاربتير الكهرباء ,
وبالمرة بقى اقول اللى فى نفسى من متابعة المنتدى بتاعكم ( تاريخ حلو ) عندى ملاحظة مش عارف هى صح ولا لأ بتقوموا بتغييرات كتيرة فى العربية مواتير عفش كتير اجزاء كتيرة خاصة الاكر ده تقريبا مع المناسبات الرسمية دائما ( باهذر طبعا ) .
اظن كدة الواحد ممكن يدخل موسوعة جيتس من باب سمارة من كتر اللى الواحد عمال يرصه يعنى مش مجرد مقال بالاهرام على رأئ عمور ( هاهاهاها )

والى الملتقى وصباحوعسل انشاء الله

اخوكم / عماد الدين احمد