الموضوع: استفسار سيات قرطبه 2008 هام جدا

المشاركة الأصلية كتبت بواسطة dreamonline

السلام عليكم
اهلا بيكم وباحلي منتدي ياشباب
انا اشتريت قرطبه من شهر كده تقريبا موديل 2008 اتوماتيك بس الحقيقه انا لما كشفت عليها قبل ماشتريها ورفعتها طلع في التقرير ان عاوز يتغير زيت بس وكاوتش وعملت الحاجات دي
المهم انا روحت ظبطت ماشي علي طريق سريع وبجري بالعربيه الاقي الدريكسيون بيترعش كده يمين وشمال زي مايكون مرووش والعربيه مش ثابته كده مع العلم اني جريت بيها وجبت 140 قبل الكلام ده ومكنش في كده والعربيه ثبات وتوازن خرافه ع الطريق مفيش بعد كده اصلا روحت تاني للراجل بتاع الزوايه قالي لا ده مش زوايا مفهاش حاجه قالي دي مشكله ترصيص انا قولتو ماشي شكرا وشكيت فيه الصراحه انو مش بيفهم قولت اسال احلي اعضاء ع المشكله دي وفي حبه استفسارات
انا دلوقتي العربيه عامله 100000 كيلو المفروض اعمل صيانه ال 100000 الف ولا ايه بقي انا مش عارف علشان خبرتي مش كبيره في الصيانه مع العلم ان في حبه حاجات بس ملاحظهم عاوزه تظبيطات
1 - حاسس اني من ساعت لما جبت العربيه السحب بتاعها في الاول مش حلو بس لما بتجري بتجري حلو مش عارف ده علشان العربيه 1400 ولا فيها حاجه عاوز تتظبط
2- الفرامل بتصفر ومش قويه خالص في ناس بتقولي عاوزه تتاخد هوا وانا طبعا مش فاهم حاجه
3- حصلت مرتين معايا حاجه غريبه الاقي اللمبه بتاعت الباور دي نورت والدريكسيون حجر كده ابطل العربيه وادورها تاني ترجع تاني طبيعي وكمان حصلت مرتين معايا العربيه زي ماتكون بتعمل ريستارت ولازم ادخل الكود بتاع الكاسيت
بس هي دي كل مشاكلي غير كده العربيه بسم الله ماشاء الله جميله بصراحه بس انا كنت عاوز استفسر بس عن الموضوع بتاع الصيانه ده واروح فين التوكيل ولا في مكان حلو برا ناس بتفهم ولا مش مهم الصيانه اعمل الحاجات اللي انا بلاحظها بس ولا ايه ياريت حد يفيدني علشان انا اتجننت بصراحه خالص

اولا اهلا بحضرتك في قسم سيات
ومبروك عليك العربية ربنا يباركلك فيها ويديك خيرها ويكفيك شرها

طبعا المهندس ايهاب قال لحضرتك كل ما يمكن ان يقال ولكن لي بعض الأضافات الطفيفة علي كلامه كتعليق وليس تعديل

1- الزوايا لازم حضرتك تعيد عليها مرة تانية عند حد تاني والأحسن يكون عنده جهاز HUNTER الأمريكي
ولو حضرتك من القاهرة ممكن تروح لصفوت جرجس في المنيل عنده الجهاز الهانتر الأمريكي وبيعمل update لل software كل شهرين مما يضمن دائما انه عنده اخر نسخة من برنامج الجهاز ولأضافة اي موديل جديد
انا شخصيا كنت بروحله بعربية 128 موديل 81 وكان عنده مقاساتها والسوفت اتعرف عليها
وبروحله بعربيتي الأبيزا موديل 99 وبردو بيشتغل فيها
ولو هتعمل عنده شغل خلي تامر هو الي يشتغلك فيها
وطبعا بيعمل ترصيص وخليه يشوفلك الجنوط لو فيها عوجة ولا حاجة
وعلي فكرة الكاوتش ليه تأثير ضخم جدا علي ضبط الزوايا
يعني لو العربية عايزة تغير الفرد يبقي الأحتمال الأكبر ان الزوايا تمام والترصيص تمام بس الكاوتش متأكل من اتجاه اكثر من الأتجاه الأخر مما يسبب عدم اتزان اثناء السير

2- بالنسبة للصيانات
حضرتك هتعمل زي المهندس ايهاب ما قال لحضرتك
تغيير كافة الزيوت (زيت محرك - زيت فتيس "سواء عادة او اوتوماتيك" - زيت الباور - زيت الفرامل)
تغيير كافة الفلاتر (فلتر الزيت المحرك - فلتر الهواء - فلتر البنزين - فلتر الغبار او بيسموه فلتر التكييف - فلتر زيت الفتيس في حالة الأوتوماتيك)
تغيير كافة السيور (سير التقسيمة او بيسموه سير الكاتينة - سير الأدارة "دينمو وباور وتكييف" - سير الدينمو في حالة لو الدينمو علي سير لوحده وان كنت اشك لأن فولكس بتعتمد علي سير ادارة واحد لكل الطلمبات)
تغيير البوجيهات والكشف علي اسلاك البوجيهات وتغييرها ان لزم الأمر
تغيير سائل التبريد

Best Practice
التغيير وليس الأضافة بالنسبة للزيوت والسوائل والصيانة دي بيسموها صيانة مستويات
تسجيل كيلومتر التغيير لكل مكون من المكونات السابقة والألتزام بجدول الصيانات زي الكتالوج بمعني ان لو الكيلومتر 100,000 وحضرتك غيرت زيت محرك يبقي تغير الزيت تاني بناء علي توصيات كتالوج الصيانة لو بيقول كل 20,000 يبقي يتغير علي 120,000
وعموما طبعا زيت المحرك بيعتمد ميعاد تغييره علي نوعية الزيت وحالته داخل المحرك من لزوجه ولون ورائحة ولكن باقي الزيوت وسائل التبريد بتتغير بمواعيد ثابتة بحد اقصي سنتين وكيلومتر ثابت

3- زي ماقال المهندس ايهاب ان انشاء الله بعد الصيانات السابقة العربية هتظبط معاك جدا ولو استمر العيب هتبقي بردو غالبا حاجة بسيطة انشاء الله بس حضرتك تعملنا تقرير بعد الصيانات

4- الفرامل بتصفر
الفرامل حاجة من اتنين مالهمش تالت
يا التيل ودة امره سهل
يا الطنابير وبردو انشاء الله امرها سهل
Best Practice
الكشف علي الطنابير وحالة التيل قبل التغيير لأن لو الطنابير حالتها سيئة يبقي هتبوظ التيل الجديد في اقل من 1000 كم
واعتقد انها هتظبط معاك نوعا ما لو فعلا خدت الهوا بتاعها ودة اجراء في غاية السهولة اي ميكانيكي بيعمله في ثانية وبردو لما تغير زيت الفرامل وطبعا انشاء الله هيبقي Dot4 (دة رمز وليس نوع بيرمز لدرجات لزوجة وخصائص معينة للزيت وتقريبا كل عربيات فولكس متوافقة مع هذه الدرجة ابتداء من سنة 97)


5- الدريكسيون
احتمال يكون في اختناق في احد مواسير الزيت بتاعة ضغط زيت الباور
Best Practice
أكشف علي مستوي الزيت
اكشف عند اي عفشجي او ميكانيكي علي المواسير الضغط والخراطيم عموما
اكشف بردو عند الميكانيكي علي لاكور ماسورة ضغط الزيت
وبردو انشاء الله هتظبط معاك لما تغير زيت الباور والأفضل تجيب زيت فولكس ب250 جنيه او تجيب الزيت الأبيض بتاع الباور ماركة جانك Junck (وليس الأحمر بتاع الفتيس الأوتوماتيك) ب55 العلبة الصغيرة "اعتقد 400 مل" وانشاء الله هتكون كافيه جدا
ودي صورة العبوة





6- اعادة التكويد
اعتقد فعلا انها كابلات بطارية ويجب الأسراع في حل هذه المشكلة اولا
وتشحيمها بعد تركيبها علشان ماتملحش

والله المستعان
،
،

انا ممكن اوصفلك ميكانيكي شاطر اوي في امبابة
وفي الميكانيكي بتاعي في الهرم

الأقرب ليك قولي واوصف لحضرتك الورشة

والله المستعان
،
،