بسم الله الرحمن الرحيم و الحمد لله رب العالمين و الصلاة و السلام على أشرف المرسلين سيدنا محمد و على آله و صحبه و سلم.

بقالي في المنتدى هنا حوالي 6 أشهر و من ساعة ما سجلت و انا شايفة الموجة العدائية اللي حاصلة في المنتدى على سواقة الستات.. ممكن يكون لها ما يبررها، بس المشكلة هو ان ده ما هو إلا إنعكاس على اللي بيحصل في الشارع و انتشار نفس الموجة العدائية من قائدي السيارات من الرجال تجاه قائدات السيارات من النساء. و من وقت ما سجلت لحد دلوقتي و انا عايزة أعمل الموضوع ده، انما كنت بأجله لحد ما قلت أتوكل على الله و أنزل بيه لعل و عسى يعمل حاجة.

بتقولوا علينا ما بنعرفش نسوق..
بتقولوا علينا ماعندناش تقدير كويس للأبعاد..
بتقولوا علينا ردود فعلنا بطيئة..
بتقولوا علينا مش بنهتم بعربياتنا من صيانة و خلافه..
بتقولوا علينا ما اتعلمناش السواقة على أصولها..

ممكن يكون كل ده صح.. يبقى الحل دلوقتي ايه؟ بصراحة انا تعبت و زهقت و مليت من الانتقاد الكتير لسواقة الستات من غير ما حد يقدم حل.. بعد إذن الجميع اللي مش عاجبه سواقة الستات يتفضل و يقدم لهم اي حل.. انما انتقاد الأوضاع و التريقة على سواقة الستات باستمرار لمجرد التريقة و قضاء وقت ظريف بأت حاجة مملة و ماسخة

معلش يا جماعة أعذروني لو لهجتي حادة و عارفة انكوا ما اتعودتوش ده مني.. انما زي ما بيقولوا كده فاض الكيل

عايزة بس أقول حاجة لكل اللي مش عاجبه سواقة الستات و بيمشي في الشارع متأفف اوي لو قدامه ست او حصل خطأ من اي ست بيعمل أخطر منه كتير من الرجال.. باقول لهم و باتكلم عن نفسي و عن كتير زيي اننا لا غاويين سواقة و لا عاشقين شوارع المحروسة و لا واقعين في غرام الكلاكسات و بننتشي من صوت صرير العجل على الاسفلت.. كتير مننا نازلين يسوقوا في شوارع القاهرة العامرة مرغمين - و انا منهم طبعا - و السواقة بالنسبة لواحدة زيي ما هو إلا توتر للأعصاب بالتأكيد مش مستمتعة بيه.. انما البديل عن اني اسوق هو اني أتبهدل في المواصلات و الاتوبيسات و التاكسيات.. كله بهدلة في بهدلة و أكرم لي هو اني أروح مشاويري متصانة في عربيتي.. انما للأسف مش بلاقي من الرجال اللي سايقين معايا على نفس الطريق غير تصرفات عدائية في معظم الأحوال

الملفت للنظر بأه هو اننا لو بحثنا عن أصل المسألة هنلاقي ان المتسبب أصلا في ان عدد الستات اللي بيسوقوا بيزيد يوم بعد يوم همه الرجالة نفسهم.. يعني الواحدة لو بتركب وسيلة مواصلات فيها بني آدمين محترمين ما يتحرشوش بيها او لو ركبت مع سواقين تاكسي يخافوا الله أو ركاب ميكروباص ما يخترقوش جسدها بعينيهم و هي نازلة من الميكروباص.. لو لقت كل ده كان كتير جدا من الستات ما إضطروش انهم يسوقوا.. يعني فعلا حاجة تضحك و الله.. الرجالة همه المتسببين في نزول الست تسوق في الشارع و همه برضوا المتأففين من سواقتها

معلش انا طولت عليكوا بس هارجع تاني لأصل الموضوع.. بالله عليكوا يا رجال المنتدى و خارجه اللي متضايق اوي من سواقة الستات يشوفوا لهم حل.. غير كده هاكون سعيدة جدا لو ما شفتش في المنتدى هنا تاني موضوع مفتوح من حد بيشتم في سواقة الستات و باقي الإخوة يدخلوا يصدقوا على كلامه و يحكوا الأهوال اللي بتحصل لهم من سواقة الستات. طبعا ماحدش فوق النقد.. انما اللي يطرح مشكلة زي دي يا ريت يتكرم و يطرح حلول قابلة للتنفيذ او مع احترامي للجميع فليصمت