الموضوع: سواقة ستات.. كفاية بأه.. ارحمونا

سبحان الله انا لسه راجع من بره وعمال أرتب كلام أكتبه لئني كنت ناوي أفتح موضوع مشابه للموضوع ده بس الغريب اني المره دي كنت الضحيه !!

هاقول مقدمه بس كا حل زي ما حضرتك طلبتي في أول الموضوع .. مش هانقول الستات لازم تحب القياده وتتمتع بيها والكلام ده كله لئني راجل أدعي إني طبيعي وموضوع التمتع بالقياده والكلام ده كله مسلوب مني من ايام مارجعت مصر وبقيت أدخل العصاره الصبح أطلع منها آخر اليوم يادوبك فاكر اسمي بالعافيه وبالتالي الحياه فعلاً صعبه كفايه وده انعكس بشكل بشع ومؤلم جداً في كل حاجه من ضمنها الشوارع وسلوكيات الناس اللي في الشارع ...... عاوز أقول ان رصدي لمعظم المشاكل اللي بتحصل من السيدات هو عدم التركيز في السواقه والتوتر الزايد جداً وحاجه تانيه غريبه أوي ألا وهي الترصد والتصيد والتربص وحاجات كده كلها شبه بعض في المعنى اقصد أقول ان الست مجرد ماتشوف اللي في جنبها في السياره المجاوره رجل العفاريت بتشتغل وده طبعاً ينم عن شيوع الأخلاق الغير حميده والعصبيه والسلوك السيء اللي بقى مرض متفشي في شوارع المحروسه أو المخروسه مؤقتاً ( مصر ) ده كله انعكس في رأيي على الهلع اللي بيتملك جزء كبير من السيدات اللي بيسوقوا بمجرد ان يشاء الله ان يجمع بينها وبين رجل بسياره أخرى في شارع ضيق وعلى طول التركيز بيضيع وبيحصل الخطأ .....وطبعاً النقطه التانيه اللي متسببه لده هي الأنماط المحفوظه ووضحها أخي في الله محمود ان الست مابتعرفش تسوق والشاب العربيه دي طالعه ليه في كيس الشيبسي والكلام ده كله.

يعني ملخص النقطه السابقه هي ان احنا مابقيناش طايقين بعض وبنعمل حاجات غريبه لا تحتمل مع ان الفرق كله والله لا يتعدى الثواني على سبيل المثال لما يكون اللي قدامي ست أو راجل سايق على مهله شويه ايه اللي هايجرى لما استنى عليه شويه ! الخساره مش كبيره والله انما للأسف مش ده اللي بيحصل اللي بيحصل دلوقتي ان 90 % من الناس اللي سايقه في شوارع جانبيه كمان والله مجرد مايشوف اللي قدامه أقل من سرعته بي 5 ك/س بيركبه العصبي والكلكسات تشتغل والدنيا تقوم تقف على رجل بكسر الجيم ..المفروض اني لما أعمل كده واللي قدامي تطلع ست بقى وتتوتر ازعل انا واشتم ؟ طب ما هو انا سبب في ده ......الموضوع والله سلوكيات وشوية صبر بس.

معلش هاطول عليكم شويه عاوز أقول بقى موضوعي بالمره .. وأنا راجع اليوم على الدائري ورحله طويله من الهرم الى مدينة نصر دامت حوالي ساعه ونصف وانا ماشي في حالي جداً وانا هادي في سواقتي وملتزم الحمد لله الى حد كبير طلع لي لانسر من تحت الأرض ويصادف ان اللي سايق اعتقد مش سيده هي بنت شابه ممكن تكون في عمر معظمنا يعني المهم عملت في اللي مايتعملش زنقت وعملت حركات غريبه بالأشاره وفي النهاية ختمت بحركه قذره جداً من شباك العربيه وانطلقت ..........هي حاله فرديه اول مره أقابلها اللي فهمته ان دي محاوله اننا نشد مع بعض ونلعب بس تقريباً والله أعلم لئني كنت بارد زياده عن اللزوم أصابني اللي حصل ده ما علينا برضه مش عاوز يكون ده الموضوع اللي عاوزه موضوع هو ان بقى فيه نوع من التحدي كده موجود في بنات كتير يسوقوا دلوقتي ويمكن ده مرجوعه لتكرار النقد الموجه زي ماقلتي يا علا في موضوعك عمل حاله من التعصب وبقى الشاب يشوف البنت سايقه عفاريته تتنطط وطبعاً دلوقتي بقى البنت تشوف الشاب سايق عفاريتها هي كمان تتنطط وفي الآخر يخبطوا في بعض والأهل في البيت يتنطط وكله بيتنطط :embarrassed2:.

مش عارف المداخله دي هاتزعل مين مني بس والله انا شايف ان الموضوع حله بسيط وهو شوية صبر بس معظم الحوادث بتحصل نتيجة ده لا الست نازله من بيتها تخبط في خلق الله ولا الراجل نازل من بيته يتريق على الستات مجرد هدوء وتروي بس شويه والله الدنيا هاتروق جداً و90% من المشاكل اللي بتاواجهنا هاتخف ان شاء الله وهاتتحسن بشكل ملحوظ ان شاء الله .

وآسف على الاطاله يا جماعه وجزاكم الله خير .