الموضوع: الحقيقة الضائعه عن الجنط

الرينجات بتتعمل عند خراط مش اكسسوار
روح لاى ورشة خراطة وقولة عايز اعمل رينجات للجنوط وهوة حيفهم كل حاجة
انا لسة عاملهم امبارح وفى خامتين واحدة عاملة زى البلاستيك كدة بس هما بيقولوا مش بلاستيك وكل الناس عاملاها وخامة تانية المونيوم
المهم الراجل عاملى الخامة اللى زى البلاستيك دى وانا برضة قلتلة يعملى الالومنيوم احطهم فى الشنطة احتياطى لتطلع الخامة دى فستك اهو يبقى اسمى جربت الاتنين

والله كويس انك فتحت الموضوع ده بس انا كان قصدي على الرنج بتاع الفانوس
رنجات الفوانيس هههههه
بس شغال برضو عايز اعمل رنجات الجنوط بس هي ايه فايدتها رنجات الجنوط دي ؟

من غير الرينج دي بيبقي الجنط محمل علي المسامير بس و المفروض يبقي محمل علي البتاع ال ف النص ده كمان

يعني في اي خطورة على السراعات العالية ؟
طب ما الجنط الاصلي مافيهوش رتجات برضو !

بالنسبة للتجنيط ...

لو وزن الجنط الجديد قريب أوي من وزن الجنط القديم يبقى انت في السليم .. ده بالنسبة للعفشة ، و برضه بيأثر نسبيا في العزم ...

لما مقاس الجنط يكون أكبر ده بيزود العزم بتاع العربية مش بيقللها زي ما بعض الناس فاهمة ..

لما البروفايل بتاع الكاوتش يكون قليل يكون الثبات أكبر للعربية .. لكن راحة الركاب هتقل شوية ..

لما البروفايل بيكون قليل أوي الكاوتش بيتأثر أسرع بمطبات و خشونة الأرض و عمره الافتراضي بيقل بسرعة ..

لما الجنط يكون عريض أكتر برضه يزود ثبات العربية ..

لما الجنط يكون كبير أوي فيكون قريب من فجوة الرفرف .. ده بيزود درجة حرارة الكاوتش على السرعات العالية ، و ده بيقلل من عمر الكاوتش الافتراضي بسرعة ..

كل ماكبر مقاس الجنط كل ما قراية العداد بتاعتك تكون أقل من الحقيقي .. و العكس صحيح .. و برضه مقاس البروفايل و مقاس عرض الكاوتش بيأثر في قرائة العداد .. و ده ويب سايت تقدر تحسب منه فرق قراية العداد :
Tire size calculator


* خلاصة الكلام :
لو عايز تزود ثبات العربية ، و كمان تزود عزمها ، و تخلي شكلها أشيك ، و في نفس الوقت تحافظ على الكاوتش بتاعك ن و تحافظ على العفشة بتاعتك .................. يبقى تخليك في المعقول بالنسبة للتجنيط ... مسموحلك تجيب مقاس بوصة أو 2 بوصة زيادة عن الجنط الستوك بتاعك ، لإن أكتر من كده غالبا هيقلل من عمر الكاوتش ... مسموحلك تقلل البروفايل 10 مم أو 15 مم بالكتير .. لإن أزيد من كده برضه مش هتحافظ على عمر الكاوتش ... نصيحتي كمان إنك تحاول تزود العرض بالكتير 20 مم علشان تزود الثبات و مايكونش حمل كبير على الموتور .........

خلاصة الكلام أكتر و أكتر ..... عندك الويب سايت اللي أنا اديته لحضرتك ده ..... اكتب الجنط الستوك بتاع عربيتك ... و دور في المقاسات اللي انت نفسك فيها بحيث مايكونش فرق القراية أكتر من 6% مثلا ... كده كفاية أوي ... هتكسب شكل و ثبات و مش هتخسر لا عفشة ولا موتور ولا راحة ولا عداد ....

بالتوفيق .....

والله ما عارف اقول ايه
يعني حضرتك اوجزت والله
بس اكيد الرقم ستة في المية ده ؟
يعني مش اكتر من كده خالص؟ ؟؟؟