سؤال من واحد عاوز شيروكي و ميعرفش حاجة عن السيارات

**sehes98** · 02-04-2012 07:56 PM

ازيكم يا شباب
معلش أسئلتي حتكون كتيييييرة و غريبة مبدئيا أنا عاوز أشتري عربية جيب كنت بفكر في رانجلر بس بصراحة غيرت الرأي و عاوز أشتري شيروكي
بس المشكلة اني معرفش أي حاجة
أنا عاوزها موديل 1994
مع الاعتبار اني معرفش كام سيلندر أنا سمعت ان فيه 4100 و2500 معرفش ايه الحلو و ايه الوحش المهم عاوز أعرف لو عاوز أجيبها أجيبها منين ؟ عشان خايف جداا ان يتنصب عليا و بالنسبة للضرايب أنا سمعت أرقام فلكية خلتني بفكر مجبش العربية أصلا معلش زي مقلتلكم واحد مش عارف أي حاجة و أول مرة بيجيب عربية

**ALMAGICO** · 02-04-2012 10:32 PM

اولا موضوع حضرتك تجيبها منين انا مقدرش افيد حضرتك
بس شوف فى كونتاكت كارز وما شابة ذلك طب حضرتك هتقول
افرض اتنصب عليها هقول لحضرتك اكشف على العربية فى اى
مركز صيانة محترم وعلى اساسة حضرتك تقرر الشراء من عدمة
ثانيا الشيروكى يا اما 4 سلندر 2500 سى سى او 6 سلندر 4000 سى سى
كأداء اظن الفرق واضح ال 2500 سى سى 130 حصان وال 4000 سى سى
190 حصان
نيجى لنقطتين هامتين ال 4 سلندر اكيد موفرة فى البنزين عن ال6 سلندر
ولكن قطع غيارها اغلى من ال6 سلندر ولكن مش بفارق كبير
ال6 سلندر بتاكل بنزين عن ال4 سلندر ولكن قطع غيار ارخص زى مقلنا ومش بفارق كبير
قطع غيار ال6 سلندر اكثر انتشارا من ال4 سلندر وخلى بالك انا قلت اكثر انتشارا مش معنى
كدة ان قطع غيار ال4 سلندر مش موجودة لأ بالعكس موجودة وانا كان معايا 4 سلندر موديل 1992
ولكن اللى منتشرة اكثر ال6 سلندر
ثالثا الضريبة نفسها لل6 سلندر او ال4 سلندر 1160 جنية قول 1200 جنية
واللة اعلى واعلم فيما قلت

**sehes98** · 03-04-2012 12:31 AM

ألف شكر يا باشا بس كان فيه استفسار هوا الضريبة دي للسنة الواحدة و لا ايه

**sehes98** · 03-04-2012 09:58 PM

معلش يا جماعة محتاج مساعدة ضروري أنا دلوقتي محتار مش عارف أشتري ايه خالص أنا معايا حوالي 50000 و عاوز أجيب عربية كويسة تستحمل و تعيييش و مش لافي حد يديني نصيحة أعمل ايييييييه فكرت في الشيروكي زي مكتبت و مش عارف ليه بفكر كمان في التريوس و الفيتارا أنا عارف ان الفارق بينهم كبييير بس راعوا فرق البنزين أنا مش محتاجها عشان الجري و كدا بس بسافر و هيا دي المشكلة حد ينصحني أنا تايه :(

**sehes98** · 03-04-2012 10:00 PM

يا جماعة أرجوكم ساعدوني الموضوع مهم جدااااا و لو كنت أعرف أصرف نفسي مكنتش أزعجتكم و الله

**ALMAGICO** · 03-04-2012 10:07 PM

انا مقدرش افيد حضرتك غير فى الشيروكى بس بالنسبة للضريبة للسنة الواحدة بس
بالنسبة للبنزين لو هيبقى عائق ممكن تفكر فى ال4 سلندر
واى استفسار انا تحت امر حضرتك

**sehes98** · 03-04-2012 11:00 PM

ألف شكر يا فندم طيب سؤال تاني هوا ممكن أحول ال4 أو ال 6 سيليندر لغاز أطن ان ده أوفر و لا ايه رأيك

**ALMAGICO** · 03-04-2012 11:28 PM

هو ممكن تحولها غاز مفيش مشاكل بس الفكرة فى ندرة محطات الغاز و حضرتك بتشوف محطات
الغاز طوابيرها اد اية بالاضافة ان اسطوانة الغاز بتاخد مساحة من الشنطة
بس دة مش هتبقى مشكلة كبيرة لان الشنطة كبيرة واسمع انة بيقلل من سحب العربية
والله اعلم وانا واحد من الناس مبحبش العب فى العربية بس على فكرة الشيروكى
اصلا برة بينزل بموتور ثالث تربو ديزل 2000 سى سى اسال على الموتور دة
لو لقيتة ممكن تسقطة فى العربية
وعامة ميزة الغاز انة موفر مقارنة بالبنزين بس زى مقلت لحضرتك ال4 سلندر كبنزين موفرة بالنسبة
لل6 سلندر
متوسط استهلاك ال4 سليندر
13.8 ليتر لكل 100 كم جوة البلد
11.8 ليتر لكل 100 كم طريق سريع
واللة اعلى واعلم فيما قلت