بعد تجربه ومعاناه أحببت ان أقدم لكم نصيحتي لعلها تفيد البعض وخاصة ممن يريدون التخلص من سياراتهم القديمة وشراء جديد ... أولا : اللي ربنا فاتح عليه ومعاه ومش هيشتري قسط ومش هيتأثر بسعر الجديده يتوكل على الله ويشتري ... ثانيا اللي ناوي يشتري قسط وبالعافيه هيتكون معاه المقدم وهيفضل تحت أمر الشركه أو البنك والذل اللي مابعده ذل (ذل الدين) لغاية مايخلص القسط ..ده بقى أنصحه وأقول له ... ليه عايز تغير اللي معاك ؟؟ فشخره ؟؟ المدام عاوزه تبقى زي صحباتها أو زي أختها ؟؟ العيال بيزنوا عليك ليل ونهار ؟؟؟ .. أنا لقيت انه طالما السيارة اللي معاك شغاله وبتقضي الغرض وبتوصلك لمشاويرك يبقى خلاص ... حتى لو فيها مشاكل .. عفشه .. ميكانيكا .. الخ ... الجديد برضه ليه مشاكله .. بس مشاكل الجديد عذاب .. أسعار نار .. صيانه نار .. صنايعيه مفتريين .. قطع الغيار يا إما عند التوكيل فقط او اسعارها تساوي ربع او نص ثمن عربيتك القديمه ...؟ الميكروباصات والتك تك والموتوسيكلات والعربجيه مش هيخلوك تبطل سمكره ودهان من تصرفاتهم الغبيه والهمجيه .. المطبات والشوارع المكسره هيخلوها لك زي القديمة بعد سنه على الأكثر ... ضرائب ورسوم مروريه أغلى ... قلق طول النهار والليل لما تبقى اجازة وراكنها والعيال عماله تتنطط عليها وتلعب كورة وتكسر لك مرايا ولا فانوس ... طيب ليه كل ده ؟؟؟؟ ريح دماغك وجيبك ومتسمعش لحد ... خليك عملي وفكر بعقل .... خللي القديمه وصلحها وظبتها .. مهما كلفتك مش هيكون زي الجديد .. نصيحه من أخ محب وربنا يبارك للجميع في سياراتهم