السلام عليكم ورحمة الله وبركاته


ازيكم يا شعب
النهارده جايبلكم موضوع مش جديد على اغلبكم لكن عشان الناس اللي متعرفوش واهو للتذكره لعل وعسى حد يستفاد منه

طبعا الموضوع ده مخصوص لوائل جميل وتوني بسكوته عشان ربنا يباركلهم فعربياتهم الجديده ...


طيب نتكلم عن حاجتين مهمين:
1-ظبطة بسيطه قليل الناس اللي عارفاها
2-طريقة التشغيل الفعليه

الظبطه البسيطه هي في ماسورة عمة الكربيراتير فيه زرار هصوره بكره ان شاء الله
ده بتختار فيه من وضع الشتاء لوضع الصيف او العكس

حد هيسألني ايه الحوار ده هقوله ببساطه شديده اقرا عنوان الموضوع هتفهمني
هههههههههههههههههههه
الماروتي وطقوسها

وظيفة الكلبس ده انه بوابة الهوا اللي داخل الكربيراتير له مسارين
واحد بيجيب من ورا الفانوس وواحد بيجيب من فرن الشكمان
ورا الفانوس في الصيف الهوا درجة حرارته مناسبه للتغيل بينما فرن الشكمان عشان يجيب هوا دافي وسخن لتشغيل العربية بسلاسه في الشتا

فاحنا لازم نظبطه فعربياتنا كلنا ان شاء الله وخصوصا الايام الجايه على summer الصيف


*نيجي للطريقه الفعلية:

عشان مطولش عليكم واحور كتير (منتو عارفيني بحب ارغي)

1 هتفتح العربية (هههههههههههههه)
2 هتحط المفتاح في الكونتاكت وتلف لحد اما اللمض تنور قدامك ومؤشر البنزين يعلى ويثبت
3 تدوس دوسه على دواسة البنزين للاخير وتشيل رجلك بسرعه
4 دور المارش وهتدور من اول مره ان شاء الله


استنى هنا انت وهوا الموضوع لسا مخلصش!!!
ايه ياعم في ايه؟؟؟
في ان انا موضحتش حاجه بخصوص ظروف التشغيل دي ايه؟؟؟

الخطوات اللي فاتت بتتعمل في الصيف
اما في الشتا فلازم نستخدم حاجه اسمها الشفاط....

ممممممممممممممممم
ايه الشفاط ده؟؟ومنين نجيبه ياعم؟؟

الشفاط ده هو زرار موجود على شمال الدركسيون فوق الاربع زراير اللي عالشمال
مدور ولونه اسود وعليه علامة حاجه اقرب ماتكون لحرف زد او برق او شبهها زي منت عايز المهم انك توصلها
هههههههههههههه

ده زرار بيتشد وهتلاقي تحته ستيكر ابيض ومكتوب تحتيه تحذير بالانجليزي المهم يعني هو ده
الزرار ده بيتشد وليه درجات
تكه اتنين تلاته

الشفاط ده بيعمل ايه؟؟؟

ده بيعمل انه بيوارب بوابة الكربيراتير كأنك دايس بنزين

وظيفته ايه بقا؟؟
وظيفته تتجلى في ايام الشتا البارده اللي العربية بتدور وتطفي علطول
هو بيسحب بنزين وهوا زياده كأنك دايس بنزين بالظبط ومعلك عليه


نرجع لموضوعنا
هنشغل العربية ازاي في الشتا؟؟؟

1 هتفتح العربية تاني (هههههههههههههه)
2 هتحط المفتاح في الكونتاكت وتلف لحد اما اللمض تنور قدامك ومؤشر البنزين يعلى ويثبت
3 تدوس دوسه على دواسة البنزين للاخير وتشيل رجلك بسرعه
4 هتشد الشفاط عالدرجه التانيه او الاولى ولا احبذ اطلاقا التالته لانه بتدخل بنزين كتير وممكن ترطب البوجيهات ومتدورش اصلا وعلامة ان البنزبن كتير تلاقي العربية بتعطس ولو نزلت بصيت عالشكمان ممكن تلاقيه بيطلع هباب اسود شويه (حتى لو العربية جديده) لان البنزين نسبته اعلى من الهوا
5 دور المارش وهتدور من اول مره ان شاء الله


ملاحظات
ممكن استخدام طريقة الشفاط في الصيف برضو عادي ساعات الماروتي بتعملها بس كل ده طبيعي

اوعى تنسى الشفاط مشدود وهو ده التحذير المكتوب عشان متدخلش في حوارات انسداد علبة البيئه غير ان استهلاك البنزين هيزيد... الخ

تسخين العربية = لما مؤشر الحراره يطلع لحرف C يبقى العربية تمام التمام ويمكن الانطلاق بها

لو مستعجل قوي استنى نص دقيقه وامشي عالاول والتاني والشفاط على اول درجه لحد اما الحراره تطلع لحرف الC ونزله وكمل طريقك براحتك....


اي استفسار انا تحت امركم واتمنى يكون الموضوع مفيد للجميع


تحياتي