السؤال الذي يطرح نفسه
السيراتو عربيه سيئه الي هذه الدرجه ام غير مناسبه للطرق بتاعتنا ؟!
النهارده الصبح في ناس جيرانا عملوا حادثه بعربيه سيراتو تقريبا 2011 جنط 17
للاسف فقدوا ابنتهم -- عمرها شهور -- البقاء لله وقدر الله وماشاء فعل
الحادثه حصلت كالاتي -- اللي انا فهمته --
كانوا راجعين من القاهره - المنيا الطريق الصحراوي الغربي قريب من العياط
كان سايق بسرعه - بس سرعه كام بالتحديد معرفش -
مطب هواء العربيه اخدته طارت في الهواء واتقلبت كذا مره والناس اللي شافت العربيه قالوا الحمدلله انهم طلعوا سلام منها
بس الحمدلله الاب والام طلعوا سلام مفيش غير بعض الكدمات
السؤال بقي اللي حصل ده بسبب عيب في العربيه ولا في تصميم العفشه -- تقريبا Torsion beam --
ولا في نظام التعليق الخلفي المتصل اساسا ولا في الطرق بتاعتنا ولا في ايه بالظبط ؟؟
انا قريت موضوع هنا عن السيراتو والكورولا الاتنين اتقلبوا وكان السبب تفادي حفره في الطريق علي سرعة 100 كم -- الاتنين نفس التعليق الخلفي المتصل --
لو حد نزل الحرفيين هيتفرج علي كم هائل من العربيات السيراتو بيتسمكر ويتصلح هناك

انا قبل كده حصلي موقف كنت راكب مع اتنين صحابي عربيه صني 2008 بس الشنطه كانت مليانه ع الاخر - كان مغير الجنوط والجنوط الاستوك ف الشنطه - وانا كنت قاعد ورا وكان جنبي في شنط بردو وكنا راجعين من القاهره الصبح بدري واخدنا مطب هواء علي سرعة 180 كم والعربيه طارت في الهواء وتقريبا راسي خبطت في السقف والعربيه نزلت تاني علي الطريق من غير ما تحدف
هل السبب الوزن اللي كان ف العربيه ولا تصميم الصني افضل -- ك ثبات -- من السيراتو ؟!
وهل مطبات الهواء بالخطورة دي فعلا ولا كان في ظروف معينه حصلت كانت السبب في الحادثه ؟
وهل تاثير مطبات الهواء علي العربيات واحد ولا بتختلف من عربيه ل اخري ؟
وهل مصنعي السيارات بيضعوا في الحسبان مطبات الهواء عند تصميم عفشة السيارة ولا لا؟
وايه افضل تصرف تعمله لما تفاجا بمطب هواء يعني تفضل دايس ع الفرامل لحد متعدي من عليه ولا زي المطب العادي تهدي قبليه واول متدخل عليه تشيل رجلك من الفرامل ؟؟
انا الصراحه مكنتش بحط اي اهتمام لموضوع مطبات الهواء بس بعد الحادثه دي المفروض الواحد يخلي باله ولا انتوا ايه رأيكوا ؟!