هو فيها ايه لو نزلت وغسلت عربيتك بنفسك ...تفتكر عيب انك تقف تغسلها بنفسك امام الناس ..ولا انت تفضل ان تغسلها بره فى بنزينة او مركز كاركير وتريح دماغك ولابهدله
ولو غسلتها بايدك افضل ولا بره؟
عرض للطباعة
هو فيها ايه لو نزلت وغسلت عربيتك بنفسك ...تفتكر عيب انك تقف تغسلها بنفسك امام الناس ..ولا انت تفضل ان تغسلها بره فى بنزينة او مركز كاركير وتريح دماغك ولابهدله
ولو غسلتها بايدك افضل ولا بره؟
هو يفضل طبعا انك تغسل العربية بايديك بس المشكلة لنظرة السخيفة بتاعت المجتمع الي عايش في زمن الهمبكة ولازم واحد يفتحلك الباب. وواحد يطلعك. وواحد يركنلط العربية وواحد يرجعك. وكل ده وتلاقيه معاه عربية لادا ولا حتت اوبترا. وعامل نفسو سفير بسلامتو ، فلمن الناس تشوفك بتغسل عربيتك. يحسسوك انك بتقلل من قيمتك ، بس لمن الواحد يغسل عربيتو هو بيطب طب على كل جرح فيها وكل خربوش فيها فالعربية تشعر بحنانك نحيتها وتحس انك انتا بتعتني بيها وبتقى حافظ كل حته فيها بس في ناس سبحان الله كل الي ليها انها تركب العربية وخلاص وتحياتي موضوعك حلو
والله العظيم نفسي اعملها بايدي على الاقل هاتهم بكل حتة صغيرة فيها وكل ما اقول هانزل انظف الاقيني كسلت واقول هانزل وحد يشوفنى وانا بكنس الارضية هيقول مش هاين عليه يدفع فلوس ويوديها لحد يعملهاله مع ان الموضوع مش موضوع فلوس الفكرة كلها انك لما بتعمل حاجتك بتعتني بيها اكتر من اى حد
الجكاية كلها انم ممكن متلاقيش الوقت الى يسمحلش انك تعمل كده بعنى الواحد بيكون عنده شغل و يطلع بيته يستريح و ايام الاجازات بيكون مع عائلته
و مش فاضى ينزل يغسل العربيه هو
او متلاقيش عنده الامكانيات انه يغسل العربيه يعنى معندوش خرطوم قدام بيته مثلا فبيخلى البواب الى يعمل الحكاية دى عنه
او مثلا يقولك دى شغلانة البواب بدل ما انا اعملها اهو البواب يطلعله ب5 او 10 جنيه منها
و سعات العربيه بتبقا عاوزه تترفع فى مغسله علشان تتشحم او تتغسل من تحت صعب تعملها انت
بس الصراحه هى ممتعه انك تغسل العربيه انت عارف عاوز تعمل ايه و فين و تكون على رواقه و مش وراك حاجه تشغلك و تشغل الكاسيت كده و عيييش
و ادى اللنك ازاى تغسل عربيتك (و متنساش زى القوات الخاصه ) على راى اكسل
http://www.nilemotors.net/Nile/224234-a.html
ده مزااااااااااااج
يوم الجمعة بعد الصلاة
بعملها فورمات
تنظيف الكراسي - كنس ارضية - تنظيف الابواب من الداخل والتابلوة
غسله حلوة من الخارج وبعدين انام وعلى المغرب تلميع الزجاج و التبلوة والكاوتش
تحياتي
فعلا ده مزاااج
انا كمان كل جمعة بعد الصلاه انضفها من جوه واعطرها وغسلة محترمة بالخرطوم من بره وانشفها ولمعه للزجاج وبتبقى على سنجة عشرة ...صحيح بيبقى مجهود بس مع الوقت والممارسة بتحس ان الموضوع بقى عادى كلها نص او ساعة الا ربع وتكون تمام ومع الوقت الخبره فى الغسيل بتتحسن مع التجربة
انا يمكن عشان عندى ارض كبيرة فاضيه جنبى فبعمل اللى انا عايزه ...وطبعا عارف ان فى نااس كتير نفسها تغسل عربيتها لكم المكان بيكون مشكلة خصوصا لو كان قدام اللى رايح واللى جاى.
فعلا اكتر حاجة ممكن تشجعك هى المكان المناسب
انا هوايه عندى اغسل عربيتى
و خصوصا الجيتا الله يرحمها بقا
كنت بحنتفها حته حته والله مكان فيها خربوش
يلا نصيب
لاكن دلوقتى الباراتى بتتغسل فى الجراج و البى ام كبيره بتاخد وقت فا الكار كير بيكون حل مثالى
و بعدين مع مشاغل الحياه الحوار ده بقا صعب جدا
لاكن انك تبص الناس هتبصلك ازاى و كلام ده يا راجل فكك ميولعو كلهم
انا كنت بقلع بالشورت و فى نص الشارع و اغسلها
دى احلى حاجة فى الدنيا و احلى مزاج .انا عمل جدول و يوم محدد للموضوع دة بنضف العربية من جوة بالبلاور و بعدين مسحة بفوطة مبلولة لجلد الارضية و الكراسى و غسيل للدواسات ثم تنظيف التابلوة و الجلد بالملمع و بعد كدة اقفل العربية و انفخ الشنطة بالبلاور و امسحا و مسح التراب من على سطح العربية و بعدين غسلة نضيفة بالجردل و الشامبو الخاص و شطفة تمام و تنشيف بفوطة قطن ثم تنشيف تانى بفوطة جافة و تلميع الكاوتش بالفوم و غطى عربيتك و عيش.
هى فعلا الى بيشجع الوقت و الممكان
لو عندك الوقت او عندك المكان خلااص
عييييييييييييش
غير كده برضه بتكون متأذى شوية
معنديش اى مانع
بالعكس بكون سعيد لما بعمل كده
أنا دائما بغسل العربية بنفسى
وفى الشارع وفى أى وقت ليلاً أو نهاراً لما يجيلى مزاجى
بلبس هدوم مخصوصه للعربية علشان ابهدلها براحتى
ومحدش يزعقلى من الحكومة
ههههههههه
:7_6_5v[1]:
وبعدين أنظف الرفارف من تحت بسكينة المعجون والإكصدامات من اى أوساخ لازقه فيها
وعندى بلاور قوى جدا بنظف بيه العربية من جوه ومن برا
وبغسل الماتور بفرشة بالسولار
وبعدين ادخل على العربية من جوا واكنسها كويس جدا بمكنسة البيت الكهربائية
واطلع بالدواسات على الحمام اغسلها كويس جدا بالمياه والصابون
وبعدين اغسل العربية تمام وانشفها
ولو فيه وقت بعمل الكابوت والشنطة بالبولش والشمع
وياسلام لو الغطاء كمان يتغسل فى الغسالة
تبقى فله
وحاطط فى العربية زجاجه صغيرها فيها زيت برافين وحاطط عليه عطر زيت
احط نقاط بسيطه منه على السفنجه وامسح الطابلوه والفيبر اللى حوالين الابواب
أنا مبحبش المغسلة لسببين
أولا : بخاف على العربية بالذات حاجه زى مشط الاسبراتير ممكن تبوظ من المياه
ثانيا : لما بتروح بتتلطع وتستنى دور وتضيع وقت (طيب اغسلها بقى احسن فى الوقت ده)
أو تسيب العربية بمفتاحها وده خطر
بس اضطريت اروح مغسله لأول مرة من ساعة ما اشتريت الشاهين من اسبوعين
لما اكتشفت ان الشاهين فيها مشحمة واحده عند عمود الكردان فروحت المغسلة علشان التشحيم وعلشان تتغسل من تحت بمناسبة انتهاء موسم الأمطار ودخول فصل الصيف
وفضلت واقف على ايده ونزلت تحت العربية بنفسى لما غسلها علشان اشوف التشحيم
وبعد ما خلصها وروحت بيها قعدت بتاع ساعه انظف فيها بنفسى وألمع فيها تانى بالبولش والشمع
بصراحة الغسيل اللى بعمله بنفسى أجدع واحسن مليون مرة من غسيل المغسلة
بس انا اخدت قرار ان الغسيل فى المشحمة كفاية مرة واحده سنويا فى بداية فصل الصيف علشان التشحيم
وباقى السنة أعملها بنفسى
كلام الناس لا بيقدم ولا يأخر
سلطان الطرب قالها من زمان
المشكله كلها في الوقت - المكان - القوه الجسديه
لو بالك رايق وجسمك مرتاح مش مكسل يعني وعندك وقت فاضي و المكان موجود
هتغسلها وميهمكش حد لكن لو عندك ده كله وبتفكر في كلام الناس
مش سبب مقنع بصراحه ارمي الناس ورا ضهرك واعمل اللي يريحك
سمعت مثل بيقول كل علي مزاجك والبس علي مزاج الناس
انا باكل وبلبس وبشرب و ... كله بمزاجي انا
لو غسيل بس بقوم بيها من وقت للتانى
أنما إية الحل لو مستعجل أو عايز أشحم
أكيد غصب عنى على البنزينة عدل
مفيش مانع من ان الواحد يغسل عربيتو بس فعلا اهم عامل المكاااان والامكانيات الشامبوهات والخرطوم وباقيات الكماليات بس اهم حاجه المكان لازم الواحد يكون حاسس بحرية وهو بيغسل العربيه علشان يعملها بضميييييييييير
عايزين بس نعرف المشكلة فين ....
المكان
الناس
الوقت
طبعا التلاته مشاكل كفاية ...بس ايه الامشكلة الاعظم بالنسبة لك
انا بغسل عربيتى كتير رغم انى بعملها فى المحطة والبواب بيغسلها كل يوم بس انا بحب انضف عربيتى بنفسى
و اعتقد المكان مش مشكله لأنك لو نويت هتديها في الشارع عادي
بس المشكلتين الاهم الوقت و الشعب
انا علطول بغسل بنفسي بس العربية الصغيرة
بس بالليل والدنينا فاضية مش احراج قد ما هو علشان الدنيا تبقي فاضية واعرف اغرق الدنيا
:7_6_5v[1]:
ممكن اغسلها حاجة بسيطة بدون ما ابهدل الشارع بالمياه .. يعني لترين مياه والف على الزجاج وخلاص
بعملها كتير لما بكون فاضي، وما فيهاش أي حاجة، بالعكس لازم الواحد يعتني بحاجته بنفسه، وهذا لا يعيب في شيء
انا بحب اعملها بي نفسي و هقول بكل صراحة عشان الناس في المحطة بتستهبل و كل واحد عاوز بقشيش واحد يكون معملش حاجة و يجي في الاخر يعمل انه بينشف ولا اي حاجة عشان ياخد فلوس و لو اديتلهم كل الي في جيبي مش بيعجب فقلت و علي ايه انا بنزل الصبح بدري الجمعة و بعملها و خلاص و محدش ليه حاجة عندي
أنا بقى وانا باوضب الشقة عملت حسابي فالموضوع ده وعملت حنفية فالبلكونة (اول علوي) وخرطوم محترم 20 متر ومسدس ميه من قسم الحدائق في كارفور....
بانزل بالمسدس ارشها فالفجاوي والاعتاب رشه حلوة واسيبها ربع ساعة اكون ظبطت الصالون ورغيت الصابون عالعربية كلها واروح مديها على وضع Full بتاع المسدس واديها يا انسان اديها فالكلتش كمان
بس الكلام ده للحق بيكون اما الجو مدفي والساعة 1 بالليل بس لازم طبعا اكون راشش (أوف) بتاع الناموس
انا عن نفسى مبغسلش العربيات غير بأيدى وكل كام شهر اوديها المغسله علشان اغسل العفشه كويس طبعا
وبصراحه مبيهمنيش كلام الناس
مع ان عندى جراج بس بصلحها عادى ف الشارع وبغسلها برضه ف الشارع
انا شايف ان مفيهاش حاجه ولا تقلل من قيمة الواحد
يوميا العربية بغسلها وانا اللي بغسلها بايدي
بغسلها بأيدي طبعا ...... و نادرا لما بكون مش فاضي قوي بأوديها البنزينة .
إنما الأساس ....... أنا اللي بغسلها .
المجتمعات المتخلفة زينا كدا لو مشيت وراهم ......... لا هاتروح و لا هاتيجي .
بنزل عادي الصبح بدري قوي (لأني بأصحى بدري ) و أغسلها و ألمع الزجاج الأمامي و الخلفي بملمع الزجاج .
و كمان بغسلها بجردل مش بيزيد عن كدا و بتغاظ جدا من الناس اللي ماسكة خرطوم و عمالة تهدر في مياه .
كبر دماغك من الناس .... مش هاتكل عيش لو مشيت ورا كلام و نظرات الناس
أقرأ كدا الحديث ده أخي الكريم
قال الرسول الكريم
لا تسرف في الماء ولو كنت على نهر جار
صدق رسول الله عليه الصلاة و السلام .
و شوف كدا الآيات الكريمة دي اللي بتحس على الأعتدال و عدم الأسراف
{وَلا تُسْرِفُوا إِنَّهُ لا يُحِبُّ الْمُسْرِفِينَ}
{وَلا تُبَذِّرْ تَبْذِيراً * إِنَّ الْمُبَذِّرِينَ كَانُوا إِخْوَانَ الشَّيَاطِينِ وَكَانَ الشَّيْطَانُ لِرَبِّهِ كَفُورا}
الأسراف لما الأنسان يستعمل الشئ بطريقة كان يُمكن تفاديها
يعني 10 لتر مياه في جردل بتكفي لغسيل العربية
لما يستهلك 100 لتر بخرطوم ........... يبقى كدا أسراف طبعا
و ذكر إن الذكرى تنفع المؤمنين ..... تذكرة لك و لي أخي الكريم
انا كنت كل جمعه بنزل اغسلها ومره كنت بغسلها بالليل جاني واحد من الجيران بيقولي دكتور وبيغسل العربية
رحت ضاحك جامد لان انا بدي فعلا البواب عشان يغسلها كل يوم لكن ولا عمرها غسللة البواب عجبتني ومن وانا صغير وابويا معلمنا نعمل كل حاجه بايدينا الله يطول في عمره ويحفظه وكان دايما ياخدني ونغسل العربية انا وهوا سوا
احلى ايام بقا ومن وقتها نشأت بيني وبين العربيات حاجات جميله جدا جدا
حاليا بقالي كذا يوم نفسي اغسلها بس المشكله في الوقت والوزن الزائد اللي بقيت شايله بقت الحاجات دي صعبه عليا والله المستعان
لكن بموضوعك ده هتخليني باذن الله النهارده ليها غسله عندي
تحياتي
أفضل حاجة أنك فعلا تغسل عربيتك بنفسك
انا بغسل عربيتي بأيدي عادي
لاكن من وقت للتاني بوديها بنزيينة على شان ارفعها