الموضوع: الحمد لله صلحت التكييف (كورسا سيدان)

السلام عليكم و رحمة الله


أنا كنت عملت موضوع عن المشكلة اللى عندى فى ملف التكييف اللى هو ده


http://www.nilemotors.net/Nile/281784-a.html


امبارح رحت أنا وواحد صاحبى الحرفيين .. رحت لهانى العايدى لقيت عنده الملف ده ب 300 جنية .. و شكله زيرو .. قلت طيب الأول عاوز أروح لحد عشان أتأكد ان المشكلة من الملف .. فبعتنى لواحد اسمه "عبده المهم" .. كهربائى محترم كده .. قاس الفيوزات كلها و قال لى ان المشكلة من الملف فعلا .. بس هو بطل يشتغل فى التكييف عشان معندوش صنايعيه كفايه و كده .. و مرضيش ياخد فلوس.

سألت الشاطر بتاع قطع الغيار قال لى فى واحد اسمه شريف الخواجه وراه شاطر .. المهم الحرفيين كانت مقفوله قفله سودا و زحمه جدا .. كنت ناوى أروح للكابتن بس من الزحمه معرفتش .. لقيت شريف ده قدامى .. كان شغال فى بى ام دبليو 320 .. فصاحبى قال لى ده شكله كويس و بتاع.

شريف ده أول ما شاف العربية قال للولد اللى عنده قيس الملف الأول .. من غير ما أقل له .. فقلت له اشمعنى؟ .. قال لى العربية دى معروف فيها مشكلة فى ملف التكييف بيبوظ بسرعة هى و الأسترا .. قلت له طيب الملف ده عندك؟ قال لى اه .. طلع لى واحد تحس انه طالع من بق كلب .. كله زيت و السلك بتاعه مقطوع .. قلت له خلاص أنا هجيب لك الملف و انت تشتغل .. طبعا هو اتضايق و قال لى المهم انه يكون شغال و بتاع .. قلت له لأ مش عاوز الملف ده .. هتاخد كام؟ قالى 250 جنية .. بالشحن .. قلت له طيب مش ممكن تسحب الفريون اللى فيها ونحطه تانى؟ .. قال لى لأ معنديش الجهاز اللى بيسحبه .. فقلت له خلاص ماشى.

سألته هتاخد وقت أد ايه تقريبا؟ قالى لى ساعة زمن (فضلت عنده لحد 12:30 بالليل على فكرة) .. وقالى لى أنا ساعه وراجع (جه الساعه 11:00)

الولد بدأ يفك الكمبروسر و أنا رحت لهانى العايدى جبت الملف .. و رجعت لقيت الولد لسه بيفك .. رحنا صلينا و جينا و الولد لسه بيفك .. الصنايعيه الشاطرين شغالين فى عربيات تانية.

الولد فك الكمبروسر و قال لى أنا ماشى و أنا النهاردة أصلا أجازتى .. و سابنى ومشى .. و كل شويه أروح لواحد من العيال يقول لى طيب أخلص اللى فى ايدى و ييجى يعمل أى حاجه و يجرى.

المهم ببص على الفريون اللى عنده جوه لقيته R406 .. فقلت للولد أنا بحط R134a .. قال لى لأ مش عندنا .. لقيت الواد بتاع البى ام دبليو شاري واحده كيلو على حسابه و بيحطولوا منها .. فرحت جبت واحده من عند البرنس فى اخر الحرفيين ب 100 جنية.

المهم فضل الوضع على كده .. شويه الولد ييجى يفك الكلتش .. شويه ييجى يركب الملف الجديد .. لحد ما الساعه جت 10:00 .. بدأ يركب فى الكمبروسر.

كان هيبعت الولد يجيب زيت .. بس الولد كان بياكل .. فقلت له هروح أنا أجيب لك .. الراجل قال لى هتحط فريون ايه؟ قلت له 134 .. قال لى الزيت ب 50 جنيه .. و بتاع ال 406 ب 15 جنية .. نفس العلبة و كل حاجه و الاتنين من أولاد رزق .. مش عارف ده بيشتغلنى ولا ايه .. المهم جبت ام 50 جنية.

الولد قفل و ركب لى بلف الضغط العالى كنت جايبه معايا .. عشان أخر مره كنت قافل مكانه بمسمار .. كبس هوا لقيت بلف الضغط العالى بينفس مع انه جديد و الله و مكتوب عليه صنع فى انجلترا .. رحت جبت واحد تانى من عند الشاطر ب 30 جنيه .. كبسنا هوا و كله تمام.

الساعه كانت 11:00 تقريبا لقيت شريف جه .. قاله هات يابنى الفريون .. فالواد جاب العلبه بتاعتى .. لقيت شريف ده اتحول .. مين اللى قال لك يا باشا تجيب فريون؟ قلت له لقيت اللى عندك 406 وأنا بحط 134 .. قعد يهبل فى الكلام .. و يقول لك احنا على طول بنشتغل بده .. و أحاسبك ازاى دلوقتى .. ويزعق فى العيال اللى عنده .. و انا بكل هدوء أقوله شوف انت مصنعيتك كام و أنا أديهالك .. يقول لى خلاص هاخد الفريون و أخصم تمنه .. قلت له لأ .. يقول لى ازاى انت تجيب الحاجه و عاوز تاخدها؟ ضحكت و قلت لك لأن أنا اللى جايبها .. فأنا اللى هاخدها.

المهم فى الاخر قال لى هاخد 150 جنية .. طلعت 150 جنيه و اديتهم له .. و اديت الواد التبس بتاعه.

الموضوع اتكلف 270 جنيه ملف + 100 جنية فريون + 50 جنية زيت + 30 جنية بلف + 150 جنية مصنعية

بس لسه عندى باقى الفريون و باقى الزيت.

اجمالى 600 جنية .. ربنا يعوض عليا.