اقتباس المشاركة الأصلية كتبت بواسطة amr.elsayed مشاهدة المشاركة
بس انت بالطريقة دى مش حتتجوز خااالص
اى انسان فى الدنيا بيكون ليه مميزات وعيوب لكن انت المفروض تبقى عارف نفسك عايز ايه من شريكة حياتك
يعنى حاطط خطوط عريضة تحت بعض البنود اللى ما تقدرش تتنازل عنها وتدور على الخطوط العريضة دى وتبقى عارف الخطوط الرفيعة اللى ممكن تتغاضى عنها
بمعنى ان فى واحد بيدور على واحدة تكون متدينة جدا ودة بيكون خط عريض عنده فبيدور على النقطة دى وبيتغاضى عن بعض الامور الاخرى اللى مش مهمة اوى بالنسباله
.......................
انت مثلا بتدور على واحدة فارعة الجمال خلي دة بند عرييض عندك وخلى فيه بنود ممكن تتغاضى عنها
مثلا زى المستوى الدراسى
المستوى الاجتماعى لاهلها مش لازم يكون عالى
كدة يعنى حط بنود لنفسك ماتقدرش تستغنى عنها زى الجمال والاخلاق وحط بنود ممكن تتغاضى عنها واجتهد وربنا ان شاء الله يوفقك
لكن العروسة الفل اوبشن اللى انت عايزها دى مش موجودة على وجه الارض ... دى حنشوفها فى الجنة ان شاء الله
.......................
عايز اقول حاجة كمان البنت كمان بتحلم بشريك حياتها انه يكون وسيم ودمه خفيف ومتدين ومعاه فلوس كتير وطويل وجسمه رياضى وبمركز اجتماعى عالى واهله مش عارف ايه وايه وايه و و و و
هل دة يتوفر فى شخص واحد ؟ ... حقولهالك بمنتهى الصراحة هل انت شايف نفسك كامل ؟ مافيش حاجة ناقصة ؟
اكيد فيه .. مافيش حد بيشوف عيوبه !!!! يبقى احنا كمان لازم يكون فيه نوع من التواضع .. وزى ما احنا بنشتكى من المغالاه فى طريقة الزواج عند العروسة ... يبقى من باب اولى احنا نبدأ بنفسنا وما نغاليش فى طلباتنا
.......................
لازم تركز على المميزات اللى انت عايزها علشان تشوف المميزات دى .. والعيوب تكون مش حاجة مهمة بالنسبالك علشان انت مضطر انك تغمى عنيك عنها وماتركز فيها (خليك فاكر مافيش انسان كامل) لو ناوى تفضل تركز على عيوب زوجتك حتعيش فى نكد والست لو شافت فى عين زوجها عيوبها حتنكد عليه واى ست ممكن بسهولة تنكد على اى راجل (ان كيدهن عظيم)
ونصيحة منى يا باشا ماتضيعش منك بنت تكون مؤدبة واخلاقها كويسة لمجرد انها مش حلوة زى نانسى عجرم مثلا
........................
خلى بالك الشكل والحلاوة ممكن يروحوا من الست مع الوقت بسبب الجواز والحمل والخلفة زى ما الراجل وسامته بتقل مع الوقت بسبب ضغوط الحياه
ممكن واحدة تكون جميلة وتتجوزها وتكون مهملة فى نفسها وتتقلب شامبنزى عادى يعنى وفى واحدة جمالها مش بيبان غير بعد الجواز
صدقنى والله العظيم الموضوع دة فى حاجات تانية كتيييير اهم منه لازم تخلى بالك منها
.........................
فى حاجة كمان عايز اقولها انت بتدور على واحدة ولا حبت ولا اتخطبت ولا ارتبطت
مع احترامى لرأيك طبعا يا باشا لكن انا شايف انك ماتحاسبش بنى ادم على اللى فات (حط نفسك مكان الانسان دة)
هل انت مش ممكن بنت تعجبك وتخطبها و اثناء الخطوبة تكتشف حاجة مش عاجباك فيها .. طبع فيها مش عاجبك مثلا والخطوبة تتفشكل
هل دة كدة انت انسان مش كويس ؟؟؟ هل لو اتقدمت لبنت تانية بعد الخطوبة دى حترفضك لمجرد انك خطبت قبل كدة ؟؟؟
انا شايف اننا مانحاسبش حد على ماضيه طالما ماضيه مافيهوش شيئ عيب او خارج عن العرف وربنا يا رب يريح قلبك ويسعدك ويرزقك بالزوجة الصالحة اللى تقر عينك ... وربنا يكرمنا جميعا
كلام سليم بس برضه يستحيل تلاقي كل الخطوط العريضه في واحده