الموضوع: مشاعر عابره

المشاركة الأصلية كتبت بواسطة m_18c_m

هي فين السعادة

في الجنة ان شاء الله :)

يوم السبت.. حسيت بحنين جامد لإني أمسك كتاب من الروايات العالمية و أقراها زي زمان.. مش قادرة أبص في كتب.. تمنيت إني أشوف فيلم من كلاسيكيات الأدب العالمي.. مسكت ريموت الدش و قلبت في القنوات.. باجيب قناة mbc2 و انا مش متوقعة ألاقي عليها حاجة كويسة خالص.. انما بابص لقيتها عارضة فيلم Sense & Sensibility للروائية الرقيقة Jane Austin.. الفيلم بطولة كيت ونسلت و هيو جرانت و ممثلة تانية عارفة شكلها انما اسمها غايب عني.. المهم ان الفيلم كان جميييييييييييييل و نااااااااااااعم و رومانسي حالم.. بالرغم من إني مش باميل أوي للأفلام الرومانسية و خصوصا اللي بينتهي بيها الفيلم أو الرواية النهاية ا لسعيدة اللي هي البطل اتجوز البطلة عشان مش باحسها واقعية اوي و شايفة ان الحياة ما بعد الزواج هي البداية و لا يجب ان تكون النهاية. برغم كل ده إلا إني اتشديت أوي للفيلم و تابعته للنهاية. انا كنت شفته من كام سنة و عجبني برضه بس ماكنتش فاكرة أحداثه أوي، انما لما شفته كإني باشوفه لأول مرة و حسيت بمتعة مش قادرة أفهم سببها.. يمكن عشان انا باحب أوي جو الأفلام الكلاسيكية دي؟ يمكن عشان إسلوب Jane Austin الروائي يخليك عايزي تتابع الرواية لآخرها؟ مش عارفة.. بس كل اللي انا عارفاه هو اني اتمنيت حاجة و في لحظتها نولتها.. لسه لحد دلوقتي حاسة بنشوة ان الواحد يتمنى حاجة و يبص و يلاقيها قدامه.. و مش كده و بس، ده كمان الظروف كانت مهيئة لإني أكمل الفيلم لآخره، و الظروف دي كانت استثنائية اليوم ده، يعني لو كان اليوم عادي زي كل يوم كان صعب اني أكمله، انما يومها كل الظروف اتهيئت لإن الحاجة اللي اتمنتها تحصل، و دي ليها فرحة تانية.

طبعا الموضوع أبعد كتير من مجرد فيلم شفته.. أنا طبعا كنت مبسوطة اني باشوفه و بعدها فضلت شوية كتير يغمرني إحساس بالسعادة، انما اللي أثار تأملاتي هو ان سبحان الله.. لما ربنا بيريد بحاجة انها تحصل بييسر لها كل السبل عشان تحصل دون أي تدخل من الإنسان.. طبعا الله أعلى و أجل إني أربط إرادته لحاجة انها تحصل بحتة فيلم لا طلع و لا نزل.. انما هي كانت أمنية تمنيتها و اتحققت و تيسرت لها كل السبل للتحقق على الوجه الأكمل.. و كذا كل حاجة في الدنيا ربنا بيريد لها انها تحصل.. انما لما تحصل بيبقى ليها سعادة تانية و طعم حلو فعلا :k1:

اللي فات ده كله ممكن تعتبروها فضفضة باقولها و على وشي ابتسامة رضا باحبها و هي على وشي و سعادة حسيت بيها لأيام (و لا زالت مش عارفة ليه) و حبيت أشارك الناس معايا فيها و ممكن برضه تعتبروه مجرد تهييييييييييييس لإن فيلم ايه ده اللي يعمل في حد كده؟ بس انا فعلا مش عارفة ليه حسيت بكم السعادة دي و لا زلت حتى هذه اللحظة لما استعيد أحداث الفيلم و خصوصا الأخيرة و السعيدة باحس بسعادة غريبة و بتهون علية عكننات كتيرة يومية بتمر علية.. غريبة انا و مش فهماني

ممكن كمان نعبر عن مشاعرنا بصورة مش لازم بكلام