السلام عليكم و رحمة الله

مش عارف العربية دى مالها .. ده ال 600 جنيه بتوع التكييف لسه مبردوش.

امبارح كنت راجع من القاهرة للزقازيق .. التنك كان فيه 3/4 تقريبا .. قلت أمون عشان البنزين فى الزقازيق زحمه شويه اليومين دول .. مونت من شل اللى على طريق مصر اسماعيليه و كملت لحد مدينة العبور .. اشترينا حاجات من كارفور .. و خدت طريق الزقازيق .. كانت الساعه 10:30 بالليل.

بين الكارتتين لقيت العربية مبتسحبش .. بالعكس كل ما أدوس بنزين الاقيها بتكتم .. و لقيت السرعه بتقل .. اديتها الرابع أدوس بنزين مفيش .. تكتم و تقل سرعتها .. تالت فى تانى فى أول .. وقفت قدام حاجه بتاعة الجيش كده.

حاولت بكل الطرق أدور .. مفيش .. لما تلقط تحس انها متلته كده و تبطل تانى .. طبعا العساكر طلعوا لى و قالوا لى لو محتاج مساعده .. قلت لهم شكرا و بتاع شويه و لقيت المقدم طلع لى .. راجل محترم جدااا .. و جاب لى مياه أنا واللى معايا .. و جاب لى عسكرى من جوه فك ال 4 بوجيهات و نضفهم (مش بقول لكم الجيش و الشعب ايد واحده :-) ) .. و برده المشكلة موجوده .. مش راضيه تلقط و لما تلقط تدوس بنزين كأنك بتدوس هوا .. العسكري بيقول لي دى البوبينه.

المهم كلمت أخويا و وواحد صاحبى .. جم قطرونى بعربية أخويا و حطيت العربية فى الجراج.

دلوقتى أنا شاكك اما فى البنزين انه مغشوش أو البوبينه .. أعرف ازاى؟

أنا كده كده ان شاء الله هنزل كمان شويه أروح أجيب حد من عند الميكانيكي بتاعي.