المنتدي الصراحة كل واحد برأي وده شئ صحي جدا بس المشكلة ان في كتير مش بيحترم رأي التاني
تلاقي واحد جايب عربية كوري راح واحد جايب عربية أوروبي وعمال يقنعه انه انضحك عليه
أو أي حاجة بقي بس كلام كتير
المهم عايزين نولعها بس بأحترام
نشعللها بس معانا طفايات
انا هقول رأيي من الأخر
أعتبر كأنك برة مصر وبتتكلم عن العربيات ... بحاول أشيل عامل الوكيل وعامل المواصفات سواء مصري أو أو
نشوف شريحة معينة مثلا ونشوف منافسيها من كل ماركة مشهورة
انا كجورج !
الأوروبي ... بيتعامل مع الأنسان وحياته أهم حاجة فلازم يبقي في 10 air bag وفرامل abs وطبعا الموتور يبقي كويس بيجري وبيحافظ عالبيئة
بس تيجي تشوف العربية ككل .... معقدة جدا وأعطالها كتيرة ... ده بقي مش رأيي ... ده رأي الناس برة مش عندنا بس ... ده بالنسبة للعربيات التانية
الأمريكي :
بحس مفيش تكنولوجيا
عايز power كبيرة يبقي تزود حجم الموتور
تلاقي المواتير 5000 cc وبتاكل بنزين بالهبل ومصيبة سودة
ومؤخرا خدوا تكنولوجيا من شركات تانية أوروبية ويابانية

الأسيوي :
خلينا في الياباني الأول :
دول كانوا داخلين ينافسوا الأمريكان في بلادهم بالتكنولوجيا بتاعتهم بس كانوا سارقين تصميمات العربيات من أوروبا
أعلي تكنولوجيا وسابقين الدنيا كلها وبيتقدموا أسرع من الكل
أعطال قليلة جداااااااا
أستهلاك قليل للبنزين
مواتير صغيرة بتكنولوجيا كبيرة وقوة كبيرة ... عكس المفهوم الأمريكاني خالص
نظم تعليق متطورة جدا وعربيات ثباتها محترم
عربيات قابلة للتعديل جدا ... بس انا شايف ان التعديلات الأوروبي بتخرج من مواتير الأوروبي أكبر من اللي بيخرجه الياباني
أوعوا حد يفكر ان الياباني هو اللي بيتبع عندنا !
انا قلت برة وأوعوا تنسوا
والكلام برضه علي الياباني قبل تسونامي ... يعني من 2010 تقريبا مستواهم ثبت ومبقاش في تكنولوجيا جديدة

الكوري :
انا معتبره أتأخر شوية بس بعد كدة عمل ثفقة شديدة
الكوري تقريبا هو هيونداي وكيا فقط ... هي شركة واحدة
المواتير ... في مجموعة من الشركات بتعمل مواتير بس الصراحة مش فاكر اسم المجموعة ومن ضمنها كيا وهيونداي وميتسوبيشي
غير أن أول عربية كوري أحنا شوفناها وقلنا حلوة تعتبر الأكسيل وده كانت بموتور اللانسر عيون صفية القديمة
نكمل الصفقة ... مصممين أيطاليين وألمان ... جابوا من الأخر
حطوا كل الأوبشنز المطلوبة
لحد هنا وكويس
غلطوا غلطة كبيرة وأخترعوا ! ... عمل العفشة
أسوأ حاجة في الكوري هو عفشته ويا سلام لو torsion beam
طبعا بعد كل التكنولوجيا اللي في العربيات بتاعتهم ... هما في الغالب واخدين بتاعة الياباني فالعربيات أعطالها قلية وتكاليفها قليلة وطبعا أمان وكويسة
وده مؤخرا في ال 5 سنين اللي فاتت دول .. قبل كدا لأ
يعني من الأخر الكوري ثفقة

يا ريت نتناقش بهدوء في الكلام ... أحنا مش في أي منافسة
أحنا مصريين .. بنصنع أستيكة وفانيلة و .... كفاية كدة
واللي معاه كوري أو أوروبي أو أمريكاني مسيره هيغير اللي معاه ويجيب غيرها
go on بس هاتوا طفايات