الموضوع: موضوع سخن بين الأوروبي والأسيوي والأمريكي

بصراحة موضوع جميل جدا وانا كنت فى الحيرة دي من كام شهر لما كنت بغير عربيتى واللى توصلت اليه ان مشكلتنا مش اوروبي ولا يابانى ولا كوري احنا مشكلتنا اننا في مصر وياريت نحط تحت كلمة مصر الف خط
يعنى اللى يمشى على العالم كله ما يمشيش علينا واحب اوضح

1- الكوري
لو اتكلمنا عليه من ناحية المبيعات على مستوى العالم يبقى لازم نعترف ان من اهم اسباب مبيعات العربيات الكورى انها برة بتتباع ارخص من مثيلتها من الاوروبي والياباني ودي حاجة مفيهاش فصال يعنى برة عمرك ما هتلاقى عربية النترا او سيراتو سعرها قريب وساعات كتير مساوى لعربيات اوروبي او يابانى زى ما بيحصل عندنا في مصر
العربيات دي برة بيعتبروها عربيات اقتصادية سواء في السعر او في تكاليف الصيانة ومع ذلك بيبقى فيها كل الكماليات اللى في الدنيا وده من اهم اسباب الانتشار يعنى مش علشان العربية باعت كتير تبقى بالضرورة احسن وعمر ما العربية ما بتتقاس بكمالياتها لكن بالاداء والاعتمادية والامان والثبات واظن موضوع الامان والثبات مش مظبط مع الكورى خالص ولا ايه؟؟

2- الاوروبي
انا رأى الشخصي انه ماينفعش اقول على عربية فرنساوى او عربية المانى او ايطالي انهم وحشين علشان فى بلدنا بس التوكيل مش عارف يتعامل مع العربية او تكنولوجيا العربية مش نافعة مع ظروف شوارعنا

وعلى سبيل المثال عندنا فتيس الفولكس ال dsg ناجح في كل دول العالم ويعتبر في حد ذاته اختراع عبقرى ومريح جدا للماتور غير انه موفر للبنزين ومش بتحس بالغيارات خالص بس الكلام ده برة مش هنا
لكن هنا فتيس بينقل الغيار في اجزاء من الثانية وانت في النهاية بتمشى عجلتين وتقف وبعدين اربع عجلات وتريح شوية وهو بينقل على لفات ماتور قليلة يعنى في الخطوتين اللى عربية مشيتهم هو على الاقل جاب التاني وفى اجزاء من الثانية على اساس ان توفير زمن النقلة ده ميزة جامدة وهو كدة عمل اللى عليه وزيادة ويادوب العربية هاتبتدى تجرى وتروح انت واقف وهكذا لغاية ما الفتيس يودع وبعدين مصر تبقى البلد الوحيدة اللى اكتشفت ان واحد من احدث انظمة الجيربوكس في العالم فاشل واى كلام وتسمع الشكاوى اللى عارفينها كلنا من الفتيس مش علشان انه فاشل او ان الفتيس الكورى احدث منه لأ ده بسبب انه معمول ببساطة لظروف قيادة مش عندنا ( على فكرة برة لما العربية بتمشي يبقى بنسبة 95% مش هاتقف قبل ماتجيب الرابع وطبعا الكلام ده خيال علمى بالنسبة لينا هنا )

او تلاقى توكيل زى بتاع البيجو مش فاهم العربية ولا عارف يشتغل فيها ونقول العربية هي اللى وحشة علشان فيها حاجة عاوزة تتغير زى اى عربية كورى ( ولا الكوري مفهوش حاجة بتبوظ ) والتوكيل مش عارف وبيجرب فيك


الخلاصة بعد ماوجعت دماغكم ان المشكلة مش العربية كورى ولا اوروبي ولا يابانى المشكلة ايه يمشى في بلدنا وايه ما يمشيش
واعتقد لو التوكيلات اللى في مصر احترمت نفسها اى عربية مهما كانت صناعتها مع الصيانة المظبوطة هاتمشى معاك زي الفل وبدون اى مشاكل لكن الاختلاف هايبقى في متعة القيادة واظن ان الموضوع ده في صالح الاوروبي ومش الالماني وبس لا الفرنساوى والايطالي برضه متعة القيادة فيهم احسن من الكوري 100مرة ( على فكرة انا كان معايا افيو 6 سنين وسافرت بعربيات اصدقائى من اللى معاهم سيراتو والنترا كتير علشان الناس اللى هاتقولك ده بيهاجم وخلاص ومايعرفش حاجة عن الكوري )