الموضوع: بار شداد الشاسيه لفيات 128 أعمله ولا ما اعملوش

المشاركة الأصلية كتبت بواسطة misoalex

البار بيحمى الشاسيه من انه يتفتح او يتشرخ من حتت معينه لضعف اللحامات فى ال 128
وطبعا بيثبت العربيه فى الملفات والمنحنيات الجامده

عيبه حاجتين
1- انه بينشف العربيه بسييييييط وده راجع لان العربيه بقت ماسكه نفسيها والاجهاد والتحميل بيبقى على الجنبين مش جنب واحد
بمعنى انك لما بتاكل حفره بالعجله الشمال المساعد اليمين كمان حياخد جزء من الصدمه لانك موصل المساعدين ببعض فكل واحد بيأثر على التانى مش زى الاول تاخد حفره تلاقى جنب نزل والتانى لا او نزل بسيط وطبعا ده بيخلى اللحامات تتفك لان جنب نزل والتانى ثابت والعربيه على علب صاج زى منت عارف فعشان كده البار مهم جدا وبيحافظ على الشاسيه
وكان فيه صوره متحركه فى موضوع هنا فى المنتدى بتوضح الكلام ده فى موضوع اعتقد اسمه كان (كل شيئ عن الدعامات ) تقريبا

2-لو لا قدر الله العربيه اتخبطت من اليمين فى حادثه جامده الجنب الشمال حيتعوج او حياخد جزء من الصدمه هو كمان ودى مشكله ممكن تتلافاها بتركيب بار من نوع معين تقريبا من الالمونيوم وده بيتكسر فى حاله حدوث حوادث جامده لادر الله
انا عملت البار ده فى عربيتى القديمه من ماسوره خفيفه جدا شببه الصاج بس حديد تقريبا كان تخانه 4مم وانا غصب عنى عملته تفصيل لانى دوورت كتييير هنا فى اسكندريه وملقتش منه جاهز على مقاس عربيتى عشان يكون من الماده اللى بتتكسر دى فتوكلت على الله وعملته وخلاص

على فكره 90% من اللى حيقولوك متعملهوش ده حيكسر الشاسيه العفشجيه والسمكريه وده لان اكل عيشهم من ال 128 وعيوبها اللى كل شويه عندهم فلما تعمل البار المشاكل حتقل شويه

وعلى فكره لو الشاسيه عندك مش مظبوت او محتاج لحامات او مفتوح او مقاساته مش مظبوطه لازم تظبطه الاول وبعدين تظبط زوايا عند واحد نضيف عشان يتأكد ان العربيه تمام وسليمه وبعد كده تعمل البار على نضافه عشان تحافظ على اللى انت عملته

ولو تقدر تعمل البار اللى من تحت اللى بيمسك المقصت ببعض كده انت حتحافظ على الركب الاماميه كمان وده مهم جدااااا بس محتاج واحد فاهم يعمله عشان حترفع العربيه من الجنبين وتفك مسمار المقص عشان تثبته فيه من الجنبين
لو انت شفت صور عربيتى الله يرحمها اكيد شفت صوره الحوض والبار اللى كنت عامله

ميسو باشا الف الف شكر
شرح وافي وكافي وانا اللي خلاني افكر في البار اني شوفته في صور عربيتك القديمة ربنا يعوضك باحسن منها وبعد رأيك المفصل عن البار الشداد انا ان هاتوكل على الله واركبه
بس عندي مشكلتين الاولى ان مسامير المساعد قصيرة ومحتاجة تطول شوية فمش عارف يا ترى لازم يتفك المساعدين ويتغير مساميرهم بمسامير طويلة شوية ولا ينفع يتعمل وصلة للمسامير دي ؟
المشكلة التانية عندي هي وجود العمة .. فامضطر اني اوصل البار بشكل مش هايكون في منتصف قبة المساعد بالظبط يعني هايكون مترحل لورا شوية فهل ده مايقللش فايدة البار وهل ينفع استغنى عن العمة دي لو ماهاش فايدة قوي ؟

المشاركة الأصلية كتبت بواسطة hanzcanz

معلش يا جماعه سؤال
انا عربيتى فيورا 127 ينفع اركب البار فيها ولا لأ؟
وهل دا بشتريه جاهز ولا بعملة ؟ ومواصفاته ايه وفى حدود كام؟
وشكرا

يا باشا انا عملت البار ده عمولة وهو عبارة عن 3 اجزاء الجزء الاول والثاني كل واحد فيهم عبارة عن دائرة حديد مفرغة سمكها حوالى 3 مم وقطرها حوالي 5 سم ومعمول فيها 3 ثقوب على قد مسامير المساعد والجزئين بتركب كل واحد فيهم فوق قبة المساعد واحدة يمين وواحدة شمال
اما الجزء الثالث فهو عبارة عن ماسور حديد بتتوصل مابين الجزئين الاول والتاني وهي مفرغة من الداخل وسمكها حوالي 1 او 2 مم وقطرها حوالي بوصة
بخصوص التكلفة مش هاقدر افيدك لأن ده واحد قريبي عنده ورشة حدادة عمله ليا ومارضيش يقولي اتكلف كام بس انا بعد ماتعاملت مع الصنايعية وشوفت اسعارهم اعتقد انه ممكن يتكلف حوالي 100 جنيه

ال 3 مسامير اللى قصيره عندك دى بتوع البطاحات مش المساعد لان المساعد مربوط فى البطاحه بالمسمار ال 17 اللى فى النص والمسامير اللى فى الداير ده دول مسامير البطاحه

البطاحه اللى عدك لو مساميرها قصيره ممكن تغير المسامير او تغير البطاحه كلها لو حالتها مش اد كده بالمره

والموضوع بتاع العمه بسيط خلى البار فى اخر الداير بحيث يكون ورا العمه على طووول
او ممكن تتنى البار بسيط تخليه بدوران بحيث يجى من ورا العمه برضه زى البار الجاهز بتاع الريتمو اللى بيجى فى الانصاص الاستيراد

بس الحل الاول كويس وحينفع ان شاء الله وحيبقى بعيد عن العمه ولو عاوز تشيلها شيلها وركب فلتر اسبور :)

المشاركة الأصلية كتبت بواسطة misoalex

ال 3 مسامير اللى قصيره عندك دى بتوع البطاحات مش المساعد لان المساعد مربوط فى البطاحه بالمسمار ال 17 اللى فى النص والمسامير اللى فى الداير ده دول مسامير البطاحه

البطاحه اللى عدك لو مساميرها قصيره ممكن تغير المسامير او تغير البطاحه كلها لو حالتها مش اد كده بالمره

والموضوع بتاع العمه بسيط خلى البار فى اخر الداير بحيث يكون ورا العمه على طووول
او ممكن تتنى البار بسيط تخليه بدوران بحيث يجى من ورا العمه برضه زى البار الجاهز بتاع الريتمو اللى بيجى فى الانصاص الاستيراد

بس الحل الاول كويس وحينفع ان شاء الله وحيبقى بعيد عن العمه ولو عاوز تشيلها شيلها وركب فلتر اسبور :)

ربنا مايحرمنا منك يا باشا
بس اخر سؤال ومعلش لو كنت تقلت عليك
عشان اغير المسامير بتاعة البطاحة لازم المساعد كله يتفك ولا ليها طريقة تانية ؟
وبالنسبة للفلتر الاسبور هل هو افضل من العمة ؟ وايه عيوبه ؟ ويا ترى يتكلف كام ؟
كده فل يا باشا ولو سألت حاجة تانية ماتردش عليا .. مع اني عارف ان قلبك ابيض وهاترد هههههههه

المشاركة الأصلية كتبت بواسطة badry78

ربنا مايحرمنا منك يا باشا
بس اخر سؤال ومعلش لو كنت تقلت عليك
عشان اغير المسامير بتاعة البطاحة لازم المساعد كله يتفك ولا ليها طريقة تانية ؟
وبالنسبة للفلتر الاسبور هل هو افضل من العمة ؟ وايه عيوبه ؟ ويا ترى يتكلف كام ؟
كده فل يا باشا ولو سألت حاجة تانية ماتردش عليا .. مع اني عارف ان قلبك ابيض وهاترد هههههههه

عيب يا باشا اسأل براحتك

بص هو اللى اعرفه ان مسامير البطاحات كلها مقاس واحد ازاى عندق قصيره ممكن بيتهيألك انها قصيره انت مش محتاج غير 5 مم بس تخانه الفلانشه الحديد اللى حتلحم فيها البار
وعموما عشان تحل البطاحات لازم تفك المساعد عشان تطلعها
بس جرب كده ممكن متحتاجش تغير المسامير ولا حاجه
الفلتر الاسبور طبعا افضل من العمه بكتييييييير واوفر كمان لان الفلتر بيتفك يتغسل كل فتره ويتركب لكن الفلتر العادى بتشيله ترميه مينفعش يتنضف
وملوش عيوب ان شاء الله طالما راكب صح ونوع كويس ومفيش تسريب يدخل هوا بتراب
التكلفه قول 75 جنيه للفتر و 10 جنيه للخرطوم السوسته اللى حيوصل من الفلتر للكربراتير و2 جنيه افيز يمسك الخرطوم فى الكربراتير
التركيب تركبه انت بنفسك افضل ووفر المصنعيه والكلام ده وخصوصا ان مفيش صنايعى حيعرف او حيقتنع بتركيبه كله حيقولك مينفعش زى محصل معايا الناس كانت بتضحك عليا وتقولى ازاى مينفعش يركب :))

المشاركة الأصلية كتبت بواسطة hanzcanz

ربنا يخليك يا كبير
ماتعرفش انت افدتنى قد ايه
وان شاء الله هعمله قريب
تسلم يا باشا

تسلم يا باشا