عربية ما بيتمرش فيها

**mkhalifa73** · 10-06-2008 04:14 PM

اقل حاجه ممكن اقولها علي عربيتي فيات 127 مافره ومعندهاش اصل ومبيتمرش فيها اي حاجه خاااااااالص
اولا انا بكرهها كره العما بس انا راكبها غصب عني وبرده الحمد لله احسن من غيري وان كنت اظن ان غيري احسن

المشكله العربيه كانت بتسحب بنزين بغباء الميكانيكي ركبلي كاربراتير من عنده ووراهولي معموله اكس وباب تمام ومن يومها مرتحتش
الله يخرب بيته
العربيه بتبطل وكل مروح لميكانيكي شكل ينضف البيك بتاع السلانسيه وينضف الكاربراتير ويقولي تمام وانا ابقي ماشي وعارف انها هتبطل تاني مفيش اقل من نص اليوم وترجع تاني
عملتلها اللالي وصرفت برده اللالي الله يخرب بيت اللي!!!!!!!!
تعبت

**Abdo_Eldesokey** · 10-06-2008 04:19 PM

يا عم على إيه بس كل ده ... تحرق في أعصابك ع الفاضي ... لما تلاقي الليلة مضلمة كده اركنها في الجراج شوية لحد ما تهدى انت ...

وبعدين اسأل على ميكانيكي تاني كويس ومتجرب ورحله ... ساعات الي بيشتغل في العربية بيبقى جاهل أوي أو نحس أوي ... وإن شاء الله هتطلع حاجة بسيطة

**mkhalifa73** · 10-06-2008 04:44 PM

الاخ عبده شكرا علي اهتمامك
بس ممكن تقولي ده ممكن يكون ايه

**mmolazem** · 10-06-2008 04:54 PM

المشاركة الأصلية كتبت بواسطة mkhalifa73

العربيه بتبطل وكل مروح لميكانيكي شكل ينضف البيك بتاع السلانسيه وينضف الكاربراتير ويقولي تمام وانا ابقي ماشي وعارف انها هتبطل تاني مفيش اقل من نص اليوم وترجع تاني

بينضف الكاربرتير ازاى
- يعنى بيفكه كله ويغسل كل اجزاءه ، ام باستخدام الاسبراى.
- وهل كل مره بيلاقى بيك السلانسيه هو اللى مسدود.

- لوكان التنضيف بالاسبراى ( عن تجربه ) بتستمر فتره يحصل سدد فى بيك السلانسيه ، وانا اتعلمت اعمله بنفسى ، كام مره كده لغاية ما الامور تستقر.

- لو انت متأكد من نظافة الكاربراتير ، يبقى محتاج تراجع نظافة فلتر البنزين (او تغييره) ، كذلك مراجعة نظافة خزان الوقود ، لوجود رواسب بكثره او مياه (وغسيله لو امكن ).

معلش دا فى حدود معلوماتى ، و ان شاء الله الأخوه هيفيدوك اكثر.
بس اهدا كده وان شاء الله خير.

**mkhalifa73** · 10-06-2008 04:58 PM

شكرا علي اهتمامك انا علي العموم عليت الموتور وماشي بيها كده ومستحملها واهو كله بثوابه وشكرا ليك

**mmolazem** · 10-06-2008 05:15 PM

المشاركة الأصلية كتبت بواسطة mkhalifa73

شكرا علي اهتمامك انا علي العموم عليت الموتور وماشي بيها كده ومستحملها واهو كله بثوابه وشكرا ليك

الله يكرمك.

بس حاول متمشيش كتير و انت معلى السلانسيه ، عشان الموتور ما يسخنش زياده وكمان يزيد استهلاك البنزين.

و ان شاء الله ابقى طمنا.

.

**ahmedsrs** · 10-06-2008 06:25 PM

الكربيراتير الى ركبهولك جديد ولمجدد ولا ايه ممكن يكون مقفع من القاعدة ويسحب هواء وبنزين كتير الكربيراتير روح العربية 127 الكربيراتير الجديد احسن العربية 127 عربية حلوة وحماله اسية وسحبها فى البنزين قليل جدا

**Goodle** · 10-06-2008 06:28 PM

عربية ما بيتمرش فيها

**aid904** · 11-06-2008 12:51 AM

أنا ملاحظ أنك بتقول ميكانيكي
المفروض لما تكون المشكله متكررة تروح لواحد متخصص كاربيراتير لان البيكات مقاسات يعني لو حط مقاس مش صح تاكل بنزين أو تقطع منك روح لواحد بتاع كاربيراتير أولا
ثم غير فلتر بنزين وأستنضف بنزينه تمون منها ولو شايل فلتر الهواء يا ريت تركبه أو تحط واحد جديد
والاهم تنظف التانك كويس