الموضوع: غيرت تيل الفرامل

المشاركة الأصلية كتبت بواسطة ehab_mansour

مبروك يا هندسة و بصراحة مش مرتاح لموضوع سوق اوروبي دي لكن طبعا الأداء هو اللي هيحكم ولو التيل طلع كويس اخوك محتاج طقم منه لأني مركب طقم ريمسا أسباني من فترة و زبالة الزبالة و قرفت منه خلاص رغم انه لسه فيه كتييييييير بس هغيره خلاص لأنه بيصفر مع كل دوسة فرامل و خشن جدا علي الطنابير فأنا مش هضحي بيها عشان طقم تيل

بخصوص موضوع التركيب بقي فأنا أختلف مع الأخ اللي قلك ناخد شوية من جنب التيل عشان ميصفرش ده كلام فاكس ملوش أساس لأن التجليخ اللي عمله من حرف التيل ده و جنابه ده بيتعمل عشان صبة التيل نفسه بتكون مش مضبوطة علي الجزء اللي بتسمك بيه علي الطنابير فبيكون فيها زيادات خفيفة بتتشال عشان التيل ميكلش في الحرف العالي (الشفة العالية) للطنبورة بس دي كل قصة التجليخ و ده انا عملته قبل كده و كل دي عيوب بسبب ان التيل تعبان و مش اصلي

موضوع التصفير ده سببه الرئيسي مش اللي هو قاله و لكن سببه هو وجود شوائب و معادن غير مرغوب فيها في مادة التيل و ده بيكون عشان تقيليل التكلفة و يتخلي التيل اكثر نشوفيه و بالتالي لا يتأكل بسهولة و بالتالي يطول عمره و ده هو اللي بيسبب التصفير المستمر لأن ماده التيل بتتأكل و الشوائب و المعادن دي بتفضل بارزة و تعمل الصفارة اللي انت بتسمعها مع الدوسة ولو كانت كبيرة و واضحة بتصفر باستمرار مع الدوس و من غيره و هكذا

الحل لمشكلة التصفير هو تركيب تيل فرامل محترم نضيف خالي من شوائب و للعلم التيل ده معدل تأكله هيكون أعلي من التيل المليان شوائب و لكن أدائه أفضل و طبعا بيحافظ علي الطنابير من التأكل و الريجه و التخطيط

والله الموفق

الله يبارك فيك يا بشمهندس
لو عايز تيل
انا نفسي تشرفني مرة في الهرم عندنا
خدلك لفة عند الناس الي عندنا
التغيير مطلوب بردو

وبص يا باشا
في تيل شوفته عند الشيخ علاء
تيل الماني اسود تماما (نسبة الرصاص فيه قليلة اوي)
ثمنه 200 جنيه
بيقولي التيل دة كربون
معدل التأكل بتاعه سريع جدا (اكثر من الألماني العادي)
بس ميزته الوحيدة انه مش بياكل من الطنبورة
هو بس الي بيحصله تأكل
وقالي حرام تركبه علي طنبورة تعبانه
قالي الي بيركبه بيركبه عشان يحافظ علي الطنبورة وخصوصا في العربيات العالية (جولف و جيتا) عشان طنبورتها غالية

فهي بتعتبر موازنة
تيل رخيص = تأكل طنبورة
تيل غالي = محافظة علي الطنبورة
بمعني
هتغير طنبورة كل مثلا 30,000 لو بتستعمل تيل رخيص
هتغير طنبورة كل مثلا 90,000 لو بتستعمل تيل غالي

وعلي المدي الطويل اعتقد هتلاقي التكلفة واحدة لأنك مع استخدام التيل الرخيص هتغير طنابير بسرعة
بس مع الفارق في نقطة تانية
قوة تماسك الفرامل + الصفير
التيل الغالي = قوة تماسك افضل + عدم صفير
التيل الرخيص = قوة تماسك اقل + وجود صفير

انا الحمد لله بفضل الله
التيل بعد ما طبع مفيش اي صفير بس بردو حاسس ان الفرامل مش قد كدة
يمكن عشان التيل الخلفي
او عشان الطنبورة اساسا وحشة
او في هوا في الدورة (لأن البدال واطي حبتين)

ربنا يسهل
انا ان شاء الله هروح النهاردة للميكانيكي عشان الطرمبة البنزين وهخليه لازم يجرب الفرامل وياخد الهوا منها

والله المستعان
،
،