الموضوع: محتاج مساعدة عمالقة الالتو!!!!

اولا : الف مبروك العربية و العربية فعلا هتعجبك
و اهلا وسهلا بيك معانا و انضمامك لنسور السوزوكي :)

بالنسبة التوكيل اولا كفلوس هتكون عالية جدااااا من وجهة نظري الأفضل تجيب قطع الغيار و تركبها برة و لو معندكش ميكانيكي متقلقش موجود ... عايز تروح التوكيل براحتك لكن لازم تعمل حسابك انك هتدفع
بالنسبة الاماكن فيه مراكز صيانة كتيير لكن متعاملتش مع و لا واحد و برده الاسعار بتكون أغلي من الميكانيكي
و بالنسبة لينا احنا بنتعامل مع ميكانيكية لأنها مش مستهلة
بالنسبة قطع الغيار فيه اكتر من واحد في شبرا و وسط البلد

الحاجات ديه دورية ع حسب كل قطعة يعني مثلا فلتر الزيت كل تغييرة او تغييرتين زيت
فلتر الهوا لما يبتدي يوبر او الريش تتعوج او يعدي اكتر من 40 الف
سير الكاتينة يفضل كل 40-50 الف مع تغيير بلية الشداد لأنها لو لا قدر الله قفشت هتقطع السير و تجيب طقم صبابات عالطول
تيل الفرامل لما يبتدي خلاص يخلص و بيبقي ليه علامات زي صوت تصفير و طبعا فرق اداء
فلتر البنزين ممكن كل 50-60 الف زي ما تحب

البوجيهات تتفك العمة و تتفك البوجيهات و بتركب عادي جدااا مفيهاش اي مشاكل المهم تكون نفس المقاس و الحساسات حاول ميجيش عليها مية و بتتنضف تقريبا بمنظف الكترونيات


و بما انك لسه جايب العربية فاللي انصحك بيه عشان تبدأ مع العربية صفحة جديدة و تحسب من دلوقتي اعمل الآتي :

- اكشف ع العربية كلها و شوف كل اللي فيها لو فيها حاجة تانية بجانب الكبالن و المساعدين عشان تعملها و تبقي السليم
- غير زيت و فلتر الزيت و جيب زيت نوعية كويسة
- غير زيت الفتيس
- غير سير الكاتينة و بلية الشداد
- سير الدينامو لو محتاج يتغير غيره
- فلتر الهوا لو محتاج يتغير غيره
- فلتر البنزين غيره او نضفه مؤقتا و بعدين غيره
-شوف سير و فلتر التكييف
- طقم البوجيهات غيره بطقم جديد و القديم خليه معاك احتياطي لو صالح للاستخدام تاني
- سلك الدبرياج لو محتاج يتغير
- شوف الكاوتش لو محتاج يتغير
- ربط العفشة وشحمها و رصص و اظبط زوايا
- ربط اي مسامير في العربية من جوة او التابلوه و زييت الابواب
- تمم ع اللمبات كلها و الاسلاك انها سليمة
- اغسل العربية من تحت و برة و جوة و بعدين اعملها وش بوليش بنفسك مع شوية تظبيط

و يا رب مكونش نسيت حاجة

و الف مبروك العربية الجديدة و تبقي بدأت معاها صفحة جديدة :)

و كل 10 الاف كيلو بتعمل صيانة دورية للعربية و احنا هنتابع معاك ان شاء الله ايه اللي تعمله فيها لو عملت كل الحاجات اللي قاتت ديه و اي حاجة تحسها و مش عارف سببها قولنا و احنا نشوف لو نقدر نفيدك فيها

بس ملحوظة مهمة اووووي اوعي ترمي اي قطع غيار فبريكة او قديمة كانت ركبة عشان لما تحب تشتري قطع غيار تجيب عليها و تقدر تقارن بين الفبريكة او القديم و بين اللي هتشتريه عشان مدوخش لأن احيانا بيحصل خلط في قطع غيار الالتو موديل 2008 و موديلات تانية فتاخد قطعة غلط او مش اد كده

و اي استفسار اتفضل و هنتابع معاك ان شاء الله في اي حاجة مش عارفها

المشاركة الأصلية كتبت بواسطة elkomyalto

مبروك يا باشا على العربيه

وذى ما عمرو باشا قالك لازم تغير كل الحاجات بنفسك وتكتب تاريخ التغيير سواء للزيت او غيره

اضيف اضافه بسيطه غير مية الريداتير واستعمل ميه خضراء

+111111111

زي ما د \ محمد قالك مياة الريداتير
- راجع ع البطارية
- غير زيت الفرامل كله هتحتاج حوالي 400 - 500 ملم يعني علبة صغيرة و جيب نوعية كويسة زي البيندكس او اللوكهيد و خلي بالك قبل ما تشتري البندكس تتأكد ان عليها علامة بندكس عشان ميبقاش مضروب

بالتوفيق ان شاء الله

المشاركة الأصلية كتبت بواسطة waelgam2005

معلش ممكن ادخل فى الموضوع؟؟ بدل ما اعمل موضوع جديد
بالنسبة للفتيس انا طبعا لسه جايب ماروتى جديدة ومعملتش الالف كيلو لسة بس الفتيس مديقنى اوى وبالاخص فى الاول والتانى ساعات اجى ادى الاول او التانى ميرضاش يجى الا بعد محاولات منى فا ده طبيعى ولا اغير زيت الفتيس؟

لأ زيت الفبريكة لسه بدري عليه
روح لوحد يشحم لك عصاية الفتيس و يربطها و شوف الدنيا فيها ايه