مساعدة ضرورية بخصوص غفشة الالتو

**asd2** · 17-09-2012 08:21 PM

السلام عليكم
لو سمحتم عاوز مساعدة ضروري من رجال الالتو

انا جبت عربية 2008 1100 سي سي من فترة

بس المشكلة انها كانت فيها مشاكل كتير

عملتلها طقم سرفيس كامل و الحمد لله الميكانيكا بقت كويسة

بس من ساعة مجبتها و العفشة مجنناني

كانت بتخبط علي طول و بتتطقطق في الملفات

روحت ربطت العفشة و غيرت راس الكوبلن الخارجي و كاوتش الكوبلن الداخلي

الصوت زي ماهو بل بالعكس زاد في العدل كمان

الميكانيكي قالي سدر العربية هو اللي بيخبط و فيه خبطة في الشكمان هي اللي عاملة الصوت ده لان الصوت بيجي لما اطلع بالربية و بالذات و انا مشغل التكييف او في المطالع

صلحت ال 2 و لكن الصوت زي ماهو

المشكلة الصوت مجنني و موجود في كل السرعات و كاتم العربية خالص

ميكانيكي قالي الكوبلن كله عاوز يتغير!!!!!!

فياريت اللي مر بنفس المشكلة يقولي الحل ايه

و اجيب الكوبلن و المساعدين منين لانهم كمان عاوزين يتغيروا

بس ياريت يكونوا متجربين و السعر

لان نزلت الوكالة لقيتهم الجوز مستعمل بي 800 جنيه

و سوزوكي سنتر كان راس الكوبلن بس الواحد ب 300 جنيه !!!!!!!!!!!!!!!

ارجو المساعدة ضروري

جزاكم الله خيرا

**حماده المصري** · 17-09-2012 09:45 PM

مش عارف اقولك ايه هي العربيه مخبوطه مثلا خبطه قويه ولا ايه دنيتها

وياريت هي ماشيه كام كيلو

بص عموما الطقطقه دي ليها اسباب كتير اوي هي فقط محتاجه حد بيفهم ينجز

يعني لو مثلا جلب المقصات بايزه هتطقطق بس مش كتير ده هيبقى في الشوارع الزباله بس

انما على الطريق الي ممكن يطقطق معاك كبلن داخلي او خارجي الخارجي بيتشاف مسيل زيت او لا والداخلي ليه طريقه برضو وهي انك لما تيجي تدغي غيارات احيانا تسمع صوت هبد والميكانيكي لو العربيه وافقه وحرك الكبالن الداخليه هيعرف هي بايزه او لا

برضو بارات الدركسيون وتيش الميزان لما بيبوزوا بيطقطقوا

انا في عربيتي النيو اكسنت كانت ماشيه 50 الف وكان في طقطقه غريبه كلهم قالولي كبلن وروحت لعفشجي قالي تيش وبارات والموضوع خلص

خلي بالك برضو الكوبلن الخارجي لازم يبقى بيسييل زيت عشان يتغير مش الصوت بس يبقى كوبلن

والداخلي بتتعرف من حوار الهب في الغيارات احيانا والميكانيكي لو حركهم وهو راكبين هيعرف باذن الله

ف انت المشكله الي معاك مشكله صناعيي مش متمكن

**dr.hazem** · 17-09-2012 09:58 PM

استنى خبيرنا ومنسقنا ومختص الألتو يجيلك وان شاء الله هيقولك تعمل ايه ان شاء الله
Axel

تحياتي

**Amr Axel** · 18-09-2012 05:31 PM

ممكن توضيح للصوت اكتر يعني تخبيط و لا طقطقة و الصوت طول الوقت طول مانت ماشي و لا في الملفات فقط و لا امتي بالظبط
و الصوت جي منين بالظبط يعني يمين بس و لا شمال بس و لا الاتنين و لا فين