السلام عليكم،
العضو الفاضل:
انا كان عندى نفس المشكلة و ارشح لحضرتك قراءة المشاركة دى:
http://www.nilemotors.net/Nile/282154-2012-j-c4.html
و المشاركة دي:
http://www.nilemotors.net/Nile/28415...a3-2012-a.html
و بالرغم من ان الاخيرة مفيهاش استرا في السؤال الاصلى الا ان الاعضاء هيدخلوها في المقارنة.
رأيي الشخصى:
السي فور : اختيار فعلا ممتاز. سيبك من كلام اعادة البيع لان اللي عاوز عربية و عجباة هيجيبها حتي لو اتباعت بنكله، لكن اللتحفظ الوحيد (ايوة الوحيد) اللي كان عندى هو اعتمادية العربية: بمعني انها هاي تك (و دي حاجة كويسة جدا مش وحشة) لكن كلها قايمة علي الحساسات (ده حتي في حساس لتلوث البنزين اللي بطبيعته فى بلدنا قذر حتي لو ٩٥) فالحساس يشتغل و هو المفروض ميشتغلش. و قيس علي كده حاجات تانية اكيد. و سيبك كمان ان التوكيل مبيفهمش فيها و كده لان ده في كلام و كمان توكيل استرا في مشاكل و كلام عليه. انا خفت اجيب العربية و الاقي جالي هسهس بسبب الدقة الشديدة في الكمبيوتر بتاعها اللي يمكن مش مناسبة لظروف القيادة في مصر او درجة الحرارة العالية او غيرة. انما فعلا العربية طالعه من عيني لانها ارخص من الاسترا بمبلغ و فيها اوبشنز اعلي منها شوية.
الاسترا: كل حاجة فيها كويسة جدا و موتور معروف و قوى عيبها بالنسبة لي ان اوبشنها اقل شوية من الستروين و لما اجي اقارنها بيها الاقيها مش value for money مش عشان اعادة البيع ، لكن ك package كده ، اقول في نفسي "الستروين فيها كل الحاجات اللي انا محتاجها و تجنن و ارخص ، و الاسترا اوبشنز اقل شوية و كمان اغلي" ، فانا مش مقتنع بالاسترا بنسبة ١٠٠٪ لكن كوضع عربية فى السوق و موتور و امكانيات ميكانيكية المقارنات اللي كتبتها فوق رشحت الاسترا عن الستروين بفارق مش كبير.
انا لسه مشتريتش و ان شاء الله ناوى اجيب استرا مش لانها عجبانى تماما بس لان الظروف كده او لانها هى الانسب فى ظروف السوق بتاعنا.
طب عارف و الله امبارح من الحيرة وقفت واحد معاه سي فور الشكل القديم: بص شكر في كل حاجة فى العربية جدا ما عدا التوكيل قالي "رزل شوية" و نصحني اني اشترى كسر زيرو عشان اعادة البيع. غير كده كل حاجة قالهالي تطمن جدا و زى الفل و الله العظيم و قال قطع الغيار آه غاليه بس معمرة.
يا رب كلامي و مشاركتي تساعدك علي اتخاذ القرار المصيري ده، و ان شاء الله بالتوفيق
تحياتى.