الموضوع: الوداع يا طرمبتي اهئ اهئ - العزاء غدا ً بمكرم عبيد

الحمد لله علي كل حال

توفت الي رحمة الله تعالي اليوم طرمبة البنزين عن عمر يناهز ال13 عام بعد صراع دام قرابة ال3 شهور مع المرض
وقد شيعت الجنازة بعد عصر اليوم من شارع الطيران بمدينة نصر
وقد حضر الدفن وتشييع الجنازة الأستاذ أحمد مبارك من قسم سيات
والأسطي عصام الميكانيكي
وقدم العزاء هاتفيا كلا من المهندس ايهاب منصور والمهندس ايهاب اسماعيل

هحكيلكم الحكاية
في البداية انتوا كلكوا عارفين قصتي الأليمة معاها في ايامها الأخيرة وهي بتنازع مع المرض

امبارح اللهم صلي علي النبي كان معايا في العربية 7 اشخاص غيري يعني اجمالي 8 افراد منهم 3 اطفال - بسم الله ماشاء الله والله اكبر
وكنت نافخ الدائري 100 - 120 وحرق اول تاني 6 ار بي ام
عايز اقولكم ان الأكصدام كان بينه وبين الأرض حوالي 15 سم

المهم

نزلت النهاردة رايح شغلي في مدينة نصر
انا سكتي كالتالي
فيصل
مريوطية
دائري (منيب)
قطامية
السابع
الطيران
عباس العقاد

جت بالظبط عند قسم مدينة نصر (مساكن طلبة كلية الأزهر)
وكنت واقف في اشارة
جيت طالع لقيت العربية طلعتها ضعيفة اوي
ولما بكبس مش بتستجيب
عديت الأشارة وعند لولو مول وقفت وبطلت
بدور دارت
طلعت بيها ودخلت يوسف عباس
ومن بعد مركز الأزهر للمؤتمرات بدخل يمين وبطلع علي الطيران
وفي نهاية الطيران بدخل يمين بعد كنتاكي عشان اوصل لعباس العقاد
كل دة والعربية ماشية بالعافية
اول لما دخلت يمين وقفت قدام السويدي للكابلات
وبطلت
بدور - مش راضية تدور
طبعا ماحولتش تاني عشان البطارية
لأني خلاص فهمت الزتونة

المهم ركنت العربية تحت شجرة
وقفلتها كويس وروحت شغلي مشي

وانا في الشغل اتصلت بحبيب قلبي احمد مبارك عشان استلف منه عدة
وانا كان معايا في شنطة العربية طرمبة بنزين احتياطي كان مدهاني ايهاب اسماعيل
بالفعل احمد جالي مكان ماكنت واقف وسابلي العدة وراح مشواره

قعدت انا فكيت الدنيا كلها وطلعت قلب الطرمبة وبديها كهرباء من البطارية - اشتغلت
بس قولت طالما انا كدة كدة فكيت انا هركب طرمبة ايهاب اسماعيل

بالفعل ركبتها
وبدور
العربية دارت

قفلت الدنيا

وجيت ماشي بالعربية
لقيتها بردو بتعمل نفس الحركة
اكبس بنزين العربية تتكتم تحت رجلي وبعدها تبدأ تستجيب وتسحب
ضيف علي كدة - وانا ماشي بتنتش

خلصت ظبط الزوايا وروحت طالع علي الأسطي عصام حبيب قلبي
صعقني طبعا وفاجأني لما بيقولي كدة الطرمبة انتهت ولازم تتغير

اتصلت بحبيب قلبي وحبيب الملايين ايهاب منصور
قالي خبر ادهشني لدرجة اني افتكرت ان وداني حصلها حاجة ومابقتش بسمع كويس
قالي ان الطرمبة انتهت ولازم تتغير

ايه يا جدعان
كلكوا عليا ولا ايه ؟؟؟

قالي ان الطرمبة من كتر الأستخدام بيحصل فيها تأكل ولووز lose بيخليها تفقد احكامها وبالتالي ماتكبسش او ضغطها بيضعف
يعني لو اختبرتها هتشتغل كهربائيا لكن فعليا مش هتضغط بالكبس المناسب الي يدور العربية

وعليه

قررت اني اجيب طرمبة جديدة بناء علي توصيات من المهندس ايهاب منصور
وهاخد اجازة 3 ايام حداد علي الطرمبة




ومانجلكومش في حاجة وحشة

والدوام لله
،
،