الموضوع: تقرير بمقابلة الحرفيين

المشاركة الأصلية كتبت بواسطة syd

النهاردة بفضل الله اتقابلت انا والمهندس ايهاب والأستاذ احمد مبارك والأستاذ مصطفي ماتريكس

البداية كانت مع صلاة الظهر

اتقابلنا في المسجد جمب بيت ايهاب واحمد مبارك

صلينا الظهر وانطلقنا الي الحرفيين بعربيتي وعربية احمد مبارك
قابلنا مصطفي ماتريكس عند حديقة بدر في جسر السويس
شخصية محترمة جدا وانا سعيد اني اتشرفت بمعرفته

روحنا الحرفيين وركنا هناك
ونزلنا خدنا جولة
انقسمنا فريقين
انا وايهاب منصور
واحمد مبارك مع مصطفي
ورجعنا اتقابلنا تاني بعد الجولة

انا اشتريت طرمبة البنزين
ومصطفي اشتري حاجات كتير لعربيته

روحت انا فكيت طرمبتي وركبت الجديدة
وايهاب واحمد عملوا كونسولتوا علي عربية مصطفي

انا خلصت طرمبتي وايهاب واحمد ومصطفي لسة شغالين
جردوني من العدة بتاعتي كلها
كل شوية معاك مفك عادة
معاك مفتاح 14
معاك بنسة
معاك مفتاح بوجيهات
معاك مش عارف ايه

المهم

طلعت انا واحمد برة الحرفيين عشان نجرب حاجة في عربية احمد علي عربيتي وبناء عليها هيقرر احمد يغير طرمبة البنزين ولا لاء

وفضلنا مستنين ايهاب ومصطفي
أتأخروا اوي علينا
لحد الساعة 5 تقريبا

كنت انا واحمد جبنا بيبسي وشربناه وحكينا في المحكي وخلصنا كل الذكريات والحكايات

بقي تشربو حاجه ساقعه و تحكو الحكايات و التي متحكاش و سايبنا جوه *&%#$ .......... يلا ماشي انا اللي غلطان ........... بس لما نتقابل تاني .........علي العموم فيه تفاصيل تانيه كتيييييييييير حصلت من وراكم ولكن ....... نسيب صاحبها هو يحكي لو حابب !!!! ولكن لو مش حابب خلاص مش مشكلة ............ ربنا يسترنا في الدنيا و الاخره .........

بس بصراحة كان يوم ممتع الصراحة
والواحد مش بيشبع من القعدة بتاعتهم

بس انا نفسي يا جدعان نقعد زي خلق الله
كل مرة لازم كلنا نروح مشحمين ورحيتنا بنزين وادينا متوسخة وجعانين وبنلهث من العطش

ليه بنعمل في نفسنا كدة ؟؟؟؟؟

نداء
ممكن المقابلة الجاية ان شاء الله تبقي من غير عربيات ونقعد نتغدي ونشرب حاجة زي البني أدمين ؟؟
ممكن ؟

تحياتي لأيهاب منصور واحمد مبارك ومصطفي

ونشوفكم علي خير قريبا بأذن الله

والله المستعان
،
،

نفسي الكلام الكبير قوي قوي ده يتحقق ولو مرة واحده (ايموشن واحد بيعيط عشان مش لاقيها دلوقتي)

المشاركة الأصلية كتبت بواسطة mstfun

ماشاء الله

ياريت اعرف اجي معاكم مقابله من دي....

بس هاتبقي صعبه لاني ف اسكندرية

علي فكرة يا أفندم انا نفسي نتقابل من كثرة متابعتك لمواضيع المقابلات
بجد مش تهريج والله و ربنا يسهل و نعرف نرتب يوم نخرجه مع بعض علي اسكندرية و نقضي يوم حلو
يا مسهل !!!!!

المشاركة الأصلية كتبت بواسطة matrix012

بقي تشربو حاجه ساقعه و تحكو الحكايات و التي متحكاش و سايبنا جوه *&%#$ .......... يلا ماشي انا اللي غلطان ........... بس لما نتقابل تاني .........علي العموم فيه تفاصيل تانيه كتيييييييييير حصلت من وراكم ولكن ....... نسيب صاحبها هو يحكي لو حابب !!!! ولكن لو مش حابب خلاص مش مشكلة ............ ربنا يسترنا في الدنيا و الاخره .........

بتحرجنى على الصبح يا باشمهندس
ماشى
باختصار شديد يا رجاله انا اكتشفت ان معايا عربيه ماشيه بالبركه يعنى نقدر نقول كده ان كل حاجه فيها ماشيه بس مش لازم نعرف ماشيه ازاى علشان انا لقيت
1- خرطومين البنزين الداخل والخارج مخرومين وده معناه ان طول ما انا ماشى دول عمالين يطلعو بنزين سبحان الله
2- البوجيهات الى لقيناها فى عربيتى كانت مضروبه بالنوووى قبل كده وكلها سواااااااااد والانيل من كده انها كانت مربوطه جامد جدا
3- انا جبت زرار للباب والاستاذ احمد مبارك ربنا يباركلو غير القديم فى الباب اليمين وركب الجديد فى الباب بتاع السواق
مش عيب على فكره كل الكلام ده
بس النتيجه الحمد لله
طول منا ماشى امبارح وانهاردا الصبح عمال افتكر المهندس ايهاب والمهندس محمد سيد والاستاذ احمد مبارك بالخير وعمال اقول ربنا يباركلهم يا رب ويجعله فى ميزان حسناتهم قولى يا رب
وفى النهايه احب اقدم الشكر الجزيل للراجل الى منامش امبارح لحد ما كتب الموضوع ده محمد السيد الى كانت رحته بنزين امبارح وطبعا الردود الكويسه بتاعت اخوانه
ويا فندم بالنسبه للنداء اننا نتقابل ونقعد انا حابب طبعا بس شايفها ضرب من الخيال يا راجل ده احنا طلبنا شاى امبارح من الراجل التلوث الى كنا واقفين جمبه ومحدش فينا شرب الشاى بتاعه وهوا سخن ده انا متهيئلى اصلا ان الراجل كان صعبان عليه الكبايات انها تتركن كل ده وفى واحد مننا تقريبا المهندس ايهاب مشربش منه اصلا قال ناقابل ونقعد قال طب قول يا رب نتقابل مره كل اسبوع ومش لازم نقعد المهم اننا نشوف بعض يااخى اصل بسم الله ما شاء الله كانت صحبه كويسه جدا جدا جدا وربنا يديم المعروف
وربنا يستر طريقى وطريقكم يا رب

و اي تلوث !!!!!! يلا ربنا يسهل و نعرف نشرب من مكان مافيش فيه تلوث
صدقني انا سعدت أكثر بمعرفتك أستاذ مصطفي و نتمني من الله مرة كل شهر بلاش أسبوع دي لأنها كتير قوي و صعب جدا و ربنا يديم الصحبه في الله دائما و طبعا أخونا محمد سيد و اخونا احمد مبارك مش محتاجين كلام لأننا بقينا لاجئين مع بعض علطول ههههههه
والله الموفق