الموضوع: حكة + كاوتشة

السلام عليكم جميع أخوتى الأعزاء الماروتية المحترمين

امبارح لقيت بتاع العفشة فاضى كده ومأنتخ قلت أما أرمى بلايا عليه وأكشف وأعمل تشيك علشان لو فيه حاجة نلحقها أو نعرف إنها بدأت تبوظ .
المهم هو بوجه عام بعد الفحص قاللى العربية كعفشة زى الفل بس عندك ملاحظتين :
الأولى : العجلة الشمال قدام بتحك فى الصاجة اللى رابطة الفتيس لما باكسر أقصى اليمين .
الثانية : قاللى الكاوتشة الشمال لقاعدة الفتيس مكسورة وعاوزة تتغير وهى دى سبب رجرجة العربية (وسألنى إن كانت العربية بترجرج لما تمشى على أسفلت متعرج فأجبته بنعم) .

طيب بالنسبة لحكة الفردة الشمال قدام دى علاجها إيه ومين يعملها ؟
وبالنسبة لكاوتشة القاعدة بتاعت الفتيس فدى أجيبها منين يعنى من عند بتاع قطع غيار سوزوكى ولا من بتوع الكاوتشات والخراطيم اللى فى التوفيقية مثلا ( عاوز أماكن محددة والله)؟
هل تركيب الكاوتشة دى بياخد غلبة ولا بتتم على طول وهل الصنايعى حييجى جنب الفتيس أو يفكه مثلا ؟ وهل اللى يعملها ده بيبقى ميكانيكى ولا بتاع فتيس ولا إيه ؟

أفيدونا أفادكم الله
طبعا أنا بسأل باستفاضة لأنى عارف كل أصدقائى هنا مابيبخلوش علينا بأى معلومة مهما كانت ضآلتها .
ربنا يسترها معانا ومعاكم جميعا ... آمين