الموضوع: حصري لنايل موتورز .. نيسان تيم يقدمون .. نتائج اختبارات قيادة نيسان قاشقاى الاتوماتيك

المشاركة الأصلية كتبت بواسطة y2y1500

بصراحة يا رجالة ده احلى تقرير قريته من اول السنة دى فى المنتدى كله وقسم نيسان خاصة
تحياتى لكل واحد فيكم جميعا من اللى جربوا ونقلولنا تجربتهم (ابو حميد - بسام - احمد محمود - عمرو) الى التجميعة الهايلة اللى اضافها بيشوى
وفعلا كل حرف كتبتوه صحيح 100% واى حد مختلف معاه اتحداه انه يغير كلامه لما يركب العربية دى ويجربها
واخيرا ... حسبى الله ونعم الوكيل فى الحمرانى اللى حرمنى من ركوب القاشقاى فى السعودية

باهنيك على حسن اختيارك وفعلا القاشقاى من وجهة نظرى تكسب اجمالا برغم الكماليات الناقصة اللى فيها لكن الثبات والفرامل والاداء والتكييف والفتيس والتقفيل الانجيليزى والبانوراما الكامل بدون فاصل وغيرها يكسب السبورتاج (امتلكها) صاحبة الشكل الخارجى الاكثر جاذبية والرحابة الداخلية والكاميرا والباركنج سنسور والمرايات الضم بغمازات والليدات الامامية وفتيس ال6 سرعات .. على فكرة انا معايا برضه باجيب 120 على 2000 ار بى ام و140-150 على 2500 على الغيار السادس
وعشان تفهم اكتر الفتيس الcvt اقرا الموضوع التالى انا كنت عامله من فترة هايفيدك كتير
http://www.nilemotors.net/nile/27146...nsmission.html

ايه ده يا كبير .. جبت سبورتاج من ورانا .. مش تقول .. احكلنا عنها مقارنة بالكلام اللى كابينه عن القاشقاى

والف مليون مبروك .. ووحشنا كتيرررررررررر

المشاركة الأصلية كتبت بواسطة Ahmed.TV

ايه ده يا كبير .. جبت سبورتاج من ورانا .. مش تقول .. احكلنا عنها مقارنة بالكلام اللى كابينه عن القاشقاى

والف مليون مبروك .. ووحشنا كتيرررررررررر

الله يبارك فيك ..
وانتم كمان وحشتونى كلكم

وبالنسبة للمقارنة ادخل على الموضوع التالى لمعرفة الفروقات بين القاشقاى والسبورتاج
http://www.nilemotors.net/Nile/287715-a.html

او اقرا المشاركة دى:

المشاركة الأصلية كتبت بواسطة Y2Y1500

نصيحة أخ لأخوه شيل الكارينز من المقارنة وخليك فى المفاضلة بين القاشقاى والسبورتاج

تقييمى المتواضع للعربيتين علما لأنى قمت بتجربة قيادة للقاشقاى مانيوال 1600 فى مصر وامتلك حاليا سبورتاج اتوماتيك 2400 فى السعودية وذلك من خلال بعض النقاط:
1. قوة المحرك وعزمه .. القاشقاى تكسب بغض النظر عن الارقام لأنى باحكم بالسواقة العملية ويكفى عراقة وسمعة محركات نيسان الجبارة والاعتمادية
2. التسارع .. السبورتاج تكسب بسبب الفتيس 6 نقلات خاصة لو استخدمت الستيبترونيك عكس الcvt تسارع اقل لكن اداء افضل على السرعات العالية فوق ال100
3. الفرامل .. القاشقاى تكسب زى كل عربيات نيسان وسر النجاح النظام الثلاثى abs+ebd+ba وعشان اكون دقيق اكتر النيسان مهما تكون على اى سرعة ومهما كانت حالة الطريق لو ضغطت فرامل بقوة عمرها ما تعوم ولا تحدف او تغربل وتصفر وتزيق زى اغلب باقى العربيات يعنى أمااااااااااااااااااان
4. نظام التعليق .. القاشقاى تكسب وعن تجربة احساسى بالمطبات فى التيست درايف فى مصر خاصة فى اليوترنات اقل من احساسى بعيون القطط وتعريجة خفيفة فى اسفلت السعودية مع السبورتاج وبتظهر اكتر فى اهتزاز الدركسيون علما بأن القاشقاى باور كهرباء والسبورتاج هيدروليك
5. وضعية جلوس ورحابة داخلية .. السبورتاج تكسب خاصة فى الكراسى سواء امامية او خلفية وتحديدا فى كرسى السائق بعد الطارة عن الكرسى بيخليك ماسكه وانت فارد دراعك بالكامل والدخول والخروج سهل جدااا والدواسات افضل والبنزين دواسة مثبتة فى الارضية وليس من اعلى وفرامل اليد بالرجل وليس فى الكونسول الاوسط لكن وضعية الجلوس مرتفعة اكتر فى القاشقاى وبيبان اكتر لما تشوف نفسك اعلى من العربيات السيدان من حواليك بشكل ملحوظ اما السبورتاج كراسيها منخفضة وبتدى مساحة اكبر لرؤوس طوال القامة خاصة مع السقف وفى المقاعد الخلفية
6. حجم الصندوق الخلفى والتحميل .. السبورتاج اكبر نسبيا بشكل بسيط لكن مع طى المقاعد الخلفية الاتنين زى بعض
7. التكييف .. القاشقاى طبعا بدون فصال من حيث قوة التبريد والزمن اللازم مهما كانت درجة الحرارة الخارجية (نيسان وما ادراك ما تكييفات نيسان!!!)
8. الابعاد الخارجية والتصميم .. تقريبا واحدة فى الاتنين لكن كل عربية ليها شخصيتها وليها جمالها الخاص (ماعنديش مشكلة مع واحدة فيهم) والاتنين سواقتهم ممتعة لكل ركاب السيدان وابعادهم سهلة التعود.
9. الكماليات .. الاتنين متقاربين جدااااا واللى بيحددها اختيار كل عميل فيه اللى بيحب وجود حاجات معينة فى العربية وبيفضل واحدة عن التانية لكن رأيى ان الباركينج سنسور والكاميرا الخلفية فى السبورتاج بيعوضهم الرؤية الخلفية الممتازة للمرايات الجانبية الكبيرة فى القاشقاى انما السبورتاج فاشفق على اى واحد يجيبها ستاندرد بدون كاميرا وسنسور خاصة ان مساحة الزجاج الخلفى صغيرة جداااا - السقف البانوراما فى القاشقاى قطعة واحدة على ما اتذكر انما السبورتاج مفصول جزئين امامى وخلفى - ليدات السبورتاج بيعوضها زينون القاشقاى ورشاشات المصابيح الامامية - ... الخ
باختصار ممكن اى ميزة غيرى يشوفها عيب والعكس صحيح ..
10. قطع الغيار واعتماديتها واسعارها .. مختلف فى كل سوق عن الاخر مثلا توكيل نيسان افضل من كيا فى مصر والعكس فى السعودية من حيث جودة الصيانة - اسعار صيانات كيا فى السعودية ارخص من مثيلاتها اليابانية كلها عكس مصر - الضمان كيا 100.000 كم 5 سنوات انما نيسان 3 سنين لنفس المسافة.
11. الاطارات .. القاشقاى بتنزل بكونتيننتال انما السبورتاج بتنزل بكومهو
12. الصناعة .. القاشقاى تقفيل انجيليزى محكم ومميز بجودة الخامات ونوعية البلاستيك الاعلى من السبورتاج الكورية بشكل ملحوظ واللى بيدقق فى الحاجات دى هايأكد كلامى لما يركب الاتنين ويستخدم ازرار تحكم الابواب والتابلوه عن قرب.
13. السعر مقابل الكماليات .. السبورتاج تكسب فى الكماليات والتنوع الاكبر لكن القاشقاى تتفوق فى السعر الاقل بكماليات معقولة جدااا
14. استهلاك الوقود .. مفيش فارق كبير بين الاتنين من وجهة نظرى لأن اسلوب القيادة هو المحدد الاساسى لكن بالنسبة لنوعية الوقود فالاتنين 92 عدا السبورتاج المزودة بمحرك gdi وان كان ال95 بيفرق فى اداء اى عربية مهما كانت.

الخلاصة ...
الاتنين يستاهلو ثمنهم بجد وفى اى سوق وبأى فئة مهما كانت سواء داخل او خارج مصر والاتنين مميزين على الطريق وان كانت السبورتاج بتخطف العيون اكتر لكن القاشقاى ممتعة اكتر فى سواقتها ومن العربيات اللى تحس معاها بالامان والثقل بغض النظر عن الوزن بالكجم (باتكلم عن شعور السائق)
ويارب اكون قدرت اعرض مقارنة عادلة بين العربيتين لأنى سوقت القاشقاى زى ما قولت واتمنى انى امتلكها فى يوم من الايام فى مصر لكنى امتلك الان السبورتاج خارج مصر

الخلاصة اطمنوا .. هافضل نيساناوى عالطول

موضوع مميز و تسلم الايادى