الموضوع: تصاعد أزمة بين نوكيا و الحكومة المصرية

المشاركة الأصلية كتبت بواسطة hero

يعني بصراحة انا مش لاقي اي مشكلة في وجود انظمة الـgps في مصر.....

يبقى مافيش غير تفسير واحد فاضل , الا و هوة ان الحكومة عوزة حد يدفع تمن ترخيص هذة الاجهزة , اتاوة يعنى , مين حيدفع نوكنيا و لا ابل , انا اقترح الاتنين يلمو من بعض كدة و يشوفو الحكومة بقرشيين و الموضوع حيتحل

المشاركة الأصلية كتبت بواسطة جندى مجند

الـ GPS بيعمل عن طريق ان الجهاز يلقط اشارة من 3 أو 4 أقمار على الأقل كل قمر منهم بيبعت اشارة تحدد موقعه (موقع القمر) و الجهاز بيقدر يحسب عن طريق عملية حسابية اسمها Trilateration موقعه (موقع الجهاز) و ارتفاعه عن مستوى سطح البحر. و العملية دى كلها مش محتاجة ان القمر الصناعى يعرف أى معلومة عن موقع الجهاز. لمزيد من التفاصيل و الرسوم التوضيحية: http://en.wikipedia.org/wiki/Gps

و حتى برضو موضوع ان تردد الـ GPS يكون بيشوشر على ترددات تانية غير وارد لسبب بسيط ان اشارات الجى بى اس موجودة بالفعل فى أى مكان مفتوح زيها زى اشارات التليفزيون و الراديو و بيتم ارسالها منذ أن تم اختراع نظام الجى بى اس و بالتالى لو فى أى أجهزة ترددها بيتعارض مع الجى بى اس كانت حتتأثر من زمان و مش مستنية وجود أجهزة الاستقبال ...

يعنى للأسف مفيش أى سبب تقنى مقنع يبرر تأخر مصر فى استخدام الجى بى اس بينما العالم كله بيستخدمه عادى جداً ... يا راجل دا أنا بأحمد ربنا انهم فى مصر سامحين بالانترنت و كان ممكن يمنعوها و يقولوا لأسباب أمنية!!

كلام مظبوط

وأحب أضيف عليه إن شبكة الجى بى إس الأمريكى مكونة من 24 قمر بيغطوا الكرة الأرضية بالكامل ، وإنت فى أى نقطة على سطح الكرة الأرضية نظريا المفروض تستقبل 12 قمر بحد أقصى ، لكن غالباً بتستقبل حوالى 6-8 أقمار بقوة إشارة متفاوتة

وكل مايزيد عدد الأقمار ووضوح الإشارة بتقل نسبة الخطاً فى تحديد الإحداثيات

الجيش فى مصر مش بيعتمد على نظام جى بى إس ، وده قرار سليم ، لأنه فى حالة الضرورة ، الدولة صاحبة شبكة الأقمار والمتحكمة فيها ، تقدر ترسل بيانات خاطئة من أقمارها وده يؤدى لتحديد أماكن بشكل خاطئ وممكن يكون مقصود ، فإذا إنت فى حالة حرب وتعتمد على الجى بى إس فى طيرانك ومدفعيتك هتكون نتيجة التوجيه الخاطئ كارثية ، إنما إستخدام الطرق التقليدية (الخرايط و الراديو) أأمن فى الحالة دى

إنما طبعاً منع الموبايل ده غباء فى غباء

أنا عندى جى بى إس Garmin 60CSx وده جى بى إس حقيقى مش زى بتوع نوكيا وحجمه زى حجم موبايل تخين شوية وكان تمنه من 2 - 3 الاف ، و داخل خارج بيه على طول عشان بستعمله فى الشغل ، وبرضه الموبايل 95 بيدخل عادى جداً مع الناس، مافيش أى داعى لقرار حظر بيعه

إحنا لسة بنمنع التصوير جنب السفارات وجنب سور وزارة الدفاع ووزارة الداخلية - حاجة تكسف - يروحوا يشوفوا جوجل إيرث ولا ياهوو مابس

وعلى فكرة أجهزة المساحة (توتال ستيشن) من نوع لايكا السويسرى (تمنها 90 - 150 الف) بتتباع عادى فى مصر من التوكيل بتاعها بدون أى تصاريح أمنية ، بما فيها النوع المشتمل على جى بى إس فائق الدقة ، بنسبة خطأ لا تتجاوز 3 ملليمتر ، وراصد يعمل بدون بريزم (ريفليكتور ليس) ، بمجرد شعاع ليزر من على بعد حوالى 1 كم ممكن تحديد أى نقطة بالمنظار بنسبة خطأ لا تتجاوز 3 مم ، وأنا جربته بنفسى على نقطة على الضفة التانية من النيل كانت نقطة عشوائية على عمارة فى الزمالك وأنا واقف على الكورنيش من ناحية بولاق

أعتقد الأمان مابقاش إنك تحبس نفسك ، لأن ماعدش فيه حاجة ممكن تخبيها فترة طويلة ، والدليل على كدة المشروع السورى اللى إتضرب من كام شهر فى محافظة نائية (الرقة) ، أعتقد الأمن يكون فى إمتلاكك القدرة على الردع ، ساعتها إنت اللى هتعلن بنفسك عن قوتك ، بس نقول إيه ربنا كريم