الموضوع: نداء الى كل البيتلزاوية افيدونى

المشاركة الأصلية كتبت بواسطة Land_Cruiser

لا يا فندم الاستهلاك اقل من كده بكتير لو الكاربيراتير و البوجيهات كويسين و بعدين خالى بالك قطع الغيار حصل فيها تطوير لان العربيه كانت بتنتج لحد قريب بالاضافه. الى ان رقم الاوكتان كمان على يعنى زمان كان بيتحطلها بنزين ٨٠ لكن دلوقتى الاغلبيه بتحط ٩٠ او ٩٢ وده بيخللى اللتر يعمل كيلومتر اكبر

يا باشا الاستهلاك اللى انا كتبته دا من اعلان شركة فولكس وهي بتسوق للعربية
يعنى العربية كلها جديدة الكاربراتير والبوجيهات وكله

هتلاقي الاستهلاك بيتكب فى اخر الاعلان خالص
25 mpg يعنى 25 ميل لكل جالون بنزين
بالتحويل
40 كيلو متر لكل 4.5 لتر بنزين
يعنى اللتر بيعمل 8.88 كيلو متر بالظبط

اما بالنسبة لتطوير قطع الغيار
فهو للاسف منزلش مصر لانهم خلوا الموتور انجيكشن ووقتها مكنش حد فاهمه

والكاربراتير الجديد للاسف مفيش غير صناعة صينى وبييجي بايظ بشهادة اللى جابوه
وكمان متصنع بنفس مواصفات القديم السوليكس ونفس التكنولوجيا

اما رقم الاوكتان
فعربيتي موديل سنة 1964 والكتالوج الاصلي مكتوب فيه اوكتان 87
اللى هو فى مصر بيقولوا عليه 90

البيتل عامة بنزين 80 بيخليها تسخن حتى لو اخرت الكهرباء

ملحوظة
مش عايزك تزعل مني علشان بقاوح معاك
بس صدقنى المعلومات دى من فيديو الشركة المصنعة ومواقع تانية

وغرضي الاساسي هو توضيح الصورة لصاحب الموضوع بكل صراحة
مش عايزه يشترى العربية ويتفاجئ بعد كدة

المشاركة الأصلية كتبت بواسطة wael61

طبعا الاول اسمحلى احييك على دخولك موضوعى وطبعا هو لو الاستهلاك لتر لكل 9 كم يبقى كتير شوية بس انا مش عارف حابب العربية دى لية ممكن تعملنا تقرير عن عربيتك

بالنسبة لعربيتي
هي موديل 1300 انتاج سنة 1964 موتورها 1200cc
انا شاريها من حوالي 2.5 سنة
لما اشتريتها كان معايا ثمن انواع عربيات ثانية اكبر واحدث
بس اشتريت دى لحبي الشديد للبيتل من ايام ما كنت صغير وبتفرج على افلام هيربي القديمة

انا جبتها موتور وعفشة وفتيس كويسين جدا والصاج هو اللى كان عايز شغل كتير

جبتها ب 7500 جنيه وقلت اوضب فيها على مزاجي
لكن للاسف قرف الصنايعية وسرقتهم العلنية والبهايم اللى بيخبطوها وهي راكنة خلونى اكسل اظبطها بس ان شاء الله ناوى الفترة اللى جاية اشدها علشان الفحص قرب

انا مكنش عندى خبرة خالص بالعربيات ولا عمرى سوقت واتعلمت عليها السواقة
وشفت الويل من سرقات الميكانيكية
بس الحمد لله اتعلمت هنا من اخواتنا اصحاب البيتل حجات كتير جدا

فوصلت للمرحلة اللى ممكن اتعامل فيها مع الميكانيكي من غير ما يضحك عليا لانهم لما بيلاقوا واحد مش فاهم بيشتغلوه ويخربوا بيته

وانا اصلا من هواة التصليح وبفهم كويس فى الكهرباء سواء العادية او الكنترول
فالحمد لله دلوقتى باصلح فيها كل حاجة بنفسي وبظبط الموتور بنفسي
حتى زيت الموتور باغيره بنفسي علشان انضف مصفة الزيت

مميزات وعيوب البيتل من وجهة نظرى

المميزات
سحب وسرعة وسبات عالي على السرعات والغرز بشهادة اصحابي معاهم عربيات حديثة لانى مليش فى الكلام ده
عالية عن الارض مهما ركبت فيها مبتحكش
باطلع بيها على الرصيف وبامشي بيها فى الرمل والطين ومبتغرزش
انا نظرى ضعيف وساعات مبشوفش مطبات صناعي وبادخل فيها والحمد لله مبيحصلش حاجة

المميزات دى موجودة فى اى بيتل مش عربيتي انا بس

العيوب من وجهة نظري
ديقة من ورا يعنى اى حد كبير مش هيبقي مرتاح فى القاعدة
مفيهاش شنطة والمكان اللى ورا الكنبة يا دوبك الكوريك وعدة خفيفة والسماعات
والشنطة اللى قدام يا دوبك واخدة الاستبن علشان محوط فوق التنك وغطاء العربية وجيركن زيت وجيركن فاضي

قطع الغيار الجديد للاسف صيني والبرازيلي مضروب ودول اسعارهم عادية
اما قطع الغيار الاستيراد فهي مبالغ فيها جدا ولازم تكون فاهم علشان ميدكش حاجة بايظة
سعر الموتور الاستيراد ال 1200cc من 3500 ال 1300cc من 4000 ال 1600 من 6000 جنيه وبتشتريهم وانتا وحظك

العمرة بتكلف كتير من 3000 و بتوصل ل 5000 جنيه بس لو البلوك سليم والصنايعي شاطر وقطع الغيار نضيفة بتبقي كانك جبت موتور جديد

طقم الشمبر 700 وفي ناس بتقول 400 و 500 مش عارف تفاوت الاسعار ليه

علبة دريكسيون موديلات 1302 و 1303 استيراد بتبدأ من 1000 جنيه ازا لقتها

استهلاك عالي للبنزين لو مشاويرك كتير هتحس بيه

بالنسبة احسن اختيار ليك علشان المشاوير الطويلة

لازم الموتور يكون 1600cc

لو الطرق اللى هتمشي فيها مكسرة يعنى لو انتا مهندس وهتروح مواقع يبقي خليك فى موديل 1300 علشان عفشته ارخص واقوى من الموديلات التانية

ولو هتشيل حجات كتير ومحتاج شنطة كبيرة شوية يبقي خليك فى موديل 1302 لانها اعرض واكبر شنطة بس الطرق اللى تمشي فيها تكون كويسة

ولو انتا شاب وعايز احلي شكل ومشاويرك مفيهش طرق مكسرة يبقي خليك فى 1303

بس دا ميمنعش ان ال 1302 و 1303 تمشي فى الصحراء وقى الطين بنفس كفاءة 1300 وبيتفوقوا عليها كمان في نعومة العفشة بس انا باتكلم من ناحية تكاليف الاصلاح وقطع الغيار لان مشاويرك مستمرة

الاسعار لو العربية حالتها عادية
ال 1300 من 10000 وال 1302 من 13000 وال 1303 من 15000
دى متوسطات وانتا وشطرتك والفرصة اللى ادامك

نصيحة
متستعجلش فى الشرا
ومتنبهرش بالبوية والجنوط
اهتم بالاساسيات اللى هي الرقبة والشاسيه والعفشة والموتور والفتيس والفرامل
والصاج ممكن ترضي بالحالة المتوسطة لكن لو انتا ليك فى التعامل مع الصنايعية هاتها ووضبها على مزاجك
واهم حاجة تاخد ميكانيكي امين معاك هو اللى يكشف عليها وتجرب العربية كمان على السرعات العالية
والبايع اللى ميرضاش تسيبك منه لان بيبقي فى عيب خايف منه زى الفتيس بيرد فى الرابع
معلش طولت عليك
بس دى تقريبا كل المعلومات اللى اعرفها

المشاركة الأصلية كتبت بواسطة wael61

استاذى الغالى smsmxxxxxx اشكرك على التقرير الاكثر من رائع هن البيتلز واللى انا حسيت فية بأنى بكلم شخص عارف مميزاتها وعيوبها ومعاشرها مش مجرد شخص بيفخم فى العربية وبس
الف شكر مرة تانية وجعله الله فى ميزان حسناتك

العفو احنا هنا كلنا اخوات
وان شاء الله ربنا يقدملك ما فيه الخير

بص يا باشا انا مش هقول اكتر من اللي قالوه ف المنتدي طبعا
اولا بالنسبة للعربية هات 1303 من موديل 73 حتي 75 دي تحفة ولو كانت 1600 هتكون برضو اريحلك نجي بقي للحالة ممكن تجيب عربية كويسة وتظبطها حاجة ف حاجة اولا وانت رايح خد معاك ميكانيكي يبصلك علي الموتور وخليه يشوف كده عمود الكرنك تاني حاجة والاهم العفشة بقي يبصلك كالاتي الرقبة الاهم بس ده ميقللش باقي اللي هقوله عندك يبصلك علي المساعدين والبارات والمقصات والصليبة والاسكاترا والكوتش والطنابير والسوست وكهربائي يبصلك علي الضفيرة اما بالنسبة للبويا والفرش ده مهم بس ممكن تظبطه حاجة ف حاجة ولو عوزت اي حاجة يا باشا انا تحت امرك هي العربية دي معايا من 3 سنين والحمد لله مريحاني جدا وربنا يوفقك ف البيع ولو عوزت ميكانيكي او كهربائي كويس قولي بس وربنا يقدرنا ونساعدك