الموضوع: معرفة فصل كمبرسور التكييف

بص هي بتحتاج حاجه من تلاته او الثلاثه مجتمعين...

اما ان تكون عندك ودن حساسة جدا جدا بحيث تسمع شبكة وفصلة الكباس ودي هتبقى صعبه في العربيات المعزوله كويس...

او انك تمتلك القدرة على الحساسية الشديده بتراجع الاداء اول اما الكباس يشتغل وتحسن الاداء لما بيفصل ودي عايزة منك انك تكون حافظ عربيتك وسحبها 100% ومش هتبان في العربيات اللي موتورها عالي 2000 سي سي وممكن في بعض ال 1600 متحسهاش برضو

الحاجه التالته تمييز درجة برودة التكييف لما يكون شغال ولحظة الفصل لان حتما ولا بد البروده بتقل شويه وممكن تلاقي ريحة طلعت زي ريحة رطوبه بسيطه في المرحله دي اعرف ان الكباس فصل...

طيب
كل دول في حالة انك سايق العربية طبعا وانت جواها

حلول مساعدة,,,
انك متشغلش المروحه على اعلى سرعه فالصوت بكون هادي وتقدر تزود حساسية ودنك

انك تشغل التكييف وتقف بره وانت فاتح الكبوت لحد اما تميز الصوت وتاخد عليه فتحاول تدور عليه وانت جوه العربية

والكلام كله من الاول والآخر عن العربية مظبوطه والتكييف مشحون صح والتبريد ممتاز اما غير كده فانسى...

ده رأيي واجتهاداتي واتمنى اكون افدتك واتمنى لو حد عنده اضافه يضيفها


تحياتي