فكرة مشروع لغير المتفرغين
طبعا ظروف البلد الفترة اللي فاتت مخلية الواحد بيكلم نفسه , و كمان زاد عليها أزمات السولار و البنزين و البوتاجاز و مين عارف ايه كمان ممكن يحصل و ربنا يستر ...
طبعا أغلب الشركات و المصانع قللت العمالة و قللت المرتبات و لغت الحوافز و الارباح ...
و انا قاعد كده في ساعة تجلي , جت في دماغي فكرة ممكن تفيد جدا لو نجحت ( و لو فشلت مخسرناش حاجة ) ...
طبعا زي ما بعضكم عارف انا مدير شركة تعدين و بنصنع كربونات كالسيوم عادية و معالجة ( فيه موضوع كنت عامله عن دراسة جدوى للمشروع في المنتدى هنا )
و الحمدلله خلصنا المصنع و اختبارات التجارب و الانتاج و كل العك اللي بيكون في بداية المشروع كله .. و دخلنا في الجد بقى , اللي هوه التسويق و البيع .
التسويق و البيع بيكون مباشر و غير مباشر .
ازاي ؟
أقولك :
1- الغير مباشر بيكون عن طريق انك تدور في النت على مواقع تجمعات المنتجين و المستهلكين للحاجة اللي انت عايز تبيعها و تتناقش معاهم و تفتح معاهم شغل .
2- المباشر انك تمسك Yellow pages أو دليل الشركات أو مواقع الشركات و المصانع اللي انت عايز تبيعلها المنتج بتاعك أو الخدمة بتاعتك و تكلم المشتريات أو الشخص المسؤول عندهم و تقنعه بالشراء من عندك او عن طريقك ...
طبعا انا شغال بالطريقتين و معايا 2 زملا شغالين معايا بس المشكلة اننا عايزين نغطي منطقة جغرافية أكبر و في وقت أقل , و عايزين نوصل لشركات أكتر و عدد أكبر في أقصر وقت ممكن ..
و لكن يا معلم ده موضوع مكلف جدا و هنحتاج نعين ناس كتير و مصاريف اكتر و الخزنة فاااااااااااااااااااااااا ااااااااااااااضية ... ايه العمل يا ابو خالد ,,, تعمل ايه يا ابو خالد ,,,, دبرني يا وزير ..
رحت رايح على الغيط تحت تكعيبة العنب و ضربتلي براد شاي بالحطب و علبة سجاير و سرحت في دنيا الخيال .....
المهم وصلت لفكرة أني أطلب مساعدتكم ( أمال لو مش هنساعد بعض هنساعد مين ؟ ) و أعرض عليكم فكرة ممكن تكون مفيدة لينا و ليكم و هتكون تجربة لو نجحت نكبرها و ندخل فيها منتجات تانية و لو فشلت نقعد نعملها تحليل و نشوف اسباب الفشل و نعالجها ازاي ...
و عشان مطولش عليكم الفكرة باختصار ::::
احنا عدد كبير من الشباب و الشابات ( عشان محدش يقول عليا واخد موقف من المرأة ) و منتشرين في كل محافظات و مدن و قرى مصر المحروسة ... و أغلبنا أو بعضنا بيشتغل و الباقيين يا طلبة أو سيدات بيوت ( يا بختهم ) أو عندهم اعمال خاصة ...
و ممكن البعض يشتغل معانا و يتعاون معانا بانه ساكن قريب من منطقة صناعية او عنده وقت يلف على مصانع من غير ما يتكلف مبلغ كبير ( مثلا انا في بني سويف و عشان اروح برج العرب اليوم بيضيع و بصرف 150 جنيه و بروح مصنع او 2 بالكتير , بعكس اللي ساكن في برج العرب ممكن يروح 5 مصانع في اليوم وهيصرف 20 جنيه بنزين )
هيه دي بقى الفكرة يا شباب ..................
انت مثلا ساكن في بورسعيد او اسماعيلية و قريب منك منطقة صناعية تقوم رايح و توصل لمصنع بوية أو بلاستيك و تعرض عليهم منتجنا و تناقش معاهم مواصفاته و تبيعلهم .... و هتاخد نسبة معقولة على حجم المبيعات اللي هتعملها و ده ممكن تعمله بعد مواعيد شغلك الرسمية و كده بقى هيكون عندك فرصة انك تزود دخلك و تتعلم مجال جديد و نشاط جديد ... واحنا استفدنا اننا انتشرنا في وقت أقل و بتكاليف اقل كتير ...
طبعا دي مش فكرة جديدة و شركات كتيرة عملوها لكن الجديد ان شركات و مصانع التعدين و الخامات معملوهاش .....
منتظر آرائكم و نقاشكم المفيد
أخوكم م عمر الصاوي