الموضوع: التقييــــم الشامـــل لهيونداى النتــــرا 2012 ومقارنتها مع هـــوندا سيفـيـــك 2012

بشكر حضرتك على الموضوع والمقارنة الجميلة اكيد فيه ناس كتير استفادت منها

لكن للامانة الموضوع مكانه مش حيادي تماما ! لو حضرتك عايز فعلا الموضوع يبقى حيادي كان لازم يتحط في قسم المقارنات مايتحطش في قسم هيونداي !! لان طبيعي جدا اغلبية الاعضاء من القسم هيبقو في صف الالنترا بالتالي انت كدة هتسمع الكلام من طرف واحد فقط

بالنسبة لإنتشار الالنترا فهي انتشرت مش عشان هي افضل من السيفيك او افضل من الكورولا إطلاقا

الالنترا انتشرت اولا عشان اتسوقلها كويس شوف كام اعلان هتشوفه للالنترا وال Rp مقابل كام اعلان للسيفيك !!؟

ثانيا وده الاهم : ان الالنترا بتخاطب متطلبات الشعب المصري : الا وهي "البلوتوث - حساس المطر - السينسور - فتحة السقف - الفوج لايتس - قطع غيار بتتباع عن البقال - يوم ماتحب تبيع بكرة تتباع من غير ماتخسر كتير ... etc " انما اداء العربية عموما كقوة ماتور - ثبات - وسائل امان ABS/Airbags .. ياراجل بلا امان بلا بطيخ الحافظ هو ربنا "

الالنترا تفوقت على السيفيك فقط في الشكل الداخلي والخارجي والكماليات فقط لا غير !!

لكن كعربية قصاد عربية ماينفعش اني اقارن او احط الالنترا مع السيفيك في جملة واحدة

السيفيك محرك اقوى <<< هتقولي دي 130 حصان ودي 122 حصان ازاي !! ؟ هقولك ببساطة بص على الالنترا ال Md كانت 124 حصان في حين السيفيك ال 2010 122 ومع ذلك !! السيفيك كانت بتكتسحها على كل السرعات !! جايز بقى الالنترا احصنة كوري زي مافورميلاتور قال !! ؟ هههههههه

السيفيك اثبت بكتييير ومافيش اي وجه للمقارنة مابين السيفيك والالنترا في الثبات

الالنترا الجديدة على فكرة عفشتها زي الزفت !! ركب فيها 2 ورا وزنهم تقيل حبتين ومشيها في شارع مكسر وسلملي على نفسك وعلى احلى اصوات حك هتسمعها مع كل مطب او حفرة

وعلى فكرة الكلام ده قدام عيني مش افترى او كلام من الهوا النترا 2012 فول لودد شفتها من كتر ماهي ساقطة على الارض كنت حاسس صاحبها مسقطها !! والله العظيم ماكان فيه مجال حتى اني ادخل صباعي مابين العجل والكرتيرات !! ؟ مافيش دقيقتين ركنت على جمب لقيت نزل منها 3 كانو قاعدين ورا قامت العربية رفعت تاني على الارض

وطبعا كاعتمادية السيفيك افضل واحسن بكتير وهات سيفيك بقالها عشر سنين على الطريق او عاملة كيلو متر عالي وقارنها بالنترا ماشية نفس المدة وانت تعرف الفرق مابين دي كعربية ودي كعربية

عموما انا من وجهة نظري الالنترا على الرغم من سعرها المبالغ فيه الا انها ممكن تكون مناسبة للي بيحب الكماليات والاوبشنز والشكل الخارجي والداخلي وناوي بعد تلت اربع سنين يبيع انما لو واحد عايز يجيبها بحيث تكون عربية العمر مافتكرش انها هتكون مناسبة

ماتنسوش ان العربية 2012 يعني كل ملاكها لسه جايبنها وماكملتش مع حد خلونا نستنى تلت اربع سنين قدام ونشوف اراء الملاك عن العربية هيبقى عامل ازاي

انا مش بقول انها وحشة لكن ماينفعش تتقارن بالسيفيك او حتى بالكورولا

-------------

بالنسبة للكورولا فانا مش عارف هو ايه اللى دخلها في الموضوع طالما المقارنة مابين السيفيك والالنترا

لكن الالنترا / او هيونداي عموما لسه قدامها ممكن بتاع 10/15 سنة علما تعمل عربية في اعتمادية وقوة ومتانة الكورولا فالاحسن نطلعها برة الموضوع عشان مايبقاش فيه تشتيت ويبقى الموضوع مقارنة مابين السيفيك والالنترا